Ծաղկաձորի, Երևանի և Դիլիջանի հյուրանոցները կդառնան մեկուսացման վայրեր

Կառավարությունում հրավիրած ասուլիսում Զբոսաշրջության պետական կոմիտեի նախագահ Սուսաննա Սաֆարյանն անդրադարձավ տուրիզմի ոլորտում արձանագրված վնասներին։ Նա ասել է, որ կորուստները գումարային առումով արձանագրված չեն, բայց առաջին եռամսյակում արդեն իսկ 175 հազար զբոսաշրջիկ պակաս է այցելել Հայաստան:
«Դա բավական մեծ կորուստ է ոլորտի համար՝ հաշվի առնելով, որ առաջին եռամսյակը դեռ զբոսաշրջային ամենաակտիվ շրջանը չէր, և այդ ընթաքցում դեռ կային բաց սահմաններ։ Երկրորդ եռամսյակի ընթացքում ավելի վատ կարող է լինել, քանի որ փակ սահմաններ են, թռիչքներ չեն իրականացվում, զբոսաշրջային այցելություններ գրեթե չեն լինելու։ Դա նշանակում է, որ այն զբոսաշրջային մուտքերը, որոնք նախատեսված էին, չեն լինելու։»,- նշել է նա։ Մեկ զբոսաշրջիկի միջինացված ծախսը Հայաստանում, ըստ տարբեր հաշվարկների 770 ԱՄՆ դոլար է կազմում: Այսինքն `առաջին եռամսյակում ոլորտի վնասը կազմել է մոտ 135 մլն դոլար, որը Հայաստանի համար լուրջ ցուցանիշ է : Ըստ Սաֆարյանի`
ոլորտի ընկերություններից որոշները լուծարման գործընթաց են սկսել` հարկային բեռի պատճառով. «Մեր հաղորդակցությունը զբոսաշրջային տարբեր կազմակերպությունների հետ ցույց է տվել, որ հիմնական ծախսերը, որոնք ունեն այս պահին, իրենց կոմունալ ծախսերն են, աշխատակիցների աշխատավարձերը և հարկային պարտավորությունները։ Այս իսկ պատճառով կառավարության աջակցության գործիքակազմը որոշակիորեն ծածկում է այդ կարիքները։ Չեմ ասում՝ ամբողջությամբ, որովհետև դեռ կան զբոսաշրջային սուբյեկտներ, որոնց այս ծրագրերով անդրադարձ չկա, բայց կլինի»,- նշել է նա։ Ինչ վերաբերում է լուծարմանը, ապա բանավոր հայտարարություն շատերն են արել, որ իրավիճակը չշտկվելու դեպքում հնարավոր է, որ գնան նման քայլերի, բայց դեռևս այս մասին գույքագրում չկա։
Պարզվումէ նաև, որ ՀՀ-ում նոր տիպի կորոնավիրուսի տարածումը կանխելու նպատակով Զբոսաշրջության կոմիտեն հավաքագրում է 60 և ավելի սենյակներ ունեցող հյուրանոցներ՝ վարակակիր անձանց շփման շրջանակին մեկուսացնելու համար. «Այս պահին ՀՀ տարածքի որոշ կետերում կատարվում են մեկուսացման աշխատանքներ, և դրանք իրականացվում են հյուրանոցների հետ համագործակցությամբ։ Առողջապահության նախարարության հսկողությամբ և Զբոսաշրջության կոմիտեի կոորդինացիայով իրականացնում ենք վարակակիր անձանց շփման շրջանակի մեկուսացում։ Սպասում ենք գնային առաջարկներ բոլոր այն հյուրանոցներից, որոնք ունեն 50 և ավելի սենյակ, քանի որ ցանկանում ենք կենտրոնացված պահել շփման շրջանակը մեկ վայրում։ Դիտարկվում են Ծաղկաձորը, Երևանը և Դիլիջանը»,- նշել Սաֆարյանը և հավելել, որ բազմաթիվ հյուրանոցներ արդեն իսկ ցանկություն են հայտնում ներգրավվել մեկուսացման աշխատանքներում։
Հասկանալի է, որ հյուրանոցներին այս պահին ձեռնտու է դառնալ մեյուսացման վայրեր: Այդ տարբերակով նրանք կկարողանան գոնե փրկվել սնանակցումից և որոշակի եկամուտներ ստանալ:
Բայց այս տարեբարակը ռիսկային է, որովհետև հետագայում, հնարավոր է, որ զբոսաշրջիկները չցանկանան հյուրըկալվել նման հյուրանոցներում:
Զբոսաշրջությունը կորոնավիրուսից առավել շատ տուժած ոլորտներից է: Ընդ որում սա շղթայաձև ոլորտ է, քանի որ ապահովում էր հյուրանոցների, ռեստորանների զվարճանքի վայրերի, հուշարձանների և այլ ծառայությունների շրջանառայությունը: Ինչով կարելի է փոխարինել այս ոլորտի վնասները, դեռ հայտնի չէ:

Հայկ Դավթյան