Բաքվում խառն են. պատերազմ-պատերազմ «խաղալ» չի՞ ստացվի
Մինչ երեկ ուշ երեկոյան Վիեննայում ԱՄՆ-ի, Ռուսաստանի և Ֆրանսիայի արտաքին քաղաքական գերատեսչության ղեկավարները Հայաստանի ու Ադրբեջանի նախագահներին նստեցրել էին մեկ սեղանի շուրջ ու փորձում էին ղարաբաղյան բանակցային գործընթացին հաղորդել շարունակականություն, պարզվում է, մայիսի 16-ի լույս 17-ի գիշերը հայ-ադրբեջանական պետական սահմանագոտու հյուսիսարևելյան հատվածում ադրբեջանական կողմը շարունակել է տարբեր տրամաչափի հրաձգային և դիպուկահար զինատեսակներից անկանոն բնույթի կրակահերթեր արձակել հայ դիրքապահների ուղղությամբ: ԼՂՀ ՊԲ-ից ստացված օպերատիվ տեղեկատվության համաձայն` անցած գիշերը ղարաբաղա-ադրբեջանական հակամարտ զորքերի շփման գծում հակառակորդը տաբեր տրամաչափի հրաձգային զինատեսակներից ու հետևակի մարտական մեքենայից (30 արկ), 60 միլիմետրանոց ականանետերից (16 արկ) և հաստոցավոր ավտոմատ նռնականետերից (32 արկ) խախտել է կրակի դադարեցման պայմանավորվածությունը: Առավել ինտենսիվ խախտումներ են արձանագրվել շփման գոտու հարավարևելյան (Հադրութ) և արևելյան (Մարտունու) ուղղություններով: Հայաստանի և Ադրբեջանի նախագահների հանդիպման ընթացքում, ինչի արդյունքում հարավային ուղղությամբ տեղակայված ՊԲ դիրքերից մեկում մայիսի 17-ին` ժամը 00:50-ի սահմաններում, հրազենային մահացու վիրավորում է ստացել ժամկետային զինծառայող, 1996թ. ծնված Խաչատուր Վարդանի Հարությունյանը: ՀՀ ՊՆ-ն հայտնում էր, որ առաջնագծում ստեղծված լարվածության հետևանքների ողջ պատասխանատվությունն ընկնում է ադրբեջանական կողմի վրա: Սա այն դեպքում, երբ նախօրեին Ադրբեջանի պաշտպանության նախարարը հայտարարում էր, թե հակամարտությունը «պետք է լուծել խաղաղ ճանապարհով»: Նման հայտարարություն, ադրբեջանական լրատվամիջոցների փոխանցմամբ, երկրի ռազմական գերատեսչության ղեկավարն արել էր թուրք և վրացի իր գործընկերների մասնակցությամբ տեղի ունեցած եռակողմ հանդիպմանը հաջորդած ասուլիսին: «Թուրքիայի և Վրաստանի իմ գործընկերների հետ հանդիպումներում նշվել է, որ Ղարաբաղի հակամարտությունը հարկավոր է լուծել խաղաղ ճանապարհով՝ միջազգային նորմերի և Ադրբեջանի տարածքային ամբողջականության հիման վրա», - ասել է Հասանովը: «Ղարաբաղում խաղաղության հասնելու ճանապարհը հայտնի է` հակամարտությունը պետք է լուծվի Ադրբեջանի տարածքային ամբողջականության և ինքնիշխանության պահպանման շրջանակներում», - իր հերթին հայտարարել է Թուրքիայի պաշտպանության նախարար Իսմեթ Յըլմազը՝ շեշտելով, որ Թուրքիան չի աջակցի Ղարաբաղի հակամարտության լուծման որևէ տարբերակի, որը չի բավարարի այդ պայմաններին: Իսկ Վրաստանի պաշտպանության նախարար Թինա Խիդաշելին, միանալով գործընկերներին, ավելացրել է․ - «Մենք հանդես ենք գալիս ղարաբաղյան հակամարտության խաղաղ կարգավորման, տարածաշրջանում խաղաղության, կայունության և երկարաժամկետ զարգացման օգտին»: Հիշեցնենք, որ Վիեննայում Լեռնային Ղարաբաղի շուրջ բանակցություններից մեկ օր առաջ հակամարտությունը խաղաղ ճանապարհով լուծելու մասին հայտարարող Վրաստանի, Ադրբեջանի և Թուրքիայի պաշտպանական գերատեսչությունների ղեկավարները որոշել է համատեղ զորավարժություններ անցկացնել: Ինչպես նկատում է «Ռոյթերզ» գործակալությունը, որոշումը, ըստ ամենայնի, «միտված հարևան Հայաստանի հետ լարվածությունը մեծացնելուն»: Երեք երկրների պաշպանության նախարարներն այս ձևաչափով հանդիպում են տարին երկու անգամ. Հասանով - Յիլմազ - Խիդաշելին Գաբալայում թվով չորրորդ այս հանդիպմանը Հասանովը հայտարարել է, որ նախատեսվում է երեք երկրների միջև փոխըմբռնման հուշագրի ստորագրում: Ինչպես երևում է Բաքվում Վիեննայի հանդիպումից հետո անորոշ տրամադրություններ են տիրում: Նախ, ադրբեջանական մամուլը, կարծես, ինֆորմացիոն բլոկադայի մեջ է հայտնված, նրանք առավելապես օգտվում են հայաստանյան մամուլի հաղորդագրություններից: Առայժմ պաշտոնական Բաքուն չի մեկնաբանել Վիեննայի բանակցությունները, ավելին` ԵԱՀԿ Մինսկի խմբի համանախագահող երկրների համատեղ հայտարարությունը, որում կոնկրետ քայլեր են ներկայացված, որոնք պաշտոնական Բաքուն մերժում էր արդեն մի քանի ամիս: Խոսքը սահմանային միջադեպերի մեխանիզմների ներդրման մասին է: Սպասենք Բաքվից թարմ հայտարարությունների: Ինչպես երևում է Ադրբեջանի նախագահի ու ադրբեջանական ղեկավարության մոտ շոկային տրամադրություններ են: Ադրբեջանում, հավանաբար, հույս ունեին, որ Հայաստանը կմերժի բանակցություններն, իսկ իրենք «ազատություն» ստացած` Ղարաբաղում պարբերաբար պատերազմ-պատերազմ «կխաղան»... Մետաքսյա Շալունց