Հայաստան-Վրաստան. արտակարգ և կարանտինային զուգահեռներ

Հարևան Վրաստանը մարտի 31-ից համապետական կարանտին է հայտարարել` խիստ պայմաններով: Վրաստանի ողջ տարածքում դադարեցվում է հասարակական տրանսպորտի, այդ թվում՝ Թբիլիսիի մետրոպոլիտենի աշխատանքը:

Երեկոյան ժամը 9-ից մինչև առավոտյան 6-ը երկրի տարածքում պարետային ժամ է սահմանվում, արգելվում է տնից դուրս գալ, օգտվել անձնական ավտոտրանսպորտից: Պարետային ժամից դուրս անձնական մեքենաները կարելի է օգտագործել, սակայն դրանց ուղևորների թիվը չպետք է գերազանցի երեքը: Որևէ փակ տարածքում, բացառությամբ դեղատների և պարենային խանութների, ևս չպետք է երեք հոգուց ավելի մարդ հավաքվի: Բացի այդ, Վրաստանի կառավարության որոշմամբ, 70-ն անց անձանց ընդհանրապես չի թույլատրվում տնից դուրս գալ: Նրանք կարող են կարճ ժամանակով` միայն խանութ և դեղատուն գնալ: Այս որոշումը կայացվել է այն բանից հետո, երբ վարակվածների թիվը հատեց 100-ի սահմանագիծը: Իսկ ապրիլի 1-ի դրությամբ` վարակվածների թիվը 117 է:

Վրաստանի իշխանությունները մոբիլիզացրել են երկրի բոլոր ուժային կառույցները, համատեղ ոստիկանա-զինվորական ստորաբաժանումներ են ստեղծվել: Վրաստանում հայտարաված արտակարգ դրության նշանակալի առանձնահատկությունն այն է, որ լրատվամիջոցների նկատմամբ որևէ սահմանափալում չի կիրառվում: Վրաստանի տարածքային զարգացման և ենթակառուցվածքների նախարար Մայա Ցքիտիշվիլիի հայտարարության համաձայն, եթե բնակչությունը շարունակի չպահպանել սոցիալական հեռավորությունը, կորոնավիրուսի տարածման կանխարգելման նպատակով կառավարությունը ստիպված կլինի երկարաձգել արտակարգ դրությունը: Նրա խոսքով` դա նաև մեծ հարված կհասցնի երկրի տնտեսությանը:

Զուգահեռաբար հարևան երկրի կառավարությունը ձեռնակում է մի շարք քայլեր` բնակչության սոցիալական վիճակի թեթևացման համար: Կորոնավիրուսի տարածման հետևանքով ստեղծված իրավիճակից ելնելով` որոշում է կայացվել քաղաքացիների կոմունալ վճարումները մարելու վերաբերյալ: Մայա Ցքիտիշվիլին հայտարարել է, որ Վրաստանում կա 1 200 000 տնտեսություն, որոնք ամսական 200 կՎտ/ժամ էլեկտրաէներգիայից պակաս են սպառում: Կարանտինով պայմանավորված` պետությունը կվճարի նրանց մարտ, ապրիլ և մայիս ամիսների վճարները: Այս մասին ասել է Տարածաշրջանային զարգացման և ենթակառուցվածքների նախարարը:
Պետությունը կփոխհատուցի նաև ամսական մինչև 200 մ/3 բնական գազ սպառող մոտ 671 000 ընտանիքների վճարները: Իսկ ապրիլ ամսվա թոշակը վճարվել է նախապես:
Բացի այդ` կառավարությունը մտադիր է 2 մլրդ լարի հատկացնել տնտեսությանը աջակցելու համար: Իսկ 9 հիմնական պարենային ապրանքների գները կառավարությունը ապահովագրում է:

Վրաստանի Կառավարության մարտի 26-ին տարածած հաղորդագրության մեջ նշվում է, որ բնակչությունը պետք է ապահովված լինի պարենային 9 հիմնական ապրանքով` բրինձ, մակարոն, արևածաղկի ձեթ, ցորենի ալյուր, շաքարավազ, ցորեն, կաթ, հնդկաձավար և լոբի: Այս ապրանքների մատակարարումը պետք է չդադարի, իսկ գները չպետք է բարձրանան: Այդ նպատակով նոր ծրագիր է մշակվել. այն կազմակերպությունները, որոնք մարտի 15-ից մայիսի 15-ը կներկրեն վերոնշյալ 9 ապրանքները, պետության կողմից սուբսիդիա կստանան, որպեսզի գները չբարձրացնեն: Պետության պատվերով կատարվում է նաև բժշկական պաշտպանիչ դիմակների արտադրություն, որը բաժանվում է նրանց, որոնք աշխատանքային պարտականություններից ելնելով` ամենօրյա ռեժիմով շփվում են այլ քաղաքացիների հետ:

Եթե համեմատելու լինենք Հայաստանում հայտարարված արտակարգ դրության պայմանների և պետության ձեռնարկած սոցիալական քայլերի հետ, պետք է արձանագրենք, որ հարևան պետության քայլերն ավելի հասցեական են և կոնկրետ ուղղված դեպի խոցելի խավի քաղաքացին: Սա այն դեպքն է, երբ պետք է հարևանից օրինակ վերցնել և փորձը տեղայնացնել: Գոնե նպաստառու ընտանիքների երկու ամսվա կոմունալ վարձերի փոխհատուցման քայլին գնալը պետության ուղղակի պարտավորությունն է: Հայաստանը 30 տոկոս աղքատություն ունի, որի պայմաններում անիմաստ է հաշվարկներ անել, թե մարտի 14-ից մարտի 25-ն ընկած ժամանակահատվածում քանի մարդ է աշխատանք կորցրել, որ նրանց 100 հազար դրամ մեկանգամյա աջակցություն տրվի: Սա իրավիճակի ոչ ադեկվատ ընկալում է, որովհետև 30 տոկոս աղքատները առանց այդ էլ խոցելի էին, կարանտինի պայմաներում նրանք ուղղակի դատապարտված են սովի մատնվել:

 Հայկ  Դավթյան