Ճակատագրական բացթողում. ինչը չներվեց Մարգարիտային

Վարչապետ Նիկոլ Փաշինյանի վերջին՝ «ուղիղ եթերային ուղերձի» էպոպեան հանգուցալուծվեց եւ քիչ առաջ Հանրային հեռուստաընկերության գործադիր տնօրեն Մարգարիտա Գրիգորյանն աշխատանքից ազատման դիմում ներկայացրել։
Մի քանի օր է հանրությունն ակտիվ քննարկում էր վարչապետի
ելույթի նախապատրաստական հատվածի արտահոսքի թեման: Ուղիղ եթերի նախապատրաստական հատվածը, մոտ 20 րոպե տևողությամբ, հասանելի էր եղել Նիկոլ Փաշինյանի ուղերձը վերահեռարձակող մի շարք հայրենական հեռուստաընկերություններին: Հեռուստաընկերություններին ազատորեն մատուցվել է այդ նյութը, որի ընթացքում Նիկոլ Փաշինյանը հազում է, դեղ է խմում, փողոցը փակելու հրահանգ տալիս և այլն: Մեծ հաշվով, արտառոց շատ բան չկար, ընկալման հարց է: Մինչդեռ մի քանի օր է վարչապետի մամուլի խոսնակի եւ Հանրային հեռուստաընկերության միջեւ բառի բուն իմաստով առճակատում էր ընթանում՝ դա ո՞ւմ բացթողումն է, ո՞վ է մեղավոր, ինչպե՞ս կարելի էր այդ նյութը հասանելի դարձնել, որն էլ առիթ հանդիսացավ վարչապետի վերաբերյալ ծաղրական ու հեգնական ակնարկների: Մենամարտում, ինչպես նշեցինք հաղթող կողմ ճանաչվեց վարչապետի աշխատակազմը եւ Նիկոլ Փաշինյանը քաղաքական որոշում կայացրեց Հ1-ում իշխանափոխություն իրականացնելու:
Ընդ որում նման պահանջ էր ներկայացվել հանրության ակտիվ շրջանակների կողմից, վրդովված զանգվածները պահանջում էին ժամ առաջ հրաժեշտ տալ նախկին ռեժիմի քարոզչամեքենայի երբեմնի պատասխանատու Մարգարիտա Գրիգորյանին եւ յուր թիմին: Պահանջ, որն օրակարգ էր բարձրացել դեռեւս 2018 թվականի ապրիլյան հեղափոխությունից հետո այն հիմնավորմամբ, որ Հանրայինը ծառայում է ոչ թե հանրությանը, այլ նախկին իշխանության քարոզչական խոսափողն է դարձել: Չնայած 2018-ի հուլիսին չարաշահումների փաստով քրեական գործ հարուցվեց համաձայն որի, ՀԸ տնօրինություն բյուջեի հատկացումները նպատակային չէր օգտագործել, սակայն դա գրվեց սառույցին, քանզի նախկինների դասի կարկառուն ներկայացուցիչ Մարգարիտա Գրիգորյանին հաջողվեց հեղափոխական նոր մեկենաս գտնել ի դեմս փոխվարչապետ Մհեր Գրիգորյանի, ով նաեւ լուծեց Մարգարիտայի հետագա պաշտոնավարման հարցը:

Տիկինն էլ այնքան թեւավորվեց, որ սկսեց աջուձախ պարծենալ, հարցազրույցներ տալ՝ ասելով, թե ազատեցին իր պաշտոնից, քանի որ գնահատեցին իր պրոֆեսիոնալիզմը, եւ ինքը լավ վարչարարություն է իրականացնում… Թվում էր, թե հեղափոխությունից հետո Փաշինյանի առաջին կադրային փոփոխություններից մեկը պետք է լիներ Մարգարիտա Գրիգորյանի ազատումը, ի վերջո, նա այն ռեժիմի սպասարկուն էր, որի մասին վարչապետն առավոտից երեկո լայվ է անում, փռում ասֆալտին, ծեփում պատերին, բայց կյանքը ցույց տվեց, որ վարչապետն աչք փակեց այս ամենի վրա եւ վայելում էր այդ հեռուստաընկերությունան՝ իրեն միակ հերոս ներկայացնող գործելաոճը, եւ հանդուրժեց այնքան, քանի դեռ ինքը չդարձավ տիկնոջ ոչ պրոֆեսիոնալիզմի զոհը…

Այսպիսով՝ Մարգարիտա Գրիգորյանի պաշտոնանկությունը որքան անակնկալ, նույնքան սպասված էր հանրային լայն շրջանակների համար, նույնիսկ ուշացած, խնդիրն այստեղ երկակի վարչապետի դրսեւորած ստանդարտներն են: Ստացվում է, որ Նիկոլ Փաշինյանը ականջալուր է լինում հանրային դժգոհություններին եւ պահանջներին, երբ հարցն անձամբ իրեն է վերաբերում: Դիցուք անցած մոտ երկու տարվա ընթացքում մի քանի անգամ հանրային դժգոհության հզոր ալիք է բարձրացել, հատկապես ՊԵԿ-ում միլիոնանոց պարգեւավճարների առթիվ, երբ հայտնի դարձավ, որ միայն քարտուղարուհին 5-6 հազար դոլար պարգեւավճար է ստացել: Կրթության նախարարի դեմ ձմեռվա սառնամանիքին դաշնակցական երիտասարդների եւ ազգային արժեքների պահպանման ջատագովների օրեր շարունակվող բողոքի ակցիաները, նստացույցերը նույնպես նման հանգուցալուծում չունեցան, այլ հակառակը Փաշինյանը Հարությունյանին վերցրեց իր անմիջական պաշտպանության տակ: Գլխավոր դատախազ Արթուր Դավթյանի դեմ ցույցերը նույնպես չհանգեցրեցին վերջինիս հրաժարականին, իսկ քաղավիացիայի ոլորտը հիմնովին ավիրած Տաթեւիկ Ռեւազյանի դեպքում վարչապետը պարզապես անցավ հակագրոհի: Ավելորդ է խոսել առողջապահության նախարարի մասին:

Հիմա, երբ հարցն առնչվում է անմիջապես իրեն՝ իր փռշտալուն, հազալուն, դեղ խմելուն, այն դառնում է վարչապետի աշխատանքային շաբաթվա մեկնարկի առաջին որոշումը: Ի վերջո, մի հարց, այդուհանդերձ, մնում է չպարզաբանված՝ ի՞նչ աններելի մեղք է փռշտալը, հազալը, նույնիսկ դեղ խմելը, որի ցուցադրումը դարձավ ճակատագրական: Հարցը, միգուցե այն էր, թե ինչ դեղ էր խմում Փաշինյանը, ցանկացած մահկանացու դեղահաբ օգտագործում է եւ դրանում արատավոր ոչինչ չկա, միգուցե վարչապետը ոչ սովորական դեղ էր ընդունում ու դրա համար ցայտնոտի մեջ հայտնվեց ու վաղուց իրեն սիրելի դարձած Մարգարիտային ճանապարհ դրեց:

Անի Սահակյան