Կրկին «ջանքեր չեն խնայվել», Հայոց Ցեղասպանության միջոցառումը պարզունակ դարձնելու համար

Այս արտահայտությունը դարձել է վերջին շրջանում պաշտոնական տեղեկատվության ներկայացման առանցքային ուղերձը: Նման դրսևորման ականատես եղանք նաև ապրիլի 21-ին, ՀՀ կառավարության մամուլի սրահում, երբ ՀՀ բարձրաստիճան պաշտոնյանները ներկայացրին Հայոց Մեծ Եղեռնի 105-րդ տարելիցին նվիրված նախատեսվող միջոցառումները: Մասնավորապես. «Ապրիլի 23-ին՝ երեկոյան 21:00-ին հորդորում ենք քաղաքացիներին մարել բնակարանների լույսերը և պատուհանների մոտ միացնել հեռախոսի լույսը՝ այդպես միանալով «Լուսավառ ոգեկոչման րոպե» խորագրով ակցիային»։
Իհարկե, մեծ ջանքեր էր ներդրվել, որպեսզի ապրիլի 15-ի, ՀՅԴ Հայաստանի Երիտասարդական և ՀՅԴ «Նիկոլ Աղբալյան» ուսանողական միությունների կոչը «Ապրիլի 23-ին և 24-ին ժամը 21։00-ից վառել և մեր բնակարանների պատուհաններին դնել մոմեր՝ ի հիշատակ Հայոց Ցեղասպանության զոհերի և մեր պահանջատիրության» միջոցառումը վերափոխելու, ավելի ճիշտ պարզունակ(պրիմիտիվ) դարձնելու համար: Զարմանալի է, հարգելի պետական այրեր, դուք հեռախոսի լույսի և մոմի տարբերությունը չեք հասկանում: Այնինչ բացառիկ հնարավորություն էր տրված… Քանի որ ավելի լավ բան չէիք մտածել, հայտարարեիք, որ միանում եք այդ կոչին և Հայոց Ցեղասպանության զոհերի հիշատակի օրվան ընդառաջ դրսևորեիք միասնականության քայլ, որի կարիքն այսօր ամեն քայլափոխի զգում ենք:
Հ.Գ. 1. Ես ՀՅԴ կուսակցության անդամ չեմ: 2. Ցավով եմ գրում, որովհետև սա բանավեճի կամ շահարկումների թեմա չէ:

 Խ. Աբովյանի անվան մանկավարժական համալսարանի դասախոս, ԿԳՆ նախկին հասարակայնության հետ կապերի և տեղեկատվության վարչության պետ Արթուր Բաղդասարյանի ՖԲ գրառումը