ԵՄ-ն և Թուրքիայի միջև կնքված փախստականների վերաբերյալ համաձայնագիրը կարող է տապալվել

Գերմանիայի կառավարությունը չի բացառել, որ Եվրամիության և Թուրքիայի միջև կնքված փախստականների վերաբերյալ համաձայնագիրը կարող է տապալվել: Երեքշաբթի Գերմանիայի ներքին գործերի նախարար Թոմաս դե Մեզյերը հայտարարել էր, որ Թուրքիայի նախագահը «պատրաստ չէ համապատասխանել բոլոր չափանիշներին»։ «Իսկ եթե պատրաստ չէ, ապա չի լինելու ոչ մի անայցագրային ռեժիմ»,-ասել է դե Մեզյերը։ Պարբերականը հիշեցնում է, որ Թուրքիայի և ԵՄ-ի միջև վիզային ռեժիմի չեղարկումը փախստականների հարցով համաձայնագրի անքակտելի մասն է։ Բացի այդ, նա խստորեն կոչ է արել Թուրքիային կատարել 72 պայմանները, որոնց թվում է նաև թուրքական հակաահաբեկչական օրենսդրության փոփոխությունը։ Եվրոպական խորհրդարանը ևս դեռ պատրաստ չէ հաստատել առանց վիզայի ռեժիմը։ Եվրախորհրդարանի մամուլի քարտուղարը նշել է, որ քանի դեռ Թուրքիան այդ պահանջները չի կատարել, պատգամավորները նույնիսկ չեն սկսի հարցի քննարկումը։ Նախագահ Ռեջեփ Թայիփ Էրդողանը քննադատել է ԵՄ-ի պահանջը՝ հակաահաբեկչական օրենսդրությունը փոխելու վերաբերյալ, և հույս է հայտնել, որ հունիսի փոխարեն, ինչպես պլանավորված էր ավելի վաղ,  վիզային ռեժիմը կչեղարկվի «ամենաուշը հոկտեմբերին»։ «Եվրամիության և Թուրքիայի միջև կնքված փախստականների համաձայնագրին վտանգ է սպառնում այնտեղից, որտեղից չէին սպասում։ Եվրախորհրդարանը մերժել է խորհրդակցություններ անցկացնել թուրքերի համար վիզաների չեղարկման հարցով»,-գրում էDer Spiegel-ը։ Համապատասխան որոշումը, համաձայն ներքին տեղեկությունների, ընդունվել էր դեռևս անցյալ շաբաթ՝ քաղաքական խմբակցությունների ղեկավարների շրջանակներում։ Սոցիալ-դեմոկրատները, պահպանողականներն ու լիբերալները հստակ պայմանավորվածության են հասել և հայտարարել են՝ եթե Անկարայի քաղաքական կուրսի փոփոխություն չլինի, ոչ մի վիզաների չեղարկում էլ չի լինելու։ «Եթե Էրդողանը չփոխի տեսակետն այդ հարցի շուրջ, Եվրախորհրդարանն առանց վիզայի ռեժիմ սահմանելու որոշում չի կայացնի»,- հայտարարել է քաղաքացիների ազատության ու արդարադատության հանձնաժողովի համակարգող, սոցիալ-դեմոկրատ Բիրգիթ Զիպելը։