Նիկոլ Փաշինյանի անուղերձ ուղերձը

Նիկոլ Փաշինյանի նախօրեի հեռուստաուղերձից այդպես էլ պարզ չդարձավ` ինչ նոր ուղերձ է փոխանցում վարչապետը ժողովրդին: Փաշինյանի խոսքում ոչ մի նոր բան չկար: Ընդհանուր տպավորություն էր, թե Փաշինյանը Նոր Տարվա ուղերձ է ասում` կորոնավիրուսի վերաբերյալ:
Նա իր խոսքում բառացիորեն կրակենց այն ամենը, ինչն ասում է վերջին մի քանի կառավարության նիստերի նախաբանում: Ճիշտ նույն բաները, որոնց մասին նա պատմում է իր ֆեյսբուքյան ուղիղ եթերների ժամանակ և ստատուսների մեջ: Փաշինյանը ամենյան մանրամասնությամբ պատմեց կորոնավիրուսի հետևանքները չեզոքացնելու նպատակով կառավարության կողմից ձեռնարկվող քայլերի մասին: Մեկ առ մեկ պատմեց 12 միջոցառումների մասին, որոնք բոլորը ամենայն մանրամասնությամբ ներկայացվել են կառավարության նիստերի ժամանակ: Վերջում էլ խորհուրդներ տվեց, որ պետք է սոցիալական հեռավորությունը պահել, դեմքին ձեռքով դիպչելուց առաջ անպայման ձեռքերը լվանալ, սպասք լվանալ` ապահովութան համար և լինել դուխով:
Կառավարության վերջին նիստի ժամանակ նա դժգոհեց տեղակատվական ՊՈԱԿ-ի աշխատանքից ու զայրացավ սոցապ նախարար Զարուհի Բաթոյանի վրա, թե հանրությանը լավ չեն իրազեկում կառավարության կորոնավիրուսային ծրագրերի մասին: Փաշինյանը անընդհատ կրկնում էր, որ մարդիկ տեղյակ չեն իրենց համար նախատեսված սոցիալական աջակցության ծրագրերից. «Շատ մեծ թվով մարդիկ տեղյակ չեն, որ իրենք հանդիսանում են այս կամ այն ծրագրի շահառու: Սա ազդակ է, որ մենք ԶԼՄ-ների միջոցով, սոցիալական ցանցերով, բավարար չափով չենք լուսաբանում, թե որ միջոցառումը կոնկրետ որ խմբին է վերաբերվում, և ինչ պետք է անի քաղաքացին այդ աջակցությունից օգտվելու համար», - դժգոհեց Նիկոլ Փաշինյանը և հանձնարարեց բոլոր ծրագրերը մանրամասն ու ամենօրյա ռեժիմով լուսաբանել: Հենց նույն օրը սոցապ նախարար Զարուհի Բաթոյանը և սոցապի մի քանի այլ պաշտոնյաներ կաշվից դուրս գալով էլ հարցազրույց ու ասուլիս տվեցին, հաղորդագրություն ու տեսանյութեր հրապարակեցին, կորնավիրուսի հետևանքերի չեզոքացմանն ուղղված բոլոր 12 միջոցառումների մասին պատմող հոլովակները 15 րոպեն մեկ պարբերականությամբ ցուցադրվում են բոլոր հեռուստաալաիքներով, առողջապահության նախարարության պատրաստած հոլովակները` ձեռքերը լվանալու և դիմակ կրելու մասին ևս անընդհատ ցուցադրվում են, բայց Նիկոլ Փաշինյանին էլի թվում է , թե իրենք ավելին են անում, քան հանրությունը տեղյակ է ու գնահատում է:
Ըստ ամենայնի` վարչապետի մեջ նորից գլուխ է բարձրացրել լրագրողը և նա որոշել է հանրային իրազեկման լրջագույն գործը բացի սեփական անձից, որևէ մեկին չվստահել: Հենց այդ նպատակով էլ որոշել էր ուղերձ հղել, որ մարդիկ իմանան, թե ինչ ծրագրեր է իրականացնում կառավարությունը կորոնավիրուսի ժամանակ:
Ճիշտ է `դասական իմաստով ուղերձի մեջ ոչ մի ուղերձ չկար, կար միայն հաշվետվություն, բայց դա արդեն ժանրի հետ կապված տեխնիկական դետալ է:

Հայկ Դավթյան