Փրկել Նիկոլին. Իմ քայլը սթափվում է

Արտակարգ ռեժիմի պայմաններում քաղաքացիներին գաղտնալսելու, հեռախոսային զանգերը ֆիքսելու և տեղորոշելու վերաբերյալ օրինագիծը խորհրդարանում տապալվեց: 
Երկրորդ ընթերցմամբ և ամբողջությամբ քվեարկության էր դրված «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» օրենքների փաթեթում փոփոխություն կատարելու Կառավարության առաջարկը, որը նախօրեին թեժ քննադատվել էր ԱԺ-ում:
Մինչ քվեարկությունը` վարման կարգով խոսեց «Լուսավոր Հայաստան» խմբակցության ղեկավար Էդմոն Մարուքյանը և կոչ արեց ԲՀԿ-ին չմասնակցել քվեարկությանը, որպեսզի քվեարկությունը տապալվի: Քաղաքական մեծամասնությունն այս պահին դահլիճում ուներ 65 պատգամավոր, հետևաբար անհրաժեշտ թվով քվեներ չէր կարող ստանալ: Այդպես էլ եղավ` նիստին ներկա 96 պատգամավորներից կողմ քվերակեց 65-ը և փաթեթը մերժվեց:
«Իմ քայլը» խմբակցության ղեկավար Լիլիթ Մակունցը քվեարկությունից հետո հայտարարեց, որ ընդդիմությունն իր կրավորական կեցվածքով արեց ամեն ինչ, որպեսզի բուժհամակարգի գործունեությունը պարալիզացվի, որ ոստիկանները շարունակեն աշխատել արտակարգ լարվածությամբ:
Իշխանության կողմից ընդդիմությանն ուղղված նման մեղադրանքը իհարկե ծիծաղելի է, որովհետև <<Իմ քայլը>> խմբակցությունը 88 մանդատ ունի և կարող է ցանկացած նախագիծ անցկացնել, եթե ուզենա: Ընդդիմությունը պարտավոր չէր կողմ քվերակել մի նախագծի, որի վերաբերյալ ունի կոնկրետ մոտեցում և բացասական կարծիք:
Նախօրեին խորհրդարանի դահլիճում որոշ իմ քայլականներ ևս քննադատեցին նախագիծը, նշելով, որ այն կորոնովիրուսի կանխարգելմանը ոչինչ չի տալիս, փոխարենը լուրջ խնդիրներ է հարուցում մարդու իրավունքների տեսանկյունից: Նախագծի վերաբերյալ քնանդատաբար արտահայտված իշխանական պատգամավորները ներկա չէին նիստին:
Կատարվածը հետաքրքիր ազդակ է առաջին հերթին իշխանության համար: Փաստորեն կամ Նիկոլ Փաշինյանի հրահանգը իշխանական պատգամավորների թիմում միանշանակ չի ընդունվում, կամ էլ այս նախագիծի համար կառավարության ղեկավարը հատուկ ջանքեր չէր ներդրել: Թեպետ եթե կա խմբակցության որոշում` կողմ քվեարկելու վերաբերյալ, ապա այստեղ լրացուցիչ ջանքերի և հրահանգների կարիք պետք է որ չլինի: Ամեն դեպքում խորհրդարանի իշխանական թիմի այսօրվա պահվածքը դեմարշ էր հիշեցնում թավշյա հեղափոխության առաջնորդի դեմ: Թերևս այստեղ ավելի շատ աշխատել է ինքնապաշտպանական բնազդը. պատգամնավորները հասկացել են, որ այս օրենքի ընդունումից հետո առաջինը գաղտնալսվելու են հենց իրենք:

Հայկ Դավթյան