Նիկոլ Փաշինյանի թավշյա պրոբլեմը. «վնգստացող» դատավորներից մինչև հեղափոխությունից «փայ ուզողներ»
«Խորքային առումով Հայաստանում տեղի է ունենում մեծ հիասթափություն, որովհետեւ փայի բաժանում տեղի չի ունենում: Մաֆիոզ մտածողությունը մեր իրականության մեջ շատ մեծ է: Հիասթափված են բոլորը, նրանք, ովքեր հույս ունեին փայ ստանալ, նրանք, ովքեր
ուզում էին մեծացնեին իրենց փայը կամ վերցնել ուրիշի փայը: Ինձ շատ հաճախ բիզնեսմենները ասում են՝ ինչով կարող ենք օգտակար լինել, ես ասում եմ՝ աշխատեք, հարկերը վճարեք, իսկ նրանք զարմանում են, որովհետեւ 30 տարի այս երկրում իշխել է մաֆիոզ մտածողությունը՝ ինչ արտոնություններ ունես դու հասարակության մեջ»,- ասել է վարչապետ Նիկոլ Փաշինյանը երեկ ֆեյսբուքյան ուղիղ միացմամբ: Վարչապետի խոսքով՝ եկել է ժամանակը, որ իշխանության մեջ տեղի ունենան իրական զտումներ: «Կադրային ջարդ չի լինելու, բայց նա, ով չարաշահել է թավիշը, պետք է դուրս շպրտվի»,- ասաց նա:
Փաշինյանի խոսքով՝ հեղափոխությունից 2 տարի անց շատերն իրեն մեղադրում են թավիշի մեջ եւ նախկին կոռումպացված համակարգի աշխատողներին կադրային ջարդի չենթարկելու մեջ: Պետք է նկատել, որ եթե Փաշինյանի շրջապատում կան մարդիկ, ոորոնք վերջնագրեր են պահանջում, ապա դրանք թաքնված հականիկոլականներ են, որոնցից արժի զգուշանալ: Ասվածի մեջ իսկապես կա ճմարտություն, որովհետև հեղափոխությանը այս կամ այն չափով մասնակցած բազմաթիվ մարդիկ ուզում են ստանալ իրենց բաժինը այդ հեղափոխությունից: Քչերն են, որ այդ ստանալիքը պատկերացնում են արժեքների տիրույթում, ավելի մեծ պաշտոնի, բիզնեսի նյութեղեն այլ հատուցումների ակնկալիք ունեն, որը իրավացիորեն հնարավոր չէ բավարարել: Մեր երկրում ոչ այսքան շատ թվով պաշտոններ կան, ոչ էլ այդ չափի տնտեսական ռեսուրսներ:
Խոշոր հաշվով` ինչ է նշանակում «նրանք, ովքեր չարաշահել են թավիշը, պետք է դուրս շպրտվեն»: Կամ ինչ է նշանակում` շուտով գալու է «վնգստացող» դատավորների պատասխան տալու ժամանակը: Իր եթերի ժամանակ Նիկոլ Փաշինյանը կրկին անդրադարձել է դատավորների գործունեությանը և հայտարարել բառացիորեն հետևյալը. «Վնգստացող դատավորների հերթն է գալիս, որոնք «վեշերը» պիտի հավաքեն, հեսա Սահմանադրական դատարանի հերթը կգա՝ կորոնավիրուսային դատարանի, որոնք փրկվեցին և ժամանակ են շահում կորոնավիրուսի շնորհիվ։ Բոլորի հերթը գալու է։ Ես կասկածելու տեղիք չունեմ, ինձ ոչ մեկ չի կարող կանգնեցնել, բացի ժողովրդից»։
Եթե երկրի վարչապետը դատական համակարգի ներկայացուցիչների մասին խոսում է փողոցային բառամթերքով, էլ ինչ թավիշի մասին է խոսքը: Տեսնես ինչպես կզգար իրեն Փաշինյանը, եթե որևէ դատավոր օգտագործեր վնգստացող վարչապետ կամ վնգստացող իշխանական պատգամավոր արտահայտությունը: Որքան ժամանակ է պետք, որպեսզի Նիկոլ Փաշինյանը հասկանա, որ այն արտահայտությունները, որոնք կարելի է օգտագործել փողոցում, չի կարելի օգտագործել կառավարության շենքում` վարչապետի կաբինետում: Խոսքի նշաձողը կառավարման կուլտուրա է` տվյալ դեպքում շատ ցածրակարգ: Ինչքան ժամանակ է պետք Փաշինյանին` հասկանալու համար, որ նախկիններին ռեժիմով քննադատելուց իր ու երկրի խնդիրները չեն նվազում, և անկախ ամեն ինչից` պետության թիվ մեկ պատասխանատուն այսօր ինքն է, միայն ինքը:
Վերջապես կարելի է նաև հասականալ, որ ամեն օր Ֆեյսբուքով ուղիղ եթեր մտնելու անհրաժեշտություն չկա, դրա փոխարեն կարելի է լսել մասնագիտական կարծիքներ, վերլուծություններ և քննադատություններ: Լսել ու դրանցից հետևություններ անել և ոչ թե լայվի կոճակը սեղմել ու սկսել հոխորտալ, թե բա վեշերդ հավաքեք, թե չէ կծեփենք պատերին: Պետք է ստեղծել անհրաժեշտ աշխատանքային մթնոլորտ և հնարավորություն տալ, որ կայացվեն մասնագիտական որոշումներ:
Հայկ Դավթյան
Հետևեք մեզ Viber-ում
