Նախկին նախագահի դեմ հարուցվել է քրեական գործ

Արգենտինայի նախկին նախագահ Քրիստինա Քիրշների դեմ հարուցվել է քրեական գործ՝ կապված արժույթի ֆյուչերսային առևտրային գործարքների հետ, որոնք իրականացրել է երկրի Կենտրոնական բանկը։ Այս մասին հայտնում է La Jornada-ն։ Դատավոր Կլաուդիո Բոնադիոն գործ է հարուցել նաև երկրի էկոնոմիկայի նախկին նախարար Աքսել Կիսիլյոֆի և ԿԲ նախկին ղեկավար Ալեխանդրո Վանոլիի դեմ։ Յուրաքանչյուր մեղադրյալի ունեցվածքի վրա 1 մլն դոլարի կալանք է դրվել։ Համաձայն մեղադրանքի՝ Արգենտինայի ԿԲ-ն 2015 թվականին իրականացրել է արժույթի ֆյուչերսային վաճառք դոլարի դիմաց 10 պեսո փոխարժեքով, մինչդեռ իրական փոխարժեքը Նյու Յորքի բորսայում կազմել է 14-15 պեսո։ Դատավորի կարծիքով՝ այդ արժութային գործարքները վնաս են հասցրել պետությանը և չէին կարող չիրականացվել առանց նախկին նախագահի հավանության։