Приз в студию!

Կորոնավիրուսին նվիրված հայտնի տեսաուղերձից մոտ մեկ ամիս առաջ Նիկոլ Փաշինյանը «Շանթ» հեռուստաընկերության «Հեռանկար» հաղորդաշարին տված հարցազրույցում հայտարարել էր, որ անպայման պարգևատրելու է կորոնավիրուսով վարակված առաջին հիվանդին` ճիշտ վարքագիծ ցուցաբերելու համար:

Փաշինյանը նաև նշել է, որ կորոնավիրուսի ստեղծած իրավիճակը Հայաստանում տնտեսական հեղափոխություն իրականացնելու նոր հնարավորություն է: «Հիմա կանխատեսվում է համաշխարհային տնտեսության փլուզում, դա իր ազդեցությունն ունենալու է նաև Հայաստանի վրա: Եթե նախկինում ասում էինք, որ տնտեսական հեղափոխություն ենք անում, 7-8% տնտեսական աճ ենք ունենալու, հիմա ասում ենք՝ եկեք այդ թվերը մոռանանք ու դնենք մի կողմ: Հիմա իսկապես եկել է տնտեսական հեղափոխություն անելու ժամանակը: Այս կորոնավիրուսը մեզ համար բացում է նոր հնարավորություններ: Վարչապետի պաշտոնում ընտրվելուց հետո անընդհատ մտածում էի նոր համակարգերի ստեղծման մասին, սակայն առկա էր լարվածություն, որ եղած որեւէ բան չփլուզենք, քանի դեռ չկա ստեղծված նորը: Հիմա ամեն ինչ փլուզվում է, եւ մենք ունենում ենք մի մեծ շինհրապարակ: Ասվածը, սակայն, չի ենթադրում, որ նախկինում եղած ամեն բան թողնվելու է ետևում: Սակայն մենք պետք է մտածենք այդ շինհրապարակում նոր կյանք, նոր պետություն, նոր հանրություն, նոր տնտեսություն, նոր հնարավորություն ունենալու մասին:
Ամենանվազագույն հաշվարկներով` աշխարհում ՀՆԱ-ի մոտ 2 տրիլիոն դոլարի անկում է լինելու: Սա նշանակում է, որ այդ դաշտում 2 տրիլիոն դոլարի թափուր հնարավորություն է լինելու: Եվ եթե այդ 2 տրիլիոնի մեջ Հայաստանը կարողանա 40 մլրդի տեղ ունենալ, ապա դա կնշանակի, որ մենք մեր ՀՆԱ-ն քառապատկում ենք: Այս նոր աշխարհում պետք է հասկանալ, թե որտեղ է պետք ներդրումներ անել, քանի որ արտադրական հարաբերությունները փլուզվելու են»,- ասել է Փաշինյանը:
Անցել է արդեն բավական ժամանակ, և առաջին վարակվածը, բնականաբար, արդեն առողջացել է: Իսկ որտեղ է վարչապետի կողմից նրան խոստացված պարգևատրումը` հայտնի չէ: Եթե իր տված հրապարակային խոստումների կատարման հարցում Փաշինյանը հետևողական լիներ, թերևս պարտավոր էր այդ մարդուն գտնել և տալ իր խոստացած պարգևը, ավելին` պարտավոր էր իր ուղերձոմ նրա մասին հիշատակում անել:
Փաշինյանն իր ուղերձում ոչ մի բան չասաց նաև տնտեսական հեղափոխության մասին: Նախկին ոգևորությունը, թե վարակի շնորհիվ տնտեսական թռիչքի նոր, բացառիկ շանս ենք ստանում, կարծես թե չկար: Հակառակը, վարչապետն անընդհատ խոսում էր կորոնավիրուսի հետևանքների չեզոքացման և տնտեսությունը չկանգնեցնելու մասին: Եվ ընդհանրապես, տնտեսական հեղափոխության մտքից վարչապետը համարյա հրաժարվել է. <<Մեր ռազմավարական խնդիրը, ըստ այդմ, հետեւյալն է. այնպես անել, որ վարակվածների թիվը լինի հնարավորինս քիչ եւ առողջապահական համակարգի համար տանելի: Մյուս կողմից մենք չենք կարող անվերջ փակված լինել եւ անվերջ ապրել կարանտինի կամ արտակարգ դրության պայմաններում:
Հետեւաբար մեր ռազմավարական խնդիրն է` ապրել կորոնավիրուսին զուգահեռ, ըստ անհրաժեշտության, նրա հետ համատեղ եւ արտակարգ դրության առաջիկա ժամանակաշրջանը մենք պետք է օգտագործենք հենց սրա համար անհրաժեշտ հմտություններ ձեռք բերելու նպատակով: Ի՞նչ է սա նշանակում գործնականում:
Մենք փուլ առ փուլ թույլատրում ենք տնտեսական գործունեության վերսկսումը զանազան ոլորտներում: Բայց հատուկ պատասխանատվություն ենք ակնկալում գործատուներից, ովքեր պետք է ապահովեն գործարաններում, արտադրամասերում, շինհրապարակներում կորոնավիրուսային անվտանգության հատուկ պայմաններ, հակառակ դեպքում մենք ստիպված կլինենք ոչ թե մեղմացնել, այլ խստացնել սահմանափակումները:
Այսօրվանից արդեն բոլոր տնտեսվարողները պետք է կորոնավիրուսային անվտանգության ապահովման պլաններ ունենան նաև իրենց՝ ապագայում վերաբացվելիք խանութների, սրճարանների, ռեստորանների համար, եւ կոչ եմ անում, խնդրում եմ կարանտինային առաջիկա ժամանակաշրջանն օգտագործել հենց այս խնդիրը լուծելու համար>>,- իր ելույթում նշել է նա:
Հավանաբար սկսել է գիտակցել, որ համավարակը ոչ թե նոր հնարավորություն է, այլ լրջագույն խոչընդոտ, որովհետև եթե կորոնավիրուսի առաջացրած տնտեսական շոկը երկարատև լինի, մեր նման պետությունները կարող են մնալ գլոբալ փլուզման փլատակների տակ: Այս պայմաններում ներդրողներ են պետք, որոնք Հայաստանում համարյա չկան: Հիմա պետք է մտածել ոչ թե նոր հեղափոխության, այլ ճգնաժամից քիչ կորուստներով դուրս գալու մասին: Բայց սա ռազմավարության խնդիր է և ոչ մի կապ չունի առաջին վարակվածին պարգևատրելու հետ:
Ինչպես կասեր հայտնի ռուս հաղորդավար Յակուբովիչը` Приз в студию:

Հայկ Դավթյան