Մոսկվան անցնում է հակագրոհի. Փաշինյանի վտանգավոր խաղի հետեւանքը

Մինչ Նիկոլ Փաշինյանը զբաղեցնում է լսարանին հեղափոխությունից հիասթափվածների ու չհիասթափվածների, Սերժի մնացորդների եւ նմանատիպ այլ թեմաներով, Հայաստանի ու Արցախի գլխին ամպեր են կուտակվում։

ՌԴ արտգործնախարար Սերգեյ Լավրովը հայտարարել է, որ նախորդ տարի Հայաստանի ու Ադրբեջանի արտգործնախարարների մասնակցությամբ ակտիվորեն քննարկվել է Ղարաբաղյան հակամարտության փուլային տարբերակը, ըստ որի պետք է տեղի ունենա տարածքների հանձնում՝ բաց կոմունիկացիաների դիմաց, այսինքն առաջին փուլում ենթադրվում է հայկական զորքերի դուրսբերում ԼՂՀ-ին հարակից որոշ տարածքներից։ Իսկ եթե ավելի պարզ՝ սա լավրովյան տխրահռչակ ծրագիրն է, որի մասին անցած տարիներին մամուլում բազում անդրադարձեր են եղել, իսկ պաշտոնական Երեւանն ու Մոսկվան էլ հերքել են:

Ինչեւէ, Հայաստանի արտգործնախարար Զոհրաբ Մնացականյանն անդրադարձել է Լավրովի հայտարարությանը՝ ասելով, թե փուլային տարբերակը քննարկվել է 2014 եւ 2016 թվականներին, եւ այն անընդունելի է հայկական կողմի համար: Մնացականյանը, սակայն, անհամոզիչ մի հերքում է ներկայացրել. «Նման մոտեցումներ ի հայտ են եկել 2014, 2016 թվականին, և այդ մոտեցումներն ընդունելի չեն եղել հայկական կողմերի համար։ 2018-ից ի վեր քննարկումները սահմանափակվել են առանձին տարրերի շուրջ՝ կողմերի մոտեցումների քննարկման, գնատահման վերաբերյալ: 2014թ-ին առաջարկված տարբերակն այսօր բանակցային սեղանի փաստաթուղթ չէ»:

Փաստորեն, չնայած ինչպես Մնացականյանն է պնդում՝ սեղանին չկա 2014-ի փուլային տարբերակը, բայց, այնուամենայնիվ, իր խոսքի տողատակերում հայտնում է, որ սեղանին դրված է կարգավորման այլ փաստաթուղթ, որի շուրջ ընթացել են բանակցություններ, ինչի մասին կտրականապես հերքում էր վարչապետ Նիկոլ Փաշինյանը: Ըստ էության, արտգործնախարարը հիմնովին չի հերքել Սերգեյ Լավրովին՝ աելով միայն, որ հայտնի փուլային տարբերակի շուրջ չեն բանակցել, ինչը դեռեւս չի նշանակում, որ նմանօրինակ այլ փաստաթղթի շուրջ է եղել բանակցությունը:
Նշենք նաեւ, որ Հանրապետական կուսակցությունը, ի պատասխան արտգործնախարարի հայտարարության, հակադարձեց, որ անցնող տասը տարիների ընթացքում ՀՀ իշխանությունները երբեւէ չեն քննարկել կարգավորման փուլային տարբերակը: <<2008-18թթ. ԼՂ հիմնախնդրի շուրջ բանակցությունները ՀՀ Սահմանադրության համաձայն` Հայաստանի արտաքին քաղաքականության ընդհանուր ղեկավարումն իրականացնող ՀՀ նախագահ Սերժ Սարգսյանը, ինչպես նաև արտաքին գործերի նախարար Էդվարդ Նալբանդյանը, մշտապես փոխհամաձայնեցված գործելով Արցախի իշխանությունների հետ, երբեք չեն քննարկել հիմնախնդրի լուծման փուլային տարբերակը, ավելին` այն համարել են անթույլատրելի, անիրագործելի և աներկբա մերժել են>> տեղեկացնում է ՀՀԿ-ն իր հայտարարությամբ:

Դե, ինչ, ամենեւին էլ անսպասելի չէ, որ Մոսկվան առաջ է մղում փուլային տարբերակը:
Ի հեճուկս Հայաստանի վարչապետի սին հայտարարությունների, թե հայ-ռուսական հարաբերություններն առավել քան երբեւէ փայլուն են, իրականությունը գորշ է ու
վտանգավոր:
Երկու տարի է Նիկոլ Փաշինյանն իր երկակի ստանդարտներով խաղում է Պուտինի նյարդերի վրա՝ սորոսացնելով երկիրը, կալանքի տակ պահելով նրա մտերիմ ընկերոջը, ՀՀ երկրորդ նախագահին ու անհաղորդ է Ռուսաստանից եկող բոլոր ազդակներին, Քոչարյանին ազատելու ուղղակի եւ անուղղակի ուղերձներին,
հեղափոխական ծիրում անցկացվեցին նաեւ Արցախի ընտրությունները եւ նախագահ ընտրվեց Փաշինյանի ոչ պաշտոնական խոսափող Արայիկ Հարությունյանը, կարճ ասած՝ հայաստանյան իշխանության բոլոր քայլերն ընդդեմ Ռուսաստանի են եւ այսքանից հետո սպասել, որ ռազմավարական դաշնակիցը պետք է պահպանի նախկին փոխհարաբերություններն, առնվազն անմեղսունակություն է: Ինչպես ասում են` եկել է քարերը հավաքելու ժամանակը, առաջին ծիծեռնակը գազի գնի թանկացման մասին հայտարարությունն էր, երկրորդը՝ փուլային տարբերակը, որն է լինելու հաջորդը, դժվար է ասել, բայց մի բան պարզ է, որ այս ամենը լավ տեղ չի տանում:

Անի Սահակյան