Ինձ քռքաշ, ծեծելով տարան դուրս, ստիպեցին եղբորս մեր տուն կանչեմ, որ բռնեն. դիմակավորված անձինք լուսադեմին ներխուժել են նորատուսցի Մնոյանների տուն, ահաբեկել հղի կնոջը. aysor.am
Այսօր լուսաբացին, մի խումբ դիմակավորված անձինք ներխուժել են Նորատուսի բնակիչ Գրիգոր Մնոյանի տուն, ծեծել վերջինիս, հրել-գցել մորը և ահաբեկել 6 ամսական հղի կնոջը: Գործողության վերջում դիմակավորված անձինք անհայտ ուղղությամբ են տարել տանտիրոջ 32-ամյա եղբորը: Միջադեպի մանրամասներն Aysor.am-ի թղթակցին ներկայացրեց Գրիգոր Մնոյանը.
«Առավոտվա ժամը 6-ն էր, քնած էինք: Կինս հղի է: Մեր դուռը շրխկոցով բացվեց, երևի ոտքով խփեցին: Երկրորդ հարկում պառկած էինք, իջա, տեսնեմ՝ ինչ է եղել, մեկ էլ մի 30 հոգով լցվեցին տուն: Ինձ խփեցին, պառկեցրին գետնին, կանդալները կիսամերկ վիճակում գցեցին ձեռքերս: Քռքաշ դուրս հանեցին, ասում եմ՝ ո՞վ եք, ինչի՞ համար եք տանում: Դիմակավորներից մեկը՝ մի հատ չաղ, դրբով մարդ, ասում է՝ լավ ենք անում: Չներկայացան՝ ով են, ինչ են: Մայրս ասեց՝ դուք ո՞վ եք, ի՞նչ իրավունք ունեք իմ տղային սենց անեք: Մորս հրեցին, գցեցին: Հիմա վատ է, շտապօգնություն ենք կանչել, ուզում էին տեղափոխեին, բայց սրսկեցին, հանգստացավ, հիվանդանոց չտեղափոխեցին:
Հղի կինս դեպրեսիայի մեջ է, տեսավ, որ ինձ ցեխերի միջով քարշ տվեցին, տարան: Հետո չգիտեմ՝ հեռախոսով ում հետ խոսեցին, ինչ արեցին, ինչ-որ մեկը հեռախոսով նրանց ասեց, որ ես էդ մարդը չեմ, թողնեն գնամ: Արժանապատվությունս տվեցին գետնին, հետո էլ ասեցին՝ գնա: Ուրիշ գյուղացիների տներ էլ են մտել, որոնք դեպքի հետ ինչ-որ կապ են ունեցել: Լրիվի դռները ջարդած են», - ասաց մեր զրուցակիցն՝ ավելացնելով, որ իրենք երեկվա աղմկոտ միջադեպի կողմերից ոչ մեկի հետ որևէ առնչություն չունեն, որևէ մեկի բարեկամը կամ ծանոթը չեն:
Գրիգոր Մնոյանը պատմեց նաև, որ իրեն ծեծելուց հետո դիմակավորված անձինք ստիպել են հեռախոսով զանգել հարազատ եղբորը, բարձրախոսը միացրած զրուցել վերջինիս հետ՝ խնդրելով, որ շտապ իրենց տուն գա:
«Եղբայրս երկու անչափահաս երեխա ունի՝ մեկը 5 ամսական, մեկն էլ՝ 5 տարեկան: Ինձ ստիպեցին, ասեցին զանգի, կանչի եղբորդ, թե չէ քեզ ենք տանելու: Զոռով հեռախոսը տվեցին, զանգեցին, դրեցին «գռոմկի», ես էլ ասեցի՝ արի մեր տուն: Եթե մի ավել բան էի ասում, ինձ խփում էին», - ասաց Մնոյանը՝ նշելով, որ ՄԻՊ գրասենյակից իրենց տեղեկացրել են՝ միջադեպից հետո եղբորը տարել են Քանաքեռ-Զեյթուն բաժին:
Մնոյանի եղբայրն առայժմ հարազատների հետ կապ չի հաստատել, ՄԻՊ գրասենյակից միայն փոխանցել են, որ նա եղել է ցեխակոլոլ հագուստով:
«Ես մինչև մարդու իրավունքների Եվրոպական դատարան բողոքելու եմ, սաղ աշխարհին բողոքելու եմ, որ անօրինական ձևով ներխուժել են իմ տուն, ինձ ու մորս ծեծել են, հղի կնոջս՝ հրել: Ինչի՞ համար: Այդպես էլ չիմացանք՝ ինչի՞ էին ներխուժել մեր տուն, ինչ էին ուզում», - ասաց քաղաքացին:
Հետևեք մեզ Viber-ում
