Նիկոլ Փաշինյանը «հուղարկավորեց» սեփական թիմին

Կորոնովիրուսը վերջնականապես ախտահարեց իշխանություններին եւ վերջին օրերի իրադարձություններից հետո կարելի է ասել իշխանությունը կնքեց իր մահկանացուն, ավելի ճիշտ Նիկոլ Փաշինյանն իր ձեռքով սպանեց իր քաղաքական հենարանը՝ իշխող Իմ Քայլը ֆրակցիան: Այն, ինչ կատավրում էր խորհրդարանում, պարզապես արկածային մի երազ էր թվում, որ ուր որ է արթնանալու ենք եւ տեսնենք, որ իրականում իշխանությունն այնդքան էլ անմեղսունակ չէ, որքան մենք նրա մասին մտածում ենք: Բայց ավաղ, այդ մղձավանջային իրականությունը ձգվեց մինչեւ ուշ երեկո ու բոլորի աչքի առաջ տեղի ունեցավ Հայաստանում ժողովրդավարության հուղարկավորությունը: Ինչպես գիտենք կառավարությունը կորոնավիրուսի պայքարի պատրվակով տոտալ հսկողության նախագիծ է մշակել, վերահսկելու են քաղաքացիների խոսակցությունները, զանգերը, տեսնելու են ով ում հետ, որ ժամին եւ որքան խոսել: Որքանով է արդյունավետ լինելու այս գործիքը կորոնավիրուսի դեմ, երկու օր շարունակ որեւէ իշխանական հիմնավոր պարզաբանում չտվեց, եթե չասենք եղան հակառակ կարծիք պնդողները: ԱԺ առողւապահության հանձնաժողովի նախագահ Նարեկ Զեյնալյանը մի քանի անգամ շեշտեց, որ զրոյական էֆեկտ է ունենալու: Պետք է նշել, որ նա այս մասին հայտարարեց այն պահին, երբ նախագիծը նոր-նոր ներկայացվել էր քննարկման: Տտեսանք նաեւ, որ առաջին անգամ այն տապալվեց, Նիկոլ Փաշինյանը երկրորդ արտահերթը հրավիրեց եւ կեսգիշերին մոտ ընդունեց նախագիծը, ինչը խոսում է այն մասին, որ նա պատրաստ է ցանկացած մեկի տրորել, ոչնչացնել՝ իրականացնելու համար իր նպատակները: Այսպիսով՝ ինչ արձանագրումներ կարելի է անել կատարվածքից: Առաջինը, անշուշտ այն է, որ Նիկոլ Փաշինյանը պատեհ պահին ի ցույց դրեց իր իսկական՝ բռնապետական դեմքը եւ վիրուսի դեմ պայքարելու պատրվակով ոտնահարեց մարդու հիմնարար իրավունքները:
Երկրորդ՝ ի հեճուկս Նիկոլ Փաշինյանի հավաստիացումների, թե իր թիմում թեւեր ու ոտքեր չկան, նույնիսկ պետության համար այս ճգնաժամային իրավիճակում իշխանական խմբավորումները զերծ չմնացին անձնական հաշիվներից: Առաջին փորձով նախագիծը չընդունվեց, քանի որ ըստ տարածված տեղեկությունների Արարատ Միրզոյանն էր այդպես ուզում: Դրա վկայությունն էլ այն էր, որ ԱԺ խոսնակի հովանավորյալ պատգամավոր Աննա Կարապետյանը ներկա գտնվելով նիստերի դահլիճում, չմասնակցեց քվեարկությանը:
Երրորդ, եւ ամենակարեւորը՝ Նիկոլ Փաշինյանն անխնա մսխեց  իր քաղաքական կապիտալը, այն հենարանը, որն իրեն առաջադրել է վարչապետի պաշտոնում: Այս երկու օրերի ընթացքում իմքայլական պատգամավորների տրանսֆորմացված ելույթները պարզապես կարեկցանքի էին արժանի: Մեկ օր առաջ նախագիծը քննադատողներին ամենայն հավանականությամբ կառավարությունում այնպես էին մշակել, որ հաջորդ օրը սազն առել ու գովում էին նախագիծը, թե բա մեկ գիշերվա մեջ քննարկեցինք ու հասկացանք իրական նպատակները:
Այս նիստից ու իշխանականների անլուրջ ու անբարտավան պահվածքից հետո չի գտնվելու որեւէ բանական մարդ, որն այսուհետ լուրջ կվերաբերի այս խորհրդարանին: Միգուցե Նիկոլ Փաշինյանի ուզածն էլ հենց դա է եւ նա նոր խորհրդարան է ուզում ձեւավորել:

Անի Սահակյան