Բաբկեն Արարքցյանի մերձավորը, Տիգրան Սարգսյանի ու Արթուր Ջավադյանի հետնորդը

ԱԺ-ում այսօր կայացած քվեարկության արդյունքում ՀՀ կենտրոնական բանկի նախագահ է ընտրվել Մարտին Գալստյանը:

Քվեարկությանը մասնակցել է 119 պատգամավոր. կողմ է քվերակել 104, դեմ՝ 15 պատգամավոր: Հայտնի է, որ ԿԲ նոր նախագահը ԱԺ նախկին նախագահ Բաբկեն Արարքցյանի դստեր ամուսինն է: Նրա կինը` Աստղիկ Արարքցյանը, աշխատում է Համաշխարհային բանկի երևանյան գրասենյակում: Մարտին Գալստյանը նույնպես հանդիսանում է Համաշխարհային բանկի միջազգային խորհրդատու /դասախոս/:
Դասավանդում է Հայաստանի ամերիկյան համալսարանում: 2015 թ.-ին ճանաչվել է Հայաստանի ամերիկյան համալսարանի լավագույն դասախոս:
Ըստ կենսագրական տվյալների` Մարտին Գալստյանը 1994-1999 թթ. ուսանել է Երևանի պետական համալսարանի տնտեսագիտության ֆակուլտետում, այնուհետև ԲՈՒՀ-ի ասպիրանտուրայում՝ 2003թ. ստանալով տնտեսագիտության թեկնածուի գիտական աստիճան:

Այնուհետև սովորել է Հարվարդի համալսարանի Ջոն Ֆ. Քենեդու անվան հանրային կառավարման դպրոցում՝ ստանալով հանրային կառավարման մագիստրոսի կոչում: Աշխատել է կենտրոնական բանկում. ղեկավարել է ֆինանսական գործառնությունների վարչության միջազգային պահուստների կառավարմամբ զբաղվող ստորաբաժինը, այնուհետ ղեկավարել է վիճակագրության վարչությունը: 2015 թ.-ին նշանակվել է Դիլիջանի ուսումնահետազոտական կենտրոնի ղեկավար: 2018-ին, երբ նշանակվեց ՀՀ կենտրոնական բանկի խորհրդի անդամ, մամուլում հրապարակումներ եղան, որ նրա համար նախատեսված է ԿԲ նախագահի պաշտոնը:

Ստացվել է այնպես, որ հեղափոխական իշխանության կադրերը, որոնք` որպես Նիկոլ Փաշինյանի թիմակից, տարբեր ոլորտներում պաշտոններ ստացան, առանձնապես չեն հաջողել: Մարտին Գալստյանին վստահվել է ամենապատասխանատու և ամենապրոֆեսիոնալ ոլորտներից մեկը` բանկային համակարգը, որը մեր երկրում բավականին կայացած է: Ուզենք, թե չուզենք` փաստ է, որ բանկային համակարգը մեկ քայլ առաջ է տնտեսության իրական հատվածից, և այս իմաստով ԿԲ նախագահը գործ ունի կայացած և կանոնավոր աշխատող համակարգի հետ, որտեղ բացթողումները շատ ակներև են:
Հայաստանի բանկային համակարգի բարեփոխումները սկսվել են 2000-ականների սկզբից: Ֆորմալ առումով մեր բանկային համակարգը տեղայնացվել է և համապատասխանում է միջազգային չափանիշներին, ինչի մասին արձանագրված է տարբեր միջազգային զեկույցներում: ԿԲ ներկայիս նախագահ Արթուր Ջավադյանը իր նախորդից` Տիգրան Սագսյանից, բավականին լավ ժառանգություն է ստացել: Խոսքը ՀՀ նախկին վարչապետ, ԵԱՏՄ կոլեգիայի արդեն նախկին նախագահ Տիգրան Սարգսյանի մասին է, որը երկար տարիներ եղել է ՀՀ ԿԲ նախագահը և համարվում է Հայաստանում բանկային համակարգում տեղի ունեցած բարեփոխումների լավագույն իրագործողը: Բանկային համակարգում Տիգրան Սարգսյանի ավանդն իսկապես անուրանալի է:
Ներկայիս ԿԲ նախագահ Արթուր Ջավադյանն իր պաշտոնում վերընտրվել է երկու անգամ` 2008 և 2014 թվականներին` 6 տարի ժամկետով: Սահմանադրության համաձայն` նույն անձը չի կարող ավելի քան երկու անգամ անընդմեջ ընտրվել ԿԲ նախագահ: Արթուր Ջավադյանի բարեփոխիչի իմիջ չունի, սակայն համարվում է համակարգն իմացող մարդ: Մինչ ԿԲ նախագահ դառնալը նա Տիգրան Սարգսյանի տեղակալն էր: Պաշտոնավարման 8 տարիների ընթացքում Ջավադյանի բացթողումներն անշուևշտ շատ են եղել, բայց ընդհանուր առմամբ նրան հաջողվել է պահպանել ֆինանսաբանկային համակարգի կայնությունը և հնարավորինս խուսափել ցնցումներից: Ջավադյանի պաշտոնավարման առաջին շրջանը համընկավ 2008 թվականի գլոբալ ֆինանսական ճգնաժամի հետ: Այս ընթացքում աճեց թե' բանկային ընդհանուր պորտֆելը, թե' Հայաստանի արտաքին պարտքը, թե' ԿԲ պարտքը:
Մարտին Գալստյանին ևս հեշտ օրեր չեն սպասվում. կորոնավիրուսի համավարակով պայմանավորված` անխուսափելի ճգնաժամը պահանջում է առանձնակի ճկունություն և հմտություն` բանկային համակարգը պայթյուններից զերծ պահելու դրամի կուրսի և գների կայունությունը վերահսկելու առումով: Որքանով Մարտին Գալստյանին կհաջողվի այդ պատասխանատվությունը պատվով կատարել, ցույց կտա ժամանակը:

Հայկ Դավթյան