Ինչ ստացավ Չինաստանը կորոնավիրուսից

Կորոնավիրուսի հետ կապված բոլոր զարգացումները ցույց են տալիս, որ սա ոչ միայն առողջապահական, այլ նաև տնտեսական վիրուս է, որը սպառնում է փլուզել համաշխարհային տնտեսության կառուցվածքն ու բուրգերը: 

Միջազգային լրահոսում տեղեկություններ են հրապարակվում, որ Չինաստանը, որը համարվում է այս վիրուսի բնօրաննը, տևական ժամանակ թաքուն է պահել այդ վիրուսի փաստը: Չինաստանում համաճարակային վիճակն ակնառու է եղել դեռևս անցած տարվա դեկտեմբերից, սակայն այդ մասին չի հայտարարվել: Առողջապահության համաշխարհային կազմակերպությանը Չինաստանը վիրուսի մասին տեղյակ է պահել 2019 թվականի դեկտեմբերի 31-ին միայն:
Հետո արդեն, երբ Չինաստանում համաճարակը միանգամից հայտարարվեց խուճապային տրամադրություններով, սրա հետևանքն եղեվ այն, որ այդ երկրում աշխատող բազմաթիվ միջազգային ընկերությունների բաժնետոմսերի գներն սկսեցին նվազել: Չինաստանում աշխատող արտասահմանյան ընկերություններն արագ վաճառեցին չինական կապիտալի իրենց բաժնեմասերը, փոխարենը դրանք բավական էժան գներով ձեռք բերեցին չինական ընկերությունները: Արդյուքնում ստացվեց այնպես, որ կորոնավիրուսի համաճարակի պատճառով Չինաստանն ազգայնացրեց իր երկրի ողջ կապիտալը ու դրա արտադրողականության հաշվին ստեղծվող շահաբաժինները:
Թերևս եթե վիրուսի մասին հայտարարված լիներ ժամանակին, գուցե ողջ աշխարհում այսօր իրավիճակն այլ լիներ, քան կա այսօր: Հատկանշական է, որ անգամ մարդկային զոհերի քանակով, վիրուսի էպիկենտրոն համարվող Չինաստանն ավելի քիչ կորուստներ է ունեցել, քան, օրինակ՝ Իտալիան: ՖրանսիականThe Guardian պարբերականի հաղորդմամբ՝ մահվան ելքով դեպքերի թիվն Իտալիայում մարտի 20-ի դրությամբ հասել է 3405-ի, ինչը գերազանցում է Չինաստանում գրանցված ցուցանիշը՝ 3245 դեպք։ Եթե հաշվի առնենք այս երկու երկրների բնակչության թվերը, ապա տոկոսային հարաբերությամբ Իտալիայի զոհերի թիվն անհամեմատ ավելի մեծ է:
Ավելին՝ Եվրոպան այսօր գտնվում է վիրուսի տարածման պիկային վիճակում, Իտալիայում անգամ հայտարարվել է տարեց վարկվածներին օգնություն չտրամադրելու մասին:
Մինչդեռ Չինաստանում վերջին երկու շաբաթվա ընթացքում նոր դեպքերի հայտնաբերման մասին չի հայտարարվում:
Չինական ընկերությունները երկրի ողջ տարածքում ավելի քան 89 տոկոսով վերսկսել են հիմնական ենթակառուցվածքների շինարարությունը, ինչը պայմանավորված է կորոնավիրուսի համաճարակի դեմ պայքարում իրավիճակի կարգավորմամբ:
Ինչպես հայտնում է ТАСС գործակալությունը, այս մասին շաբաթ օրը հայտարարել է Չինաստանի զարգացումների և բարեփոխումների հարցով պետական հանձնաժողովի ներդրումների վարչության ղեկավարը՝ նշելով, որ դրությունը տարբեր նահանգներում տարբեր է:
«Կորոնավիրուսի համաճարակի հետ կապված՝ Լուսնային օրացույցով Նոր տարվա տոնակատարությունից հետո դժվարություններ էին ի հայտ եկել խոշոր ենթակառուցվածքային շինություններում աշխատանքի վերականգնման հարցում: Համատեղ ջանքերի շնորհիվ իրավիճակն աստիճանաբար կարգավորվում է: Եթե չհաշվենք Հուբեյ նահանգը, Չինաստանի մյուս նահանգներում շուրջ 11 000 նման կարևոր նախագծեր կան, որոնց 89 տոկոսում մարտի 20-ին վերականգնվել են գործունեությունը»,- ասել է նա:
Նրա խոսքով՝ Չինաստանի հարավային շրջաններում շինարարական աշխատանքների վերականգնումը կազմում է 98 տոկոս, մինչդեռ հյուսիսային շրջաններում՝ 60 տոկոս:
Իսկ աշխարհի մակարդակով տնտեսական օգուտների ու վնասների վերլուծությունները դեռևս առջևում են: Արդեն իսկ ակնհայտ է, որ նավթային պետությունները ֆինանսական շատ լուրջ կորուստներ են կրում, հումքային արտադրությունը ևս իր անկման պիկում է գտնվում: Ինչ է լինելու հաջորդաբար դեռ հայտնի չէ: Բայց կարծես թե ուրվագծվում է, որ Չինաստանին հաջողվում է կորոնավիրուսի ավերածությունից դուրս գալ նվազագույն զոհերով և առավելագույն տնտեսական էֆեկտով:

Հայկ Դավթյան