Իշխանությունը կրկին թիրախավորել է Ամենայն հայոց կաթողիկոսին. ովքեր են հակաքարոզ իրականացնողները

Երեկ՝ ապրիլի 14-ին, news.am լրատվականը հրապարակել էր Ամենայն հայոց կաթողիկոսի դիրքորոշումը Ռոբերտ Քոչարյանի խափանման միջոցի փոփոխության վերաբերյալ: Մայր Աթոռի տրամադրած հաղորագրության մեջ մասնավորապես ասվում էր. «…Հաղորդ լինելով նախագահի առողջության առնչությամբ բժիշկների մասնագիտական կարծիքներին, կարևոր ենք համարում, որ արդարադատության իրագործման հետ մեկտեղ ձեռնարկվեն բոլոր կանխարգելիչ միջոցներն ու միջոցառումները, այդ թվում՝ խափանման միջոցի փոփոխություն՝ համավարակի այս շրջանում ապահովագրելու նրան առողջական վիճակի հետագա բարդացումներից»:

Հայտարարությունը մեծ արձագանք ստացավ հանրության շրջանում, իսկ իշխանական շրջանակները դարձյալ թիրախավորեցին Գարեգին Երկրորդ կաթողիկոսին: Գործին լծվեցին նաև իշխանական քարոզիչները:

Կաթողիկոսի հայտարարությանը անդրադարձել է նաև վարչապետի մամուլի խոսնակ Մանե Գևորգյանը:

«Նախ հիշեցնենք, որ Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը մինչ այս եղել է Ռոբերտ Քոչարյանի հետ նույն` Մարտի 1-ի գործով անցնող, տարբեր հանցանքների, այդ թվում՝ առանձնապես խոշոր չափերով կաշառք տալուն և փողերի լվացմանն օժանդակելու մեջ մեղադրվող Սամվել Մայրապետյանի անձնական երաշխավորը։ Մայրապետյանը 2019-ի հունվարից բուժման պատրվակով մեկնել է երկրից և, չնայած քննչական մարմնի պահանջին, և ի հեճուկս Տեր Վահրամ քահանա Մելիքյանի երաշխավորությանը, չի վերադարձել Հայաստան։ ՀՀ կառավարությունը որևէ մեկնաբանություն չունի Վեհափառի ցանկությունների ու հույսերի վերաբերյալ, միևնույն ժամանակ ակնկալում ենք, որ Մայր Այթոռը կվերագնահատի Մայրապետյանի երաշխավորության պատմությունը և դրա հետևանքով առաջացած վիճակը»,- ասել է վարչապետի մամուլի քարտուղարը»:

Նման կոպիտ արձագանքն էլ հանդիսացավ իշխանությունների կողմից հարձակման գագաթնակետը:

Կաթողիկոսի հայտարարությանն անդրադարձել է ԱԺ փոխխոսնակ Ալեն Սիմոնյանը:

«Այսօր Ամենայն Հայոց Կաթողիկոս Գարեգին Բ-ն ասել է, որ կարևոր է համարում Ռոբերտ Քոչարյանի խափանման միջոցի փոփոխումը:

Ասեմ, որ հազարավոր ՀՀ քաղաքացիներ արդեն շատ երկար ժամանակ է կարևոր են համարում Ամենայն Հայոց Կաթողիկոսի փոփոխության հարցը»,- գրել է փոխխոսնակը:

Ալեն Սիմոնյանը բացահայտ անհարգալից և զրպարտչական վերաբերմունք է դրսևորել Ամենայն հայոց կաթողիկոսի նկատմամբ:

Հետ չեն մնում նաև մյուս պատգամավորները:

Օրինակ, իմքայլական պատգամավոր Արփի Դավոյանը կիսվել էր հայտնի ծաղրանկարով:

Մանրամասները` antifake.am