Վիտալի Բալասանյանը Արցախի անվտանգության միակ երաշխավորն է. Դավիթ Շահնազարյան. տեսանյութ
Ապրիլյան պատերազմի օրերին ես ևս մեկ անգամ համոզվեցի, որ այս սերունդը պատրաստ է կրկնել իր պապերի հերոսությունը: Ցավոք սրտի, ապրիլյան քառօրյայի էջը դեռևս փակված չէ։ Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է քաղաքագետ Դավիթ Շահնազարյանը՝ անդրադառնալով 4 տարի առաջ տեղի ունեցած ապրիլյան քառօրյա պատերազմին։
Շահնազարյանի խոսքով՝ այս իշխանությունը փորձում է ցեխ շպրտել 2016-ի ապրիլի հերոսական հաղթանակի վրա. «Մենք պետք է ցույց տանք, որ ապրիլյան քառօրյան ոչ պակաս հաղթանակ էր, որքան արցախյան հերոսամարտը»:
Դավիթ Շահնազարյանը նշեց՝ հույս ունի, որ բոլորին է ծանոթ ապրիլյան պատերազմում Վիտալի Բալասանյանի ավանդը. «Ապրիլյան պատերազմի հենց գիշերը Վիտալի Բալասանյանը, լինելով Ազգային ժողովի պատգամավոր, ստանձնեց կենտրոնական պաշտպանական շրջանի հրամանատարությունն ու ջախջախեց թշնամուն, հետ շպրտեց»: Նրա խոսքով՝ այսօր Թալիշն անճանաչելի է Բալասանյանի շնորհիվ, ով նպատակ էր դրել այն վերաբնակեցնելու:
Մոտ երկու տարի առաջ Ազգային ժողովում ստեղծվեց «Ապրիլյան քառօրյա պատերազմի քննիչ հանձնաժողով», որը պետք է քննի այս պատերազմի հանգամանքները: Հարցին՝ ինչպե՞ս է վերաբերվում այս հանձնաժողովին, Դավիթ Շահնազարյանը պատասխանեց. «Դասալիքներից կազմված այս իշխանությունը մերժում և ստորացնում է մեր նորագույն պատմությունը: Ըստ էության՝ այս իշխանությունը պայքարում է իրականության դեմ, որի դրսևորումներից մեկն էլ նման հանձնաժողով ստեղծելն է»:
Հիշեցնենք, որ այս հանձնաժողով են հրավիրվում այն մարդիկ, ովքեր ապրիլյան քառօրյա ընթացքում եղել են սպայական հրամանատարության կազմում: Հանձնաժողով էր հրավիրվել նաև ՀԱՊԿ նախկին գլխավոր քարտուղար Յուրի Խաչատուրովը, ով հրաժարվել էր ներկայանալ:
Դավիթ Շահնազարյանը խորհուրդ տվեց մյուս սպաներին ևս չներկայանալ այս հանձնաժողով. «Կոչ եմ անում՝ Յուրի Խաչատուրովի նման թքել այս հանձնաժողովի վրա, որովհետև այս հանձնաժողովը քաղաքական պատվեր է կատարում»:
Անդրադառնալով Արցախում անցկացված համապետական ընտրություններին և հարցին՝ ինչու՞ Արցախում, որտեղ կարևորն անվտանգությունն է, Վիտալի Բալասանյանը բավականին քիչ ձայներ հավաքեց, Դավիթ Շահնազարյանը պատասխանեց. «Ցավոք սրտի, Արցախում էապես բթացել էր անվտանգության հարցը: Բայց մի բան կառանձնացնեմ՝ Հայաստանում տարբեր գրանտերի «վրա» նստած որոշակի կազմակերպություններ փորձում էին իջեցնել Արցախի սուվերենությունը՝ փորձելով ստվերել Արցախի նախագահական ընտրությունների լեգիտիմությունը»:
Դավիթ Շահնազարյանն ընդգծեց նաև, որ ոչ մի պարագայում Արցախում կայացած նախագահական ընտրություններն ու արցախցու ընտրությունը որևէ մեկը չի կարող կասկածի տակ դնել. «Նիկոլ Փաշինյանը «քիթը խոթում էր» Արցախի ներքաղաքական կյանքին՝ իր կոչերով փորձելով նեգատիվ կերպով ազդել ընտրությունների արդյունքի վրա ու այս ամենով հանդերձ՝ Վիտալի Բալասանյանը ստացավ քաղաքականապես կարևոր ձայներ»:
Հետևեք մեզ Viber-ում
