Իշխանությունը խուճապ է տարածում

Հայաստանում մոլեգնող համաճարակի վերաբերյալ իշխանությունը մի կողմից վետո է դրել լրատվամիջոցների վրա՝ իբր չճշտված տեղեկություններ չհայտնելու, այդպիսով խուճապ չառաջացնելու համար, մյուս կողմից դա անում է, ներկայացվում են իրար հակասող տեղեկություններ, իշխանության ստերը բացահայտվում են ու ստեղծվում է հարցերի մի ողջ շղթա:

Դեռ անցած շաբաթ առողջապահության նախարար Արսեն Թորոսյանը հայտարարում էր, որ մարզային կլինիկաներում կորոնավիրուսով հիվանդներին չեն բուժելու, հակված են կենտրոնացված աշխատելուն: Երբ ԲՀԿ ղեկավար Գագիկ Ծառուկյանը խորհրդարանում գաղտնիք բացեց, որ ինքը գումար է փոխանցել Գյումրու հիվանդանոցի, որտեղ կորոնավիրուսով հիվանդների են բուժում, պաշտոնապես խոստովանեցին, որ այո, որոշ մարզային հիվանդանոցներ համապատասխանեցվել են նոր պանդեմիայի համար: Հիմա հարց՝ ՀՀ քաղաքացին այս հակասությունից հետո կարող է խուճապի մատնվել՝ մտածելով, այդ ինչ մեծ տարածում է ստացել վարակը, որ մի քանի օր առաջ նախարարն ուրիշ բան էր ասում, հիմա այլ պատկեր կա:

Հաջորդ խուճապ առաջացնող տեղեկատվությունը թեստերին է վերաբերում: Կառավարության մարտի 26-ի նիստին Նիկոլ Փաշինյանը հայտարարեց, որ Հայաստանում արդեն իսկ կան կորոնավիրուսի հայտնաբերման արագ թեստեր և դրանք պետք է օգտագործվեն Արցախում մարտի 31-ին սպասվող ընտրություններին Հայաստանից մեկնող դիտորդական առաքելությունների անդամներին մեկնումից առաջ թեստավորելու համար։ Ընդամենը մեկ օր առաջ՝ մարտի 25-ին, կառավարության հետ հարցուպատասխանի ժամանակ Արսեն Թորոսյանը հայտարարել էր, որ կորոնավիրուսի արագ ախտորոշման թեստերը պատվիրվել են, բայց դեռևս հանրապետություն չեն հասել։

«Այո՛, մենք ձեռք ենք բերել այդ թեստերը ինքներս մեր սեփական փորձով համոզվելու համար՝ ինչպե՞ս պետք է կիրառենք, ո՞ր հաստատություններում…։ Թեստերը ճանապարհին են, մենք ամեն օր սպասում ենք։ Մի խմբաքանակի նախնական առաքման ժամկետն ամսի 27-ն է, բայց գիտենք, որ համաշխարհային լոգիստիկ խնդիրներ կան՝ ինքնաթիռների թռիչք, փակ ցամաքային սահմաններ…»,- ասել էր նա։
Արսեն Թորոսյանը նաև նշել էր, որ մինչև հիմա Հայաստանում կիրառվում է Առողջապահության համաշխարհային կազմակերպության կողմից հաստատված և խորհուրդ տրվող կորոնավիրուսի ախտորոշման՝ PCR պոլիմերազային շղթայական ռեակցիայի մեթոդը, որը կիրառվում է ամբողջ աշխարհում։

Ըստ Թորոսյանի՝ այս մեթոդով ախտորոշումը տևում է մոտ 5 ժամ, սակայն այն գերճշգրիտ է։

Առողջապահության նախարարի խոսնակ Ալինա Նիկողոսյանը վարչապետի հայտարարությունից հետո վերահաստատել է, որ արագ թեստերը դեռևս Հայաստան չեն հասել։ Այսպիսով՝ սա էլ մյուս փաստը, որի վերաբերյալ վարչապետն ուրիշ բան է ասում, նախարարն՝ այլ: Երեկ գրանցվեց առաջին մահը: Առողջապահության նախարարության մամուլի խոսնակ Ալինա Նիկողոսյանը հայտարեց.«72-ամյա պացիենտն ունեցել է կորոնավիրուսային հիվանդություն, ինչպես նաև երկկողմանի թոքաբորբ, պոլիօրգանային անբավարարություն, ռեսպիրատոր դիսթրես համախտանիշ, հիպերտոնիկ հիվանդություն և սրտի ռիթմի խանգարում։ Ցավոք, ուղեկցող հիվանդությունների պատճառով հնարավոր չի եղել փրկել վերջինիս կյանքը։
Պացիենտը երեկվանից գտնվել է վերակենդանացման բաժանմունքում և վերջինիս վիճակը գնահատվել է ծայրահեղ ծանր»։

Մինչդեռ, առավոտյան վարչապետը հայտարարել էր, որ ծայրահեղ ծանր վիճակում գտնվող երկու քաղաքացի կա, երկուսն էլ 75 տարեկանից բարձր են, նրանցից մեկն ԱՄՆ-ի քաղաքացի է և ազգությամբ հայ չէ, մյուսը ՀՀ քաղաքացի է։ Հարց է առաջանում՝ վարչապետը տարիքն է շփոթել, թե մահացածի վիճակը ծայրահեղ ծանր է դարձել մահվանից րոպեներ առաջ, եւ ի վերջո, քանի ծայրահեղ ծանր հիվանդ կա իրականում: Մահացածը ՀՀ քաղաքացի է։

Իշխանությունն, իսկապես, խառն է, շա՜տ խառը, ու այդ պատճառով էլ այնպիսի անտրամաբանական որոշումներ է ընդունում, որ գլուխկոտրուկներին ծալած ունեն: Օրինակ, որ մի մեքենայի մեջ ներառյալ վարորդը երկու հոգուց ավել չի թույլատրվում երթեւեկել, եթե կա երրորդը, ապա մի հինգ ոստիկանով իջացնում են, ասում գնա հանրային տրանսպորտով՝ մի տաս հոգով շարունակի երթուղիդ:

Անի Սահակյան