Փրկեք Նաղդալյանի ընտանիքը

Տակավին օրեր առաջ մի ամբողջ կուսակցություն լծվել էր ՀՀԿ փոխնախագահ Հերմինե Նաղդալյանի <<փրկության>> գործին, Արցախի մասին տիկնոջ խոսքերը ձևափոխել հնարավոր ու անհնար բոլոր տարբերակներակներով: Զայրացած հանրության ճիրաններից Նաղդալյանին <<ազատագրելը>> պատվի խնդիր էր դարձել հարազատ կուսակցության համար , բայց կրքերը դեռ չէին հանդարտվել, երբ աղմկահարույց այս տիկինը նոր պատմության մեջ հայտնվեց: Այս անգամ գլխավոր հերոսը ոչ թե անձամբ Նաղդալյանն է, այլ նրա ամուսինը, ում անունը տարիներ շարունակ հոլովվում է բնակարանաշինության մի խարդախ պատմության մեջ: Ճիշտ այն պահին, երբ կառավարության նիստում վարչապետ Հովիկ Աբրահամյանը խոսում էր երկրում փոփոխությունների իրականացման անհրաժեշտության ու քաղաքական կամքի առկայության մասին, կառավարության գործերի կառավարիչ, Հերմինե Նաղդալյանի ամուսին Դավիթ Բեգլարյանը դուրս էր եկել իր աշխատասենյակից ու հարձակվել իր ու կնոջ դեմ բողոքող ցուցարարների վրա: Ցուցարարների խոսքով՝ Բեգլարյանն իրենց ապուշ ու էշ է անվանել: Այդ մասին փաստող տեսանյութեր կան: Բողոքի մասնակիցները «Նորաշեն 2007» սպառողական կոպերատիվի գործունեությունից տուժած բնակիչներն են : Երևանի Գևորգ Չաուշի 14/3 հասցեում բազմաբնակարան շենք կառուցելու նպատակով «Նորաշեն-2007» սպառողական կոոպերատիվի ղեկավարությունը դեռևս 2007 թվականին գումարներ էր հավաքել շենքում բնակարան գնելու ցանկություն ունեցող անձանցից: Սակայն կանգնելով ֆինանսական խնդիրների առաջ` կառուցապատող ընկերության ղեկավարներ Լուսաբեկ Սամվելյանն ու Արմեն Թադևոսյանը սկսել էին կիսակառույց բնակարանները գրավ դնելով տոկոսով գումարներ վերցնել տարբեր անձանցից` շենքի շինաշխատանքներն ավարտին հասցնելու համար: Բնակարաններից 24-ը գրավ էր դրվել «Էսկո Կոնցեռնի» նախագահ Սարգիս Աղաբեկյանի մոտ, ով ձերբակալվել էր վաշխառության մեղադրանքով, 14-ը՝ Հերմինե Նաղդալյանի ու նրա ամուսնու: Եվ հիմա մարդիկ արդարացիորեն բողոքի ձայն են բարձրաձնում, ուզում են հասկանալ, թե ինչու է, որ նույն մեղքի համար Աղաբեկյանին փակում է ճաղերի ետևում, իսկ Հերմինե Նաղդալյանին դարձնում է Ազգային ժողովի փոխնախագահ: Մոտենալով ցուցարաներին՝ Բեգլարյանը խլել է Նաղդալյանի ու էշերի նկարով պաստառը, փորձել այն իր հետ տանել կառավարության շենք: Ակցիայի մասնակցիներին հաջողվել է հետ խլել պաստառը Բեգլարյանի ձեռքից: Եթե որեւէ մեկն ակնկալում է, որ այսքանից հետո մշտապես մամուլի ուշադրության կիզակետում հայտնված այս ընտանիքի անդամներն արժանի պատիժ կկրեն, կարելի է նրան շնորհավորել իր լավատեսության համար, որը տածում է իշխանությունների նկատմամբ: Նաղդալյանի, նրա վաշխառու ամուսնու, նրանց ընտանեկան բիզնեսների ու տարբեր աղմկահարույց միջադեպերին տիկնոջ առնչության ու հատկապես <<դիվանագիտական ասպարեզում>> Նաղդալյանի ձախողումների մասին տարիներ շարունակ քննարկվում է տարբեր հարթակներում, սակայն նա եւ իր ընտանիքը եղել եւ մնում են իշխանության արտոնյալների դասում: Նկատենք, որ Հերմինե Նաղդալյանի ամուսինը բավական յուղոտ պաշտոն է զբաղեցնում՝ գործերի կառավարիչն է,  կազմակերպում է պետական գնումները, նյութատեխնիկական սպասարկումը։ Այսինքն՝ ատկատների և փող աշխատելու համար լավ տեղ է սա։ Իսկ այդ պաշտոնում նա նշանակվել է մինչեւ Նորաշենի հայտնի պատմությունը: Հերմինե Նաղդալյանը ՀՀԿ-ի կին-Լիսկան է դարձել, ում ներվում է գրեթե ամեն ինչ ու կներվի այնքան ժամանակ, քանի դեռ իշխանության արժեհամակարգում դոմինանտ ու գնահատելի է լիսկայակերպը: Այն կերպը, որը պատուհաս դառնալով շատերի գլխին՝ հանցավոր հատկանիշներով երաշխավորում է իշխանության վերարտադրության հարցը: Այնպես որ ՀՀԿ-ին այլ բան չի մնում, քան նորից լծվել <<փրկության>> գործին, այս անգամ՝ Նաղդալյանի ընտանիքի: Անի Սահակյան