Ինչու՞ է Ալիևը նորից ակտիվացել ՀՀ սահմանների մոտ

Երեկ հայտնի դարձավ, որ հակառակորդի գնդակից, սահմանին պայմանագրային զինծառայող է վիրավորվել: ՀՀ պաշտպանության նախարարի մամուլի խոսնակ Շուշան Ստեփանյանը «Ազատություն» ռադիոկայանին ասել է. «Վերջին մեկ ամսվա ընթացքում, հակառակորդն արդեն երկրորդ անգամ է սադրում իրավիճակը՝ Տավուշի մարզի հայ-ադրբեջանական սահմանին: Այս անգամ նույնպես հակառակորդը կրակ է բաց թողել մեր մարտական դիրքերի վրա, պատասխան կրակից հետո՝ լռեցվել։ Վիրավորվել է պայմանագրային զինծառայող: Իրականությանը չի համապատասխանում հակառակորդի տարածած այն ինֆորմացիան, թե մենք ենք իրենց քաղաքացիական ճանապարհների ուղղությամբ կրակ բացել»։ ՊՆ խոսնակի խոսքով՝ վիրավորում ստացած զինծառայողի կյանքին վտանգ չի սպառնում, վիրավորումը թեթև-շոշափող է, զինծառայողը հոսպիտալացվել է:

Մարտի 22-28-ը ընկած ժամանակահատվածում արցախա-ադրբեջանական հակամարտ զորքերի շփման գոտում հակառակորդը խախտել է հրադադարի պահպանման ռեժիմը ավելի քան 150 անգամ` տարբեր տրամաչափի հրաձգային զինատեսակներից հայ դիրքապահների ուղղությամբ արձակելով շուրջ 1200 կրակոց: ՊԲ առաջապահ զորամասերը հետևում են հրադադարի պահպանման ռեժիմին և շարունակում վստահորեն իրականացնել մարտական հերթապահություն:

Ինչո՞ւ է Ադրբեջանը կրկին ակտիվացել Տավուշի սահմաններում: Ադրբեջանը կրակում է ՀՀ մարտական դիրքերի վրա: Մարտի 31-ին Արցախում խորհրդարանի և նախագահի ընտրություններից առաջ, ըստ ամենայնի, Ադրբեջանը սկսում է իրեն հիշեցնելու քաղաքականություն վարել:

Վերջերս էլ Ադրբեջանը դիվերսիայի փորձի իրականացրեց: Ավելի վաղ՝ Տավուշի մարզի հատվածում Ադրբեջանը փորձեց սադրանքի գնալ, ապա՝ դիվերսիայի փորձը։
Արդյոք Բաքվի նպատակը կոնկրետ հարձակողական գործողություններն են՝ դժվար է ասել: Բայց սեփական երկրում էլ ուշադրությունը բազմաթիվ խնդիրներից ցրելու նպատակով էլ Բաքուն կարող է դիմել ինչ-ինչ քայլերի:

Ի դեպ, մամուլում տեղեկություններ հայտնեցին, որ 2020 թվականի մարտի 12-ին Ադրբեջանի քաղաքացի է հատել հայ-ադրբեջանական սահմանը: Ըստ Factor.am-ի աղբյուրների՝ սահմանախախտը շուրջ 47 տարեկան տղամարդ է, քաղաքացիական անձ:
Իսկ aysor.am-ը ներկայացրել է տեղեկություններ այն մասին, որ ներկայում քաոսային իրավիճակ է Ադրբեջանում և իշխանությունների սին հայտարարություններն ու խոստումներն այլևս հավատ չեն ներշնչում Ադրբեջանի քաղաքացիներ մոտ:

Մասնավորապես, համաձայն ադրբեջանական haqqin.az լրատվական կայքի տարածած տեղեկատվության, Նախիջևանի մաքսային կոմիտեին հանձնարարվել է կասեցնել Ադրբեջանի քաղաքացիների մուտքը Թուրքիայից Սադարակի անցակետով, ովքեր այնուհետև պետք է Նախիջևանի միջազգային օդանավակայանից մեկնեին Բաքու: Բացի այդ, արգելվել է նաև օտարերկրյա քաղաքացիների մուտքը Նախիջևան, բոլոր տեսակի ավտոմեքենաների մուտքերն ու ելքերը ևս:

Թուրքիայում կորոնավիրուսի տարածման արագ տեմպերով պայմանավորված, Նախիջևանի ղեկավարությունը՝ կիրառելով արտակարգ միջոցներ, արգելափակել է Ադրբեջանի քաղաքացիների վերադարձը հայրենիք, այդպիսով վերջիններիս դնելով անելանելի դրության մեջ և փաստացի հրաժարվել նրանցից:

Այդ քաղաքացիների շարքերում են նաև ադրբեջանցի զինծառայողների ընտանիքների անդամներ՝ մայրեր, քույրեր, մանկահասակ երեխաներ: Սակայն Ադրբեջանի նման ավտորիտար երկրում տվյալ խրթին խնդրի բարձրաձայնումը ընդունված չէ: Դժվար չէ պատկերացնել տվյալ անելանելի և ձայնազուրկ վիճակում հայտնված զինծառայողների հոգեբանական վիճակը. մի կողմից ադրբեջանական բանակում COVID-19 վիրուսի անխոչընդոտ տարածումը, մյուս կողմից նրանց հարազատների «գաղութացումը» օտար երկրում, որտեղ անգամ ֆիզիկապես չեն հասցնում լուծել սեփական բնակչության համաճարակից պաշտպանելու խնդիրը:

Ըստ կայքի հրապարակած տեղեկությունների՝ բազմաթիվ բարոյալքված ադրբեջանցի զինծառայողներ անգամ մտորում են թողնել մարտական դիրքերը և անցնել հայկական կողմ՝ հայցելով Հայաստանի իշխանությունների օգնությունը:

Նման իրավիճակում, չի բացառվում, որ Ալիևը դիմի անկանխատեսելի քայլերի՝ նպատակ ունենալով ուշադրությունը շեղել տարբեր խնդիրներից:

Մետաքսյա Շալունց