Ինչպես փչացնել Մոսկվայի հետ հարաբերությունները. եթե այսքանն ասվում է հրապարակային, ի՞նչ է ասվում կուլիսներում
Կենտրոնանալով օրերս Ռուսաստանի արտգործնախարար Սերգեյ Լավրովի՝ Արցախի թեմայով հայտարարություններին, չվերլուծվեց նրա՝ Հայաստան-Ռուսաստան հարաբերությունների վերաբերվող:
երգեյ Լավրովն արձագանքել է Հայաստանի համար գազի գինը նվազեցնելու հնարավորությանը` ի պատասխան հիշատակելով ռուսական ընկերությունների դեմ Հայաստանում սկսված դատական գործընթացները:
«Կարծում եմ, որ դաշնակիցները, իհարկե, պետք է տնտեսական առավելություններ ստանան»,- ասել է Ռուսաստանի արտգործնախարարը` միաժամանակ հավելելով` «դաշնակցային հարաբերությունները պետք է արտացոլվեն բոլոր ոլորտներում»:
Տնտեսական դաշտում ռուսական կողմը ակնկալում է, որ դատական գործընթացները, որոնք վերջին տարիներին սկսել են համատեղ ձեռնարկությունների, այդ թվում` Հարավկովկասյան երկաթուղու դեմ, կկարգավորվեն` «առանց փորձելու մեջտեղ բերել ինչ-որ բաներ, որոնք հարիր չեն դաշնակիցների միջև հարաբերություններին»:
«Ես այդ մասին շատ բաց եմ խոսում, քանի որ ռուսական ընկերությունները հայտնվել են որոշ բարդ իրավիճակներում: Հուսով եմ, որ բոլոր այս հարցերը մենք կկարգավորենք փոխադարձ համաձայնությամբ»,- ասել է Լավրովը Ա. Գորչակովի անվան հիմնադրամի տեսակապի ժամանակ:
Հիշեցնենք, որ ԵԱՏՄ անդամ Հայաստանն ու Բելառուսը շաբաթներ առաջ դիմել էին Մոսկվային` գազի գինը վերանայելու հարցով: Ռուսական կողմը, սակայն, դաշնակիցների խնդրանքներն առայժմ չի բավարարել: Ավելին, «Գազպրոմ Արմենիան» ապրիլի 1-ին սակագինը բարձրացնելու հայտ է ներկայացրել Հայաստանի Հանրային ծառայությունները կարգավորող հանձնաժողով:
Արձագանքելով հարցին` ինչու է Ռուսաստանը իջեցնում գինը Եվրամիության անդամ Բուլղարիայի համար և անպատասխան թողնում ԵԱՏՄ դաշնակիցների խնդրանքը` Լավրովն ասել է.- «Երբ Հայաստանի ու Բելառուսի համար ներկայումս գործող գները շուկայականից երկու-երեք անգամ ավելի ցածր էին, որևէ մեկը չէր խոսում այն մասին, որ դա քաղաքականություն է, բոլորը պնդում էին, թե իրենց դեպքում այդպես էլ պետք է լիներ»:
Իրականում, որքան էլ Նիկոլ Փաշինյանը փորձեց ցույց տալ, թե որքան է կարևորում Ռուսաստանի հետ ռազմավարական հարաբերությունները, թե որքան է կարևորում Պուտինի հետ հարաբերությունները, այսօր Հայաստան-Ռուսաստան ռազմավարական հարաբերություններից գրեթե ոչինչ չի մնացել:
Հայաստանում Փաշինյանի «թավշյա հեղափոխությունը» նոր էր կայացել, երբ արդեն մի առիթով Լավրովը հրապարակային արտահայտվեց, հասկացնել տվել, որ չեն հասկանում ինչ է կատարվում Հայաստանում և ունեն որոշ մտահոգություններ:
Հիմա Լավրովը կրկին արձանագրել է կոնկրետ իրավիճակ, ոչ դիվանագիտորեն ասած՝ Ռուսաստանի արտգործնախարարը ցույց է տվել, որ հայ-ռուսական հարաբերություններում բարդություններ կան, ընդ որում՝ Հայաստանի իշխանությունների մեղքով:
Ու այդ պայմաններում Նիկոլ Փաշինյանն ակնկալում է, որ ռուսական կողմը գազի գինը պետք է իջեցնի՞...
Եթե մի հարցում ռուսական կողմին ինչ-որ բան ես զիջում, կամ հրապարակային կարևորում ես ՌԴ-ի հետ հարաբերությունները, գործնականում էլ պետք է առաջնորդվել դաշնակից պետությանը հարիր մակարդակով: Հիմա Մոսկվայից ասում են, դաշնակցային հարաբերությունները չպետք է միակողմանի լինեն:
Այլ կերպ ասած՝ Փաշինյանը խոշոր հաշվով, տապալել է հայ-ռուսական հարաբերությունները: Իսկ Ռուսաստանը ոչ միայն առևտրատնտեսական առումով կարևոր պետություն է, այլ ԵԱՀԿ Մինսկի խմբի համանախագահող պետություն:
Նախ՝ չպետք էր թույլ տալ, որը բանը հասներ նրան, որպեսզի Ռուսաստանի ղեկավարության կողմից հրապարակային Հայաստանի իշխանություններին քննադատեին: Եվ երկրորդ՝ եթե այսքանն ասվում է հրապարակային, պատկերացնելը նույնիսկ սոսկալի է, թե ինչ է ասվում հայ-ռուսական կուլիսներում...
Մետաքսյա Շալունց
Հետևեք մեզ Viber-ում
