«Ասել են` ճակատից կխփենք դրանց». սպանված կուրսանտի հայրը փաստում է

Վազգեն Սարգսյանի անվան ռազմական ինստիտուտում դաժանաբար սպանված կուրսանտ Հայկազ Բարսեղյանի գործով դատական նիստը կրկին անգամ  հետաձգվել է: Հայկազ Բարսեղյանի հայրը` Արկադի Բարսեղյանը Հայելի.am-ի հետ զրույցում նշեց, որ ամեն դատական նիստից առաջ իր ընտանիքը սթրես է տանում ու չնայած իր մայրը նամակ-խնդրանքով դիմել էր ՀՀ նախագահ Սերժ Սարգսյանին, որ դատական նիստերը անընդհատ չհետաձգվեն`  այս հարցին դրական լուծում չի տրվել: «Հատկապես անտանելի է Գնելի պահվածքը: Ամեն դատական նիստին այս տղան իրեն ակնհայտ ցինիկաբար է պահում: Դահլիճ մտնելիս կամ դուրս գալիս շրջվում է ու աչքով է անում իր տանեցիներին: Հասկանո՞ւմ եք ինչ է կատարվում մեզ հետ: Մենք տղա ենք կորցրել ու հիմա պատկերացրեք, որ նրանք այսպես կարող են իրենց պահել դատական դահլիճում, ապա ո՞նց են պահել ինստիտուտում»,-նշեց սպանված կուրսանտի հայրը: Արկադի Բարսեղյանը նկատում է, որ Գնել Թևոսյանի վարքագծի մասին վկայել են ռազմական ինստիտուտի մյուս կուրսանտները.«Եթե լսեք Մարտակերտի շրջանում գտնվող նրանց համագյուղացիների հետ, ապա կապշեք թե մարդիկ ինչ են ասում այդ ընտանիքի մասին: Ինչքան բան են պատմում Գնելի ու իր եղբոր արածներից: Համագյուղացիները ասել են, որ դրանք գյուղում երևան, ասել են` ճակատից կխփենք դրանց»: Արկադի Բարսեղյանին զայրացնում է նաևՎաչե Սահակյանի վարքագիծը. «Քիթը բարձր դահլիճ է մտնում ու արհամարանքով նայում շուրջը: Մի քիչ մարդկային բան միայն Նորայր Սահակյանի մոտ է մնացելԳնելը ոչ աչքով արեց ծնողներին`չդիմացա: Ասեցի` աչքով արա ու տես աչքդ ոնց է հելնելու, բայց ես սպասում եմ արդարադատությանը»,-ընդգծեց Արկադի Բարսեղյանը: Հաջորդ դատական նիստը նշանակվել է փետրվարի 4-ին՝ ժամը 13:00-ին: Հիշեցնենք, հունվարի 29-ին՝ ժամը 06:35-ի սահմաններում, հայտնաբերվել էր Հայկազ Բարսեղյանը՝ պտտաձողի վրա պարանով կախված վիճակում: ՀՀ քննչական կոմիտեում հարուցված քրեական գործով մեղադրանք է առաջադրվել Հ. Բարսեղյանի 4 համածառայակցի: Նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Դեպքից հետո հարուցվել է նոր քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով։ Լուսինե Ղազարյան