ՀՅԴ-ն բացահայտեց

Եվրոպայի խորհրդի խորհրդարանական վեհաժողովի Հայաստանի հարցով համազեկուցողների հետ հանդիպումից հետո ՀՅԴ խմբակցության ղեկավար Արմեն Ռուստամյանը ի թիվս այլ տեղեկությունների հայտարարել է, որ Ընտրական օրենսգրքի շուրջ կոնսենսուսի լայն հնարավորություն կա եւ փաստաթուղթ է այդ մասին պատրաստվում։Ըստ նրա` կոնսենսուսի լայն հնարավություն կա, բայց եթե ոմանք այդ հայտարարությունը չստորագրեն, պետք է իրենք բացատրեն` ինչու և հասարակությունը կորոշի: Ռուստամյանը կարծում է, որ ընդունված արձանագրումներն իրական այլընտրանք են  բոլոր խնդիրներին, որ բարձրացվում էր քաղհասարակության կողմից: «Այն, ինչ մենք տեսել ենք, բոլոր 5 պայմանները, որ նախապես ներկայացնում էին, դրանք բոլորը բավարարվել են և թող իզուր էստեղ բաներ չփնտրեն: Բանակցությունների փուլը կավարտվի, մենք կպնդենք, որ փաստաթուղթը հրապարակվի, իսկ ով չի միանա, թող իրենք բացատրեն, թե ինչու չեն միանում»,- ասաց Ա.Ռուստամյանը: «Հիմա կա հնարավորություն լայն կոնսենսուսի հասնելու: 4+4+4 ձեւաչափով աշխատել ենք եւ կարծում եմ՝ կա իսկապես հնարավորություն ունենալ Ընտրական մի օրենսգիրք, որը կբավարարի կողմերին: Դրա համար շատ կարեւոր է Եվրոպայի խորհրդի քաջալերումը այս պրոցեսին»։ Ռուստամյանի  հայտարարությունից  հետո Լեւոն Զուրաբյանից լրագրողները փորձեցին պարզել, թե ինչ կոնսենսուսի ու հայտարարության մասին է խոսքը։ ՀԱԿ պատգամավորն արձագանքեց. «Ես կարող եմ միայն ուրախությունս հայտնել, որ իշխող կոալիցիայի մեջ կան մարդիկ, ովքեր մտածում են կոնսենսուսի մասին: Ես լսել եմ, որ Արմեն Ռուստամյանն ինչ-որ բան է ասել, մինչեւ ես իր հետ անձամբ չճշտեմ ինքն ինչ է ասել՝ որեւէ մեկնաբանություն այդ թեմայով չեմ անելու»: ՀԱԿ խմբակցության ղեկավար Լևոն Զուրաբյանը հակառակը տեղեկացրեց, որ եվրոպացի գործընկերների հետ խոսել են նաև 4+4+4 ձևաչափից և եկել այն համոզման, որ կարևոր խնդիրը կոնսենսուսի ձևավորումն է: «Ես համազեկուցողներին առաջարկեցի, որ իրենք կենտրոնանան այդ գործի վրա»,- ասաց Զուրաբյանը: 4+4+4  ձեւաչափը առկախվել է շաբաթներ առաջ, այդ առիթով Լևոն   Զուրաբյանը հայտարարեց, որ քանի որ իշխանությունը չի ընդունում  ընդդիմության ու քաղհասարակության կողմից ներկաացրած հայտնի հինգ պահանջներից եւ ոչ մեկը,հետեւապես նպատակահարմար չեն գտնում շարունակել քննարկումները։ Դրանից հետո այլեւս նման քննարկումներ տեղի չունեցան։ Հիմա  ի՞նչ կոնսենսուսի մասին է հայտարարում Արմեն Ռուստամյանը, դժվար է ասել։ Սակայն կարելի է տրամաբանել, որ այդուհանդերձ որոշակի ստվերային գործընթաց է գնում, որը գաղտնի է պահվում հանրությունից։ Այլապես դժվար Արմեն Ռուստամյանը այդ մասին հայտարարություն աներ։ Կամ չի բացառվում, որ իշխանությունն այլ ֆորմատի քննարկումներ է ծավալում, որից դուրս է մնացել ՀԱԿ-ը ու որի մասին կիմանանք առաջիկայում։ Հակառակ դեպքում  ՀՅԴ խմբակցության ղեկավարը առանց որեւէ հիմքի նման հայտարարություն չէր անի։ Անի Սահակյան