«Ալ-Քաիդան» Սիրիայում նոր ճակատ կբացի

«Ալ-Քաիդա» միջազգային ահաբեկչական ցանցի առաջնորդ Այման ազ-Զավահիրին որոշել է Սիրիայում նոր ճակատ բացել և այնտեղ այլընտրանքային հենակետ ձևավորել «Ջեբհաթ ան-Նուսրա» խմբավորման օգնությամբ: Այս մասին կիրակի հայտնել է New York Times թերթի էլեկտրոնային տարբերակը՝ հղում անելով աղբյուրներին ԱՄՆ-ի և Եվրոպայի երկրների հատուկ ծառայություններում: Հատուկ ծառայությունների գնահատմամբ՝ Սիրիայում մշտական ներկայությունը «ահաբեկիչներին անգին հնարավորություն կտա»: Այդ դեպքում «Ալ-Քաիդան» կլինի Եվրոպայից «հարվածի հեռավորության վրա», նաև կկարողանա գրոհայինների ավելի ակտիվ հավաքագրում անել Իրաքում, Թուրքիայում, Հորդանանում և Լիբանանում: Այդպիսի պլացդարմի պատրաստման նպատակով նա Սիրիա է ուղարկել տասնյակից ավել էմիսարներ ամենահուսալի և պատրաստված մարտիկներից, նշում է պարբերականը: