ՀՀՇ-ի «պոլի փետը» և Նիկոլ Փաշինյանի ընտրությունը

Կենտրոնական բանկի նախագահ Արթուր Ջավադյանի պաշտոնավարման ժամկետը լրանում է հունիսին: Ջավադյանը պաշտոնավարում է 2008-ից, իսկ Սահմանադրությամբ նույն անձը չի կարող ավելի քան երկու անգամ անընդմեջ ընտրվել ԿԲ նախագահ, սակայն 2015-ին նոր Սահմանադրություն է ընդունվել, եւ եթե Նիկոլ Փաշինյանը ցանկանար, Ջավադյանի ժամկետը կհաշվարկեր 2015-ից։ Սակայն Նիկոլ Փաշինյանը ծանրակշիռ պատճառ ունի Ջավադյանից հրաժարվելու, ԿԲ նոր նախագահ նշանակելու հարցում: Ինչու պիտի նա իր կողքին պահի նախկինից ժառանգություն մնացած Ջավադյանին, եթե իր <<կրուգում>> էլ ունի թեկնածու, կապ չունի՝ այդ թեկնածուն ունի մասնագիտական բարձր որակներ, կկարողանա այդ պատասխանատու պաշտոնում պատվով իրականացնել իր պարտականությունները: Կարեւորը, որ այս հարցում էլ գործելու է ՀՀՇ-ի հայտնի կարգախոսի հեղափոխական սկզբունքը՝ <<պոլի փետ լինի, ՀՀՇ-ական լինի>>: Այսպիսով՝ իշխանությունն ԿԲ ապագա նախագահի թեկնածուն ԿԲ խորհրդի անդամ Մարտին Գալստյանն է, նա ԱԺ նախկին նախագահ, ՀԱԿ անդամ Բաբկեն Արարքցյանի փեսան է, Արարքցյանը , ի դեպ, նախկինների կաստայի այն պաշտոնյաներից էր, ով սուսուփուս իր գործը տեսել է եւ ապահովել սեփական բարեկեցությունը պետական միջոցների հաշվին…
Այս շաբաթ խորհրդարանը կընտրի ԿԲ նախագահին:
ԿԲ նախագահի ընտրության ընթացակարգը հետեւյալն է․ Կենտրոնական բանկի նախագահին ԱԺ իրավասու մշտական հանձնաժողովի (ֆինանսավարկային եւ բյուջետային) առաջարկությամբ ընտրում է խորհրդարանը՝ պատգամավորների ընդհանուր թվի ձայների առնվազն 3/5-ով, 6 տարի ժամկետով:
Իսկ ԿԲ-ի մասին ՀՀ օրենքով ԿԲ նախագահը չի կարող լինել որեւէ կուսակցության ղեկավար մարմնի անդամ, զբաղվել քաղաքական գործունեությամբ, զբաղեցնել պետական այլ պաշտոն կամ կատարել վճարովի այլ աշխատանք, բացի գիտական, մանկավարժական եւ ստեղծագործական աշխատանքից:
Մարտին Գալստյանի նշանակումը հօդս է ցնդեցնում Նիկոլ Փաշինյանի ՝ Լեւոն Տեր-Պետրոսյանին ուղղված թվացյալ քննադատությունները եւ այս նշանակումը ՀԱԿ-ի եւ տերպետրոսյանական մյուս կադրերի՝ իշխանության մեջ ներդրվելու ծրագրի շրջանակներում է։
Նախկիններին անողոքաբար քննադատող Նիկոլ Փաշինյանը հետեւոականորեն շարունակում է նրանց գիծը եւ պաշտոններ տալիս ծանոթ-բարեկամ սկզբունքով: Հայաստանում բարձրակարգ ֆինանսիստների պակաս, վստահ ենք չկա , բայց ամեն մեկը չէ, որ ներկայիս իշխանության հետ ունի կապեր ու մտերմություն:

Անի Սահակյան