Սկանդալային զարգացումներ Գագիկ Ծառուկյանի շուրջ

Գլխավոր դատախազությունը հաստատել է ԲՀԿ առաջնորդ Գագաիկ Ծառուկյանին պատկանող «Մուլտի Գրուպ կոնցեռն»-ի գլխավոր տնօրեն Սեդրակ Առուստամյանի մեղադրանքն ու գործն ուղարկել դատարան։ Գործը մակագրվել է դատավոր Վաչե Մարգարյանին:
Գագիկ Ծառուկյանի ընտանիքի հետ առնչվող ընկերության ղեկավար Սեդրակ Առուստամյանը կալանավորվել է մի քանի օր առաջ` ԱԱԾ-ի կողմից: Առուստամյանի անունը կապվում է մի քանի քրեական գործերի հետ:
Նա մեղադրվում է 20 միլիոն դոլար կաշառք տալու մեջ: Նրան նաև մեղադրում են համայնքային սեփականություն հանդիսացող հողամասերի վրա ինքնակամ շինարարությունը չդադարեցնելու համար: Խոսքը Աբովյան փողոցում կառուցվող հյուրանոցի մասին է, որի շինթույլտվությունը Երևանի քաղաքապետարանի կողմից տրվել է դեռևս 2017թ-ին: Հետագայում` այդ տարածքում բիզնես ծավալող ընկերության ներկայացուցիչը բողոքել է, որն էլ գործ հարուցելու առիթ է դարձել: Իսկ շինարարությունը 2018 թ-ից դադարեցված է: Քաղաքապետարանը երկու անգամ տուգանել է «Մուլտի գրուպին» այս շինության համար և պնդում է, որ կառուցապատումն ապօրինի է։ Առուստամյանը  չի վճարել տուգանքը և դիմել է դատարան։ Ընդ որում, առաջին ատյանի դատարանը եզրահանգել է, որ տույժերն ապօրինի են։ Հենց այս հյուրանոցի շինարարության մասին էր խոսում Գագիկ Ծառուկյանը, երբ անցյալ տարի ԱԺ-ում ցույց էր տալիս նախագիծը և անտեղյակության համար մեղադրում Հայկ Մարությանին:
«Ազատության» հետ զրույցում Առուստամյանի փաստաբան Հովիկ Սուքիասյանը հայտնել է, որ մի գործով էլ Առուստամյանը մեղադրվում է կաշառք ստանալու և փողերի լվացման համար: Ըստ փաստաբանի, խոսքը 2011 թվականին կատարված գործողությունների մասին է։ Իսկ մյուսն առնչվում է «Հյուսիս-հարավի» շինարարական ծրագրի հետ։ Նա մեղադրվում է կեղծ ձեռնարկատիրական գործունեություն իրականացնելու, առանձնապես խոշոր չափերի հարկերից խուսափելու, ինչպես նաև փողերի լվացման համար։ Ըստ Քննչական կոմիտեի՝ 2008-2010 թվականներին տրանսպորտի և կապի նախարարի պաշտոնը զբաղեցրած Գուրգեն Սարգսյանը Առուստամյանի և այլ անձանց գործակցությամբ «Սթոնս» ընկերությանը իբր մատուցված ծառայությունների համար դուրս է գրել ընդհանուր 177 միլիոն դրամի կեղծ հարկային հաշիվներ։ Գումարի մեծ մասը փոխանցվել է Սեդրակ Առուստամյանին:
Միաժամանակ հայտնի դարձավ, որ ֆինանսների նախարարությունում քննարկվում է Գագիկ Ծառուկյանի ընտանիքին պատկանող և Մուլտի գրուպի կազմում ընդգրկցած Շանգրի Լա խաղատան լիցենզիան ուժը կորցրած ճանաչելու հարցը: Թե որն է  պատճառը, ֆինանսների նախարարությունը չի պարզաբանել, նշելով, որ վարույթի ընթացքում հավելյալ տեղեկություն հայտնելն անթույլատրելի է: Ապրիլի 15-ից հարուցված գործի քննությունը երկու անգամ հետաձգվել է և տեղափոխվել ապրիլի 30-ին:
Գագիկ Ծառուկյանը Հայաստանի ամենահարուստ մարդկանցից է, նա նաև ԱԺ մեծությամբ երկրորդ խմբակցության ղեկավարն է: Նրա սեփականության դե յուրե գլխավոր կառավարիչն համարվող Առուստամյանի ձերբալությունը նշանակում է, որ իշխանության թիրախում Ծառուկյան ունեցվածքն է` դրանից ածանցվող քաղաքական էֆեկտով: Նրա շուրջ տեղի ունեցող սկանդալային իրադարձությունների քաղաքական ուղերձները ակնհայտ են: Ըստ ամենայնի` իշխանությունն իր քայլերով Ծառուկյանին պարտադրում է գնալ դասակարգային պայքարի : Այս առումով զարգացումներն առջևում են և դիտարժան են լինելու:

Հայկ Դավթյան