Էրդողանի անսպասելի ժեստը՝ Հայաստանին. Փաշինյանն առայժմ լռում է

Երկու տարի է անցել այն բանից, որ Հայաստանում իշխանափոխություն է տեղի ունեցել, և հայ-թուրքական հարաբերությունները ոչ միայն մնացել են նույն մակարդակում, այլև պաշտոնական Երևանն ու Անկարան պարբերաբար հանդես են եկել այնպիսի հայտարարություններով, որոնք բացառապես մեղադրանքներ են եղել՝ ուղղված միմյանց:

Իհարկե, այս հարցում մեծ դեր է խաղում ղարաբաղյան խնդիրը, որի վերաբերյալ Թուրքիան ունի հստակ ընդգծված ադրբեջանամետ դիրքորոշում և պարբերաբար օգնության է հասնում «եղբայրական» Ադրբեջանին:

Բայց ահա, երեկ Թուրքիայի նախագահը հանդես է եկել սենսացիոն հայտարարությամբ: Թուրքիայի նախագահ Ռեջեփ Թայիփ Էրդողանը պատրաստակամություն է հայտնել Հայաստանին դեղորայքի հարցում օժանդակություն ցուցաբերել։

Ինչպես հաղորդեց Ermenihaber.am-ը, այս մասին Էրդողանը հայտնել է Պոլսի հայոց պատրիարք Սահակ արք․ Մաշալյանի հետ ունեցած հեռախոսազրույցի ընթացքում։ Հայոց պատրիարքությունից ստացված տեղեկությունից պարզ է դառնում, որ զրույցը տեղի է ունեցել Էրդողանի նախաձեռնությամբ։ Էրդողանը նշել է, որ քայլեր են ձեռնարկվում դեղորայքի հարցում Հայաստանին օգնություն ցուցաբերելու համար։ Թուրքիայի նախագահն անդրադարձել է նաև Թուրքիայում գտնվող ՀՀ քաղաքացիների Հայաստան վերադառնալու խնդրին՝ նշելով, որ այդ հարցում դյուրացումներ են մտցվել։
Զրույցի ընթացքում Էրդողանը շնորհակալություն է հայտնել հայ համայնքին «Մենք մեզ բավարար ենք Թուրքիա» դրամահավաքին օգնություն ցուցաբերելու համար։
Նշենք, որ օրեր առաջ հայտնի դարձավ, որ Պոլսի հայոց պատրիարք Սահակ արք. Մաշալյանը միացել է Թուրքիայի նախագահ Ռեջեփ Թայիփ Էրդողանի «Ի՛մ Թուրքիա. մենք մեզ բավարար ենք» կարգախոսով դրամահավաքին։ Պատրիարք Մաշալյանը և մի շարք հայ հոգևորականներ, միանալով այդ արշավին, 100․000 թուրքական լիրա (752.000 դրամ) են նվիրաբերել։ Նրանք իրենց աշխատավարձերը փոխանցել են դրամահավաքի հաշվեհամարին։

Էրդողանը նշել էր, որ դրամահավաքի առաջին նվիրատուն կլինի անձամբ ինքը և իր 7 ամսվա աշխատավարձը փոխանցել էր հաշվեհամարին: Նա կոչ էր արել կառավարության բոլոր անդամներին, իր գլխավորած «Արդարություն և զարգացում» կուսակցության (AKP-ԱԶԿ) նահանգային կառույցներին, մեջլիսի պատգամավորներին, քաղաքապետարաններին, ինչպես նաև խոշոր գործարարներին ու բարերարներին, մասնակցել դրամահավաքին:

Այսպես, Թուրքիայում կորոնավիրուսի համավարակը լայն թափով ծավալվում է: Թուրքիայում կորոնավիրուսով վարակվածների թիվը վերջին 24 ժամում ավելացել է չորս հազարով, ընդհանուր Թուրքիայում 38 հազարից ավելի վարակված կա: Իսկ մահացածների թիվը հասել է 812-ի:

Ահա, այս պայմաններում պաշտոնական Անկարան, այն էլ՝ երկրի ղեկավարի մակարդակով Հայաստանին աջակցելու հայտարարություն է անում, այն էլ՝ Պոլսի հայոց պատրիարք Սահակ արք․ Մաշալյանի հետ ունեցած հեռախոսազրույցի ընթացքում:
Պաշտոնական Երևանն առայժմ չի արձագանքել Էրդողանի հայտարարությանը: Հայտնի չէ, կա՞ արդյոք որոշում՝ արձագանքելու, թե անտեսելու հարցում:

Բայց ինքնին Էրդողանի ժեստը խիստ հետաքրքրական է: Առհասարակ, աղետների ժամանակ պետությունների առաջնորդները նախևառաջ հիշում են իրենց բարեկամ երկրներին, իրենց երկրին օգնած պետություններին ու նրանց ղեկավարներին, այլ ոչ թե այն երկրներին, որոնց հետ անգամ դիվանագիտական հարաբերություններ չունեն, և այլ ավելին՝ բազմաթիվ խնդրահարույց հարցեր ունեն:

Ինչևէ, սպասենք Հայաստանի դիրքորոշմանը:

Մետաքսյա Շալունց