Պետական համակարգը կաթվածահար է

Ցանկացած ճգնաժամային իրավիճակ արագ բացահայտում է մարդու էությունը, նրա ով լինելը: Այսօր Հայաստանը , ինչպես նաեւ ամբողջ աշխարհը, թեւակոխել է անորոշ ճգնաժամի փուլ, որը ոչ միայն առողջապահական սպառնալիք է ներկայացնում, այլեւ տնտեսական, սոցիալական եւ նույնիսկ կենսակերպային: Համայն մարդկությունը պարփակվել է չորս պատերի մեջ և չգիտի թե ինչ անել:

Այս պայմաններում, սովորաբար երկրի ղեկավարը և վերնախավը գիշերուզօր աշխատում են, ստեղծված իրավիճակը թեթեւացնելու ելքեր են փնտրում: Ահավասիկ, Հայաստանի վարչապետն էլ է աշխատում եւ հընթացս բացահայտում է իր էությունը:
Տեւական ժամանակ զրկված լինելով փողոցներում հանրահավաքներ անելուց, Նիկոլ Փաշինյանը որոշեց դա անել սեփական կաբինետում՝ վիրտուալ եղանակով:
Նա պատահականության սկզբունքով որոշել էր զանգել մարդկանց և գյալաջի
անել՝ տեղ-տեղ էլ անձնական բնույթի հարցեր տալ, մեղմ ասած՝ քիթը խոթել ուրիշի կյանք:

Եթե ամփոփենք շուրջ մեկժամանոց զրույցը, կարող ենք փաստել, որ Հայաստանում ամեն ինչ լավ է, իհարկե, կան, խնդիրներ, մարդիկ նեղվում են տանը մնալուց, բայց դրանով հանդերձ ընդունում, որ Նիկոլն իրենց փրկիչն է:
Հետաքրքիր է՝ ինչ էին մտածում այս թատրոնի կազմակեպիչները, որ վարչապետի հետ անսպասելի ուղիղ կապի դուրս եկած քաղաքացիները պիտի բացեի՞ն բողոքի գրքերը, կա՞ աշխարհում մի երկիր, որի քաղաքացիները իրենց շոյված, միեւնույն ժամանակ կաշկանդված չեն զգում պետության ղեկավարի հետ ուղիղ շփման ժամանակ: Սա քննադատությանը չդիմացող տրամաբանություն է, անգամ
մտածելն անգամ, որ թելեթոնի իրական նպատակը հասարակական տրամադրությունները պարզելն էր, ուղղակի սարսափելի է:

Միթե պետական ահռելի համակարգում չկան այլ աշխատակիցներ եւ քարտուղարուհիների ու գործավարների գործն էլ պետք է վարչապետն անի: Հետո էլ էլ խոսում եք, թե նախկինում պետական համակարգը կաթվածահար էր, կա նաեւ գաղտնի որոշում: Կաթվածահար լինելը պոզով-պոչով է լինո՞ւմ, երբ երկրիդ վարչապետը եւ քարտուղար է, եւ հսկիչ, եւ առաքիչ, եւ նախարար, եւ պատգամավոր, ամեն, ամեն ոք:
Վարչապետը հիմա պետք է քիթ սրբելու ժամանակ չունենար ու զբաղվեր անտեսանելի թշնամու դեմ պայքարով։ Բայց քանի որ զրո է կառավարչական և այլ տիպի հարցերում, ուստի զբաղվում է իր հոբբիով:

Անի Սահակյան