Արցախի ընտրությունները կհետաձգվե՞ն. ինչ որոշում կկայացնի Նիկոլ Փաշինյանը

Արցախի Հանրապետության առողջապահության նախարարությունից հայտնում են, որ ներկա դրությամբ Հանրապետությունում նոր տիպի կորոնավիրուսի վարակման դեպք չի արձանագրվել, տեղեկացնում է տեղեկատվական շտաբը։
«Միաժամանակ տեղեկացնում ենք, որ տարբեր օրերի ընթացքում քաղաքացիներ են մեկուսացվել, որոնցից փորձանմուշ է վերցվում և ուղարկվում փորձաքննության: Բացասական պատասխանի դեպքում նրանց մեկուսացումը դադարեցնում են: Որոշ դեպքերում, բժիշկների հորդորով, քաղաքացիները նաև իրենց տներում են ինքնամեկուսանում, սակայն շարունակում են մնալ բժիշկների վերահսկողության տակ:
Այս պահին համապատասխան բուժհաստատությունում ընդամենը 3 մեկուսացված քաղաքացիներ կան, որոնք գտնվում են պատշաճ բժշկական հսկողության տակ»,-ասված է շտաբի տարածած հաղորդագրության մեջ:

Հայտնի է, որ Արցախը թեւակոխել է նախընտրական թեժ փուլ եւ մարտի 31-ին նախագահական ընտրություններ են սպասվում, որտեղ ֆավորիտ երեք մրցակիցներն են Արայիկ Հարությունյանը, Վիտալի Բալասանյանը եւ Մասիս Մայիլյանը:

Վերջին օրերին կորոնավիրուսի Հայաստան եւ տարածաշրջան ներթափանցելուց հետո նախագահի որոշ թեկնածուներ հանդես եկան հայտարարությամբ՝ առաջարկելով երկրում արտակարգ դրություն մտցնելու եւ ընտրությունները հետաձգելու վերաբերյալ: Վիտալի Բալասանյանի կարծիքով քաղաքական շահերը չպետք է գերադասել անվտանգության շահերին: Եւ քանի որ Արցախը շրջապատված է երկրներով, որտեղ վարակը տարածվել է, դրանից խուսափելն անհնար է լինելու:
Ու թեեւ Արցախում առանց արտակարգ դրության էլ արտակարգ ռեժիմ է սահմանված, խիստ հսկողություն կա բոլոր անցակետերում, ախտահանվում են փողոցները եւ այլն, սակայն խնդիրն այն է, որ շատ կարեւոր հանգամանք՝ չկան լաբորատորիաներ, որտեղ կարող են ստուգել անձանց վարակվածությունը, ախտորոշել անձը վարակված է կորոնավիրուսով, թե ոչ:
Ու կասկածյալների փորձանմուշները պետք է ուղարկեն Երեւան՝ լաբորատոր քննության ու երբ հաստատվեց կորոնավիրուսի դեպքը, այն ժամանակ էլ կհայտարարվի արտակարգ դրություն, կհետաձգվեն ընտրությունները: Բայց այստեղ մի մեծ հարց է առաջանում, հաշվի առնելով, որ նախագահի թեկնածուների մեջ էլ կան ոմանք, ովքեր չեն ցանկանում, որ ընտրությունները հետաձգվեն, մեծ ռեսուրսներ են ծախսել քարոզարշավի ընթացքում, Հայաստանի իշխանությունը եւս Արցախի ընտրություններում ունի մեծ հետաքրքրություն եւ հայտնի է, որ պաշտպանում է Արայիկ Հարությունյանի թեկնածությունը: Այս հանգամանքը հաշվի առնելով՝ ինչ երաշխիք, որ Երեւանից հաշվարկելով ռիսկերը հնարավորինս հրատապ ժամկետներում կհայտարարեն փորձանմուշների արդյունքները:
Հաշվի առնելով հայստանյան իշխանությունների ապաշնորհության աստիճանը եւ իրերին ու երեւույթներին ըստ նպատակահարմարության վերաբերելու, սեփական շահերից բխեցնելու սկզբունքը, մեծ հույսեր չի կարելի ունենալ: Մենք տեսանք, թե ինչպես էր Նիկոլ Փաշինյանը շարունակում սահմանադրական հանրաքվեի քարոզարշավը, երբ Հայաստանում մարտի 1-ին արդեն մեկ վարակված անձ կար: Մինչդեռ մարտի 1-ի երթը չեղարկվեց՝ հայտարարելով, թե հաշվի են առնում ռիսկերը: Այսինքն Նիկոլ Փաշինյանը ցանկացած պահի առաջնորդվում է ըստ նպատակահարմարության եւ կասկած չկա, որ Արցախը բացառություն չի լինելու:

Անի Սահակյան