Կոնսենսուսը պոզով-պոչո՞վ է լինում

Եվրախորհրդի խորհրդարանական վեհաժողովի (ԵԽԽՎ)  մոնիտորինգի հանձնաժողովի Հայաստանի պարտավորությունների կատարման հարցով համազեկուցողներ Ալան Միլիի և Ջուզեպպե Գալատիի այցից առաջ արմատական ընդդիմության տիտղոսը կրող ՀԱԿ-ի ներկայացուցիչ Լևոն Զուրաբյանը հայտարարել է, որ Ընտրական օրենսգրքի նախագծի շուրջ կոնսեսուս չի ձեւավորվել, որի մասին ինքը պատրաստվում է ներկայացնել համազեկուցողներին: Մոնիտորինգի հանձնաժողովի Հայաստանի հարցով համազեկուցողները այսօր մեկնարկող այցի ընթացքում, ԵԽԽՎ-ի պաշտոնական կայքի փոխանցմամբ, Երևանում կքննարկեն սահմանադրական փոփոխություններին հաջորդած քայլերը, ընտրական բարեփոխումներն ու կոռուպցիայի դեմ պայքարին վերաբերող հարցեր։Բնականաբար, առավել մեծ ուշադրություն կդարձվի ԸՕ փոփոխությունների գործընթացին, որը ավարտին պետք է հասցվի մինչեւ հունիսի 1-ը, քանի որ նոր Սահմանադրությամբ է դա ամրագրված: «Բոլորը սպասում են կոնսենսուսի: Առանց կոնսենսուսի ոչ մի լավ զարգացում չի լինի ո՛չ Հայաստանում, ո՛չ էլ միջազգային հանրության կողմից: Չի ընկալվի: Դրա համար, այո, շատ կարևոր է, որ բոլորը հասկանան և իմանան, թե Ընտրական օրենսգրքի շուրջ կոնսենսուսի ձեռքբերման գործընթացը ինչ վիճակում է գտնվում», - ասել է  Զուրաբյանը՝ հիշեցնելով 4+4+4 ձեւաչափի մասին ու ընդգծելով, որ ընդդիմության, քաղհասարակության ու իշխանության միջեւ համաձայնություն չի կայացել, որը ընդունելի կլինի նաեւ հանրության կողմից: Դիտարկմանը, որ հարցի վերաբերյալ կոնսեսուս չկա նախեւառաջ ընդդիմության ներսում, կոնսեսուսի բացակայության վկայությունը ԸՕ նախագծի առաջին ընթերցմանը, մասնավորապես, ԲՀԿ-ի կողմ քվեարկությունն է, Զուրաբյանը չի համաձայնել՝ ասելով, որ ԲՀԿ-ն կողմ չէ ԸՕ նախագծին, կողմ են միայն ՀՀԿ-ն ու ՀՅԴ-ն: Հատուկ Լեւոն Զուրաբյանի համար հիշեցնենք, որ ԸՕ նախագծին Բարգավաճ Հայաստան խմբակցության պատգամավորների գերակշիռ մասը կողմ է քվեարկել, խմբակցության ընդամենը 4 պատգամավորներ՝Նաիրա Զոհրաբյանը, Միքայել Մելքումյանը, Վահե Էնֆիաջյանը եւ Լյովա Խաչատրյանը ձեռնպահ քվեարկեցին։ ԲՀԿ խմբակցությունից դեմ քվեարկեց «Ալյանս» կուսակցության նախագահ Տիգրան Ուրիխանյանը: Նախկին արտգործնախարար Վարդան Օսկանյանի նորաստեղծ «Համախմբում» կուսակցության պատգամավորները թեպետ կոշտ քննադատեցին քննարկման ժամանակ, սակայն միայն Վարդան Օսկանյանը դեմ քվեարկեց։ Վահե Հովհաննիսյանը, Էլինար Վարդանյանն ու Ստեփան Մարգարյանը չմասնակցեցին քվեարկությանը։ Ձեռնպահ էր նաեւ Թեւան Պողոսյանը։ Իսկ ընդդիմադիր պատգամավորներ Ռուբիկ Հակոբյանը, Ալիկ Արզումանյանը, Լյուդմիլա Սարգսյանը  «կողմ» քվեարկեցին: Քվեարկությանը չմասնակցեցին ՕԵԿ խմբակցության պատգամավորները։ Դեմ քվեարկեցին ՀԱԿ խմբակցության  պատգամավորները, անկախ պատգամավոր Էդմոն Մարուքյանը, Զարուհի Փոստանջյանը։ Ում համար պարզ չէ, որ բոլոր նրանք, ովքեր չմասնակցեցին քվեարկությանը, միայն այն պատճառով, որպեսզի հնարավորինս քիչ թվով  <<դեմ>> ձայներ գրանցվի ԸՕ նախագծի շուրջ, իշխանությունն էլ ստիպված չլինի բացատրություններ ներկայացնի դրա առիթով: Կոնսեսուսը պոզով-պոչո՞վ է լինում, այլ հարց է, որ ոմանք չեն ցանկանում գնալ ինքնասպանության ու բացահայտ հայտարարել, որ կողմ են իշխանության ցանկացած ձեռնարկին, միայն թե ստանան երաշխիքներ, որ հաջորդ խորհրդարանում իրենք եւս ներկայացված կլինեն իբրեւ իշխանության հավատարիմ գործըկերներ: Անի Սահակյան