Դատական և իրավապահ համակարգերում կան դավաճաններ. Փաշինյան

13:07 - 6/մայիսի/2020

Հայաստանի Հանրապետությունում 2018-ի մայիսից ի վեր հաստատված է ժողովրդավարական կայունություն: Այս մասին հայտարարեց ՀՀ վարչապետ Նիկոլ Փաշինյանը:

Ըստ նրա` Հայաստանի Հանրապետությունում շատ երկար տարիներ հաստատված է եղել ավտորիտար կայունություն եւ ավտորիտար կայունության ֆոնին ժողովրդավարական կայունությունը երբեմն կարող է թողել անկայունության տպավորություն:

«Պատիվ ունեմ արձանագրել, որ ՀՀ-ում չկա որեւէ քաղաքական կրիմինալ, մաֆիոզ ուժ, որն ի վիճակի լինի խաթարել ՀՀ-ում ժողովրդավարոական կայունությունը, որն ի վիճակի լինի ՀՀ-ում կասկածի տակ դնել 2018-ին տեղի ունեցած ժողովրդական թավշյա հեղափոխությունը»,- հայտարարեց ՀՀ վարչապետը:

Անդրադառնալով նախորդ տարի իշխանությունների կողմից չլուծված խնդիրներին՝ աշինյանը նկատեց. «Մենք չենք կարողացել լուծել ՀՀ-ում անկախ, վստահելի դատական համակարգ ունենալու հարցը։ Դատական և իրավապահ համակարգերում կան դավաճաններ: Եվ ես ուզում եմ ասել, թե ինչո՞ւ մենք չենք կարողացել լուծել անկախ, վստահելի դատական իշխանության հարցը։ Դրա համար կա, գոյություն ունի մեկ պատճառ՝ որովհետև մենք իրոք ուզում ենք, որ ՀՀ-ում լինի անկախ, օրինական, վստահելի դատական համակարգ։ Ոչ թե մենք ուզում ենք իշխանության կամ նույնիսկ ժողովրդի համար վերահսկելի դատական համակարգ, այլ
մենք իսկապես ուզում ենք անկախ դատական համակարգ։ Որովհետև, եթե մենք ուզենայինք կառավարելի դատական համակարգ, հին խամաճիկային դատական համակարգի փոխարեն նոր խամաճիկային դատական համակարգ, ապա վաղուց լուծած կլինեինք, ընդ որում՝ դրա համար մեկ-երկու զանգը կամ նույնիսկ զանգի բացակայությունը բավարար կլիներ»։