Արտակարգ դրության ռեժիմը դադարեցվե՞լ է

Դատելով Երևանում արձանագրվող անցուդարձից, ավտոմեքենաների խցանումներից և աշխատանքային եռուզեռից՝ արտակարգ դրության ռեժիմը փաստացի դադարեցվել է։

Ճիշտ է, հանրային տրանսպորտը չի գործում, փոքրիկ բիզնեսներից շատերը փակ են, վարսավիրանոցներից միայն ընդհատակյաներն են գործում և ոստիկանները երբեմն կարող են տանից դուրս գալու թերթիկ պահանջել քաղաքացուց, բայց ընդհանուր առմամբ արտակարգ դրությունը ձևական է դարձել։ Այսինքն՝ Նիկոլ Փաշինյանի գլխավորած կառավարությունը հերթական ձախողումն արձանագրեց։ Ամեն ինչ շատ փնթի ու անարդյունավետ կազմակերպվեց։

Երբ պետք էր արտակարգ դրություն մտցնել, սրանք ուշացրեցին։ Զբաղված էին հանրաքվեով, մարդկանց խմբերով հավաքելով ու ատելության քարոզ կարդալով։ Դա կորոնավիրուսի տարածման ամենաինտենսիվ փուլն էր։

Հետո ստիպված եղան արտակարգ դրություն հայտարարել, բայց դա էլ ձախողեցին։ Մինչդեռ արտակարգ դրության ռեժիմն անհրաժեշտ էր օգտագործել կորոնավիրուսի տարածման դեմ պայքարի և տնտեսությունը բացելու նախապատրաստական աշխատանքների համար։ Բայց երկու ուղղությամբ էլ կառավարության քայլերն անարդյունավետ էին։ Վկան՝ արտակարգ դրության պայմաններում վարակի տարածման բարձր տեմպը։ Պարետատան ստեղծումը Փաշինյանի համար պատասխանատվությունից խուսափելու և քավության նոխազ ստեղծելու նպատակ է հետապնդել։ Ընդամենը։

Վարակվածների թվով մենք ԱՊՀ տարածքում առաջատարներից ենք, սակայն Փաշինյանին դա, կարծես, քիչ է մտահոգում։ Նա որոշել է սեփական վատ աշխատանքը փոխհատուցել «լայվերով», շոուներով ու ատելության քարոզով։ Թե ինչ է լինելու արտակարգ դրության ֆորմալ դադարից հետո, դժվար չէ պատկերացնել։

Պետրոս Ալեքսանյան

7or.am