Գող, սիրտը դող

Երբ իշխանության ֆրակցիայից Արման Եղոյան անուն ազգանունով մի պատգամավոր, որի կենսագրության ամենահայտնի էջերից մեկը պատգամավոր դառնալուց առաջ մի քանի ամիս վարչապետ Նիկոլ Փաշինյանի մամուլի խոսնակ աշխատելն է եղել, ամիսներ առաջ հայտարարեց, թե իշխանության ենք եկել 40 տարով, շատերը լուրջ չընդունեցին, մտածելով, թե պատգամավորի ամենավառ երազանքն է: Իշխանությունն այսօր իր պահվածքով կարծես հաստատում է, որ իրենք իշխանության են եկել 40 տարով եւ իրենց գործողություններն ու ծրագրերն էլ պլանավորում են հենց այդ հաշվարկով:

ԲՀԿ պատգամավոր Գեւորգ Պետրոսյանն նախագիծ է ներկայացրել՝ Քրեական օրենսգրքում փոփոխություն կատարելու մասին: Նա առաջարկում է, որ քրեական պատասխանատվության վաղեմության ժամկետը հանվի ՀՀ սահմանադրական կարգը տապալելու դեպքում, անկախ նրանից, թե երբ է դա կատարվել: Պետրոսյանը ԱԺ պետաիրավական հանձնաժողովի քննարկմանը իշխանական գործընկերներին փորձեց բացատրել, որ սահմանադրական կարգի տապալումն ավելի վտանգավոր է, քան պետական դավաճանությունը, այն սպառնում է պետության իրավական անվտանգությանը, ուստի ինչպես օրինակ ցեղասպանության դեպքում չի գործում, այս պարագայում էլ հանվի վաղեմության ժամկետը: Սակայն իշխանությունն ի դեմս կառավարության դեմ է նախագծին, նրանք կարծում են, որ Պետրոսյանի քայլը իրենց դեմ է, Նիկոլ Փաշինյանի, ով այդ կարգի ակնհայտ տապալմամբ է դարձել ՀՀ վարչապետ: Եւ որքան էլ ԲՀԿ-ակա պատգամավորը համոզում, բացատրում էր, որ ինքն անձնավորված նախագծեր չի գրում, եւ որ սա ապագայի նախագիծ է, միեւնույն է, այդ ամենն անօգուտ էր անցնում:

Կառավարությունը դեմ է՝ պաշտոնական պատճառաբանությամբ, որ սահմանադրական կարգը տապալելը մարդկության դեմ ուղղված հանցագործություն չէ, բացի այդ, վկաներն են ծերանում, ապացույցներ գտնելն է դժվար: Սակայն նախագծի հեղինակը բոլոր հարցերին հիմնովին պատասխանում էր, ասելով, որ նույն տրամաբանությամբ այլ հանցագործությունների ժամանակ էլ ապացույցները տարթակալում են, բայց դա չի խանգարում նոր ընթացք տալ տվյալ գործին: Իշխանական պատգամավորներին, սակայն, <<կոտրել>> չհաջողվեց, գող սիրտը դող ժողովրդական ասածվածքը նրանք լավ են սերտել եւ չեն պատրաստվում սեփական ձեռքերով սեփական մահկանացուն կնքել:

Անի Սահակյան