Գուրգեն Արսենյանի գրասենյակը հայտարարություն է տարածել
Ազգային ժողովի պատգամավոր Գուրգեն Արսենյանի գրասենյակը հայտարարություն է տարածել պատգամավորի որդուն կալանավորելու եւ միջադեպի հանգամանքների մասին: «Դեռ մոտավորապես 1 ամիս առաջ Գուրգեն Գուրգենի Արսենյանը իր տարիքակիցների հետ Երեւանի ակումբներից մեկում վիճաբանել է եւ դրան հետեւած անձնական հողի վրա ծագած վիճաբանությունը ավարտվել է ձեռնամարտով: Ինչպես արդեն հայտնի է, ներկա պահին գործը գտնվում է իրավապահների տիրույթում: Հավելեք նաեւ, որ ներկա պահին համապատասխան միջոցներ են ձեռնարկվում՝ իրավական պաշտպանությունն իրականանցնելու համար: Գուրգեն Գուրգենի Արսենյանը ունի փաստաբան, որը զբաղվում է տվյալ գործով, ավելացնենք նաեւ, որ նա չի խուսափում վարույթն իրականացնող մարմնից՝ եղել է արտերկրում, զանգահարել է, զգուշացրել է համապատասխան քննչական մարմիններին, ինչպես նաեւ ֆաքս է ուղարկել եւ տեղեկացրել, որ սույն թվականի մայիսի 12-ին վերադառնալու է Հայաստանի Հանրապետություն, ինչը որ տեղի է ունեցել: Ի դեպ, իր որդու արտերկրում գտնվելու փաստի եւ մայիսի 12-ին վերադառնալու մասին համապատասխան մարմիններին տեղեկացել է նաեւ ՀՀ ԱԺ պատգամավոր Գուրգեն Արսենյանը, որն այդ ժամանակ նույնպես բացակայել է հանրապետությունից: Նշենք նաեւ, որ օրենքով ընձեռնված բոլոր հնարավորություններն օգտագործվելու է, որպեսզի ապացուցվի, որ այս միջադեպը պարզապես երիտասարդների միջեւ անձնական հողի վրա ծագած վիճաբանության է, որը չգիտես ինչու նախաքննական մարմինը որակել է որպես «ծանր» խուլիգանություն եւ Գուրգեն Գուրգենի Արսենյանին մեղադրանք է առաջադրել ՀՀ քրեական օրենսգրքի 258-րդ հոդվածի 4-րդ մասով: Բազմաթիվ հարցերին ի պատասախան, տեղեկացնենք նաեւ, որ մեր տեղեկություններով ներկա պահին, տվյալ գործով, կալանավորված է միայն ՀՀ ԱԺ պատգամավոր Գուրգեն Արսենյանի որդին»,- ասված է հայտարարության մեջ:
Հետևեք մեզ Viber-ում
