Բոլորի թեկնածուն Արցախում՝ ցնցումային մահակը գլխավերևում

Ստեփանակերտում ապրիլի 5-ին Արցախի հեղափոխական կուսակցությունը բողոքի ակցիա է կազմակերպել: 150-200 հոգանոց բողոքի ցույցի «սորոսական» համարվող շրջանակները ձգտում են «գերան» դարձնել, թե՝ տեսեք, ժողովուրդը չի համակերպվում ընտրությունների արդյունքների հետ... Ցույցի մասնակիցները պահանջել են, որպեսզի չեղարկվեն Արցախում տեղի ունեցած նախագահական ընտրությունների արդյունքները, դժգոհել են թե՛ Արայիկ Հարությունյանից, թե՛ Արցախի գործող իշխանություններից։

Սակայն զարգացումների նման ընթացքը պարզ էր ի սկզբանե, դրա մասին ավելի վաղ գրել էինք, որ Հայաստանի իշխանության սորոսական թևը Արցախն անհանգիստ պահելու ուղղությամբ շարունակելու է «ջանքեր» գործադրել:

Առհասարակ, արցախյան ընտրությունների ընթացքն ու արդյունքները բոլորովին անսպասելի չէին, ավելին՝ դրանք խիստ սպասված էին: Ամեն ինչ ընթացավ իր հունով, ծրագրված սցենարով: Միայն այն փաստը, որ Մասիս Մայիլյանը կոչ է անում իր ընտրողներին չմասնակցել ընտրություններին, սակայն ոչ մի դիմում չի ներկայացրել ԿԸՀ, չի հանում թեկնածությունը, նշանակում է նա էլ է հաշտվել՝ Հայաստանի իշխանության ձեռքում գործիք դառնալու իր դերակատարման և Արայիկի Հարությունյանի փաստացի հաղթանակի ու իր պարտության հետ:

Արցախի Սահմանադրության երկրորդ փուլում Արցախի նախագահ է ընտրվում այն թեկնածուն, որին կողմ են քվեարկել առավել թվով ընտրողներ: Այսինքն, ապրիլի 14-ին քվեաթերթիկում կլինեն երկու անուններ, ընտրված կհամարվի առավելագույն ձայներ ստացած թեկնածուն: Այսպիսով, Արայիկ Հարությունյանը ընտրություններից հետո կդառնա լիովին հաղթանակած թեկնածու՝ ի շնորհիվ նաև Մասիս Մայիլյանի:
Ընդհանրապես, այսօր արդեն կարող ենք արձանագրել, որ Նիկոլ Փաշինյանը հրաշալի սցենար գործի դրեց: Այսօր հաղթող թեկնածուն բոլորի համար ձեռնտու թեկնածու է՝ և Հայաստանի իշխանության, և Արցախի իշխանության, և նույնիսկ Հայաստանի նախկին իշխանության համար՝ Սերժի Սարգսյանի գլխավորությամբ:

Արայիկ Հարությունյանը, եթե կուզեք, կլինի բոլորի համար ընդունելի ու ցանկալի թեկնածու՝ և՛ Նիկոլ Փաշինյանի, ե՛ւ Սերժ Սարգսյանի համար:

Փաշինյանը Մասիս Մայիլյանի գործոնը խաղի մեջ դրեց, որպեսզի բավարարի «սորոսական թևի» ակնկալիքները: Սակայն ի սկզբանե Փաշինյանը գիտեր, որ հաղթող թեկնածուն Արայիկ Հարությունյանն է, ոչ թե Մասիս Մայիլյանը: Հիմա, նա կարող է հանգիստ ցույց տալ սորոսականներին, որ փորձեցինք, բայց չստացվեց, Մասիս Մայիլյանը չդարձավ հաղթող թեկնածու:

Իսկ Արայիկ Հարությունյանը, որը ևս չէր զլանում իր հավատարմությունը ցույց տալ Նիկոլ Փաշինյանին, կիսելով և համաձայնելով նրա բոլոր դիրքորոշումների հետ, արդյունքում հայտնվեց ամենաշահեկան վիճակում:

Բայց Արայիկ Հարությունյանին էլ միշտ «կապույտ երկինք» չի սպասում: Արցախում ցնցումերի դրդող ուժերը դարձյալ Նիկոլ Փաշինյանի իմացությամբ և աջակցությամբ ցանկացած պահին կարող են բարդություններ ստեղծել Արայիկ Հարությունյանի համար: Հենց դրանով է պայմանավորված այն հանգամանքը, որ երկրորդ փուլից առաջ այսօր արդեն իսկ սկսել են սակավաթիվ մարդկանց մասնակցությամբ բողոքի ցույցեր անցկացնել Ստեփանակերտում:

Այնպես որ, Արայիկ Հարությունյանին էլ խաղաղ օրեր չեն սպասում, «սորոսական» մահակը միշտ նրա գլխավերևում է լինելու, թեև նա լավ է տիրապետում բոլորին դուր գալու և բոլորի սիրտը շահելու գործիքակազմին:

Մետաքսյա Շալունց