Ջո Բայդենը ԱՄՆ-ում թափ է հավաքում. Նա կոչ է անում՝ մի կողմ թողնել քաղաքական տարաձայնությունները

ԱՄՆ նախագահության դեմոկրատ գործիչները պատրաստվում են լծվել են ներկուսակցական նախնական ընտրությունների գործընթացին:

Չնայած Միացյալ Նահանգներում կորոնավիրուսի շարունակվող տարածմանը, օրերս միանգամից երեք խոշոր նահանգներում՝ Ֆլորիդայում, Իլինոյսում և Արիզոնայում Դեմոկրատական կուսակցության հարյուր հազարավոր աջակիցներ գնացին տեղամասեր՝ փրայմերիներին, ներկուսակցական ընտրություններին մասնակցելու նպատակով:
Ամերիկյան միակ նահանգը, որ մարդկանց մեծ կուտակումներից խուսափելու համար որոշեց հետաձգել քվեարկությունը, Օհայոն էր: Ըստ «Ազատություն» ռադիոկայանի՝ ամերիկյան լրատվամիջոցները հայտնել են, որ նախօրեին կայացած ներկուսակցական ընտրությունների ընթացքում մասնակցության բարձր ցուցանիշը ապահովվեց հիմնականում վաղաժամ, փոստային քվեարկության շնորհիվ: Արիզոնայում, օրինակ, հեռակա կարգով քվեարկած դեմոկրատ ընտրողների թիվն ավելի մեծ էր, քան տեղամասեր այցելածներինը:

Առավել բարդ է եղել իրադրությունը Իլինոյսի խոշորագույն քաղաքում` Չիկագոյում, որտեղ տեղամասերից շուրջ 200-ը վերջին պահին, կորոնավիրուսի համաճարակի հետևանքով ուժի մեջ մտած սահմանափակումների պատճառով, տեղափոխվել էին այլ վայրեր: Որպես հետևանք՝ Իլինոյսում քվեարկության մասնակցության ցուցանիշը ավելի ցածր էր, քան 2016 թվականի փրայմերիների ընթացքում: Նույնն իրադրությունն էր Ֆլորիդայում, որտեղ, ըստ The New York Times-ի, տարեց ընտրողների մի զգալի մասը գերադասել էր մնալ տանը:

Չնայած այս ամենին, երեք նահանգներում էլ ընտրությունների արդյունքները որևէ անակնկալ չմատուցեցին. նախկին փոխնախագահ Ջոզեֆ Բայդենի ընտրարշավը շարունակում է թափ հավաքել:

Արիզոնայում քվեների շուրջ 90 տոկոսի հաշվարկի արդյունքներով՝ Բայդենը ստանում է դեմոկրատ ընտրողների 43, իսկ նրա հիմնական մրցակից, Վերմոնտից ընտրված անկախ սենատոր Բերնի Սանդերսը` 31 տոկոսը: Իլինոյսում Բայդենի օգտին քվեարկել է ընտրողների 59, Սանդերսի օգտին` 36 տոկոսը:

Առավել համոզիչ հաղթանակ նախկին փոխնախագահը արձանագրեց Ֆլորիդայում: Այստեղ Բայդենի օգտին է քվեարկել փրայմերիների մասնակիցների 61, իսկ Սանդերսի օգտին՝ ընդամենը 22 տոկոսը: Օրերս կայացած քվեարկությունը շատերի կարծիքով աննախադեպ էր ամերիկյան ընտրությունների բավական հարուստ պատմության ընթացքում: Սա այն եզակի դեպքերից էր, երբ ընտրությունների արդյունքների հրապարակումից հետո թեկնածուները որևէ հանրահավաք չկազմակերպեցին:
Ջոզեֆ Բայդենն իր հաղթանակի ճառը հնչեցրեց քվեարկությանը մասնակցած շրջաններից հարյուրավոր կիլոմետրեր հեռավորության վրա գտնվող Դելավեր նահանգի իր տնից: «Ես ցանկանում եմ դիմել հատկապես այն երիտասարդ ընտրողներին, որոնց ոգեշնչում է սենատոր Սանդերսը: Ես ականջալուր եմ լինում ձեզ: Ես գիտեմ, թե ինչ է հարկավոր անել: Իմ նպատակը այնպիսի թեկնածուի ընտրությունն է, որն ի վիճակի կլինի միավորել այս կուսակցությունը, իսկ հետագայում նաև ողջ երկիրը: Այսպիսի պահերին մենք պետք է մի կողմ թողնենք քաղաքական տարաձայնությունները: Կորոնավիրուսին միևնույն է` դու դեմոկրատ ես, թե հանրապետական», - հայտարարել է Բայդենը:
Նախկին փոխնախագահի մրցակիցը` Բերնի Սանդերսը, ամերիկացիներին դիմեց մայրաքաղաք Վաշինգտոնում գտնվող իր գրասենյակից` Ֆլորիդայում, Իլինոյսում և Արիզոնայում տեղամասերի փակումից քիչ անց: Սանդերսը, սակայն, գերադասում էր խոսել ոչ թե իր կրած պարտության, այլ կորոնավիրուսի համաճարակի և դրա տնտեսական հետևանքների մասին: «Առողջապահական և տնտեսական այս ճգնաժամը չպետք է փող աշխատելու ևս մեկ հնարավորություն դառնա ամերիկյան կորպորացիաների և Ուոլ Սթրիթի համար: Մենք պետք է կանխենք դեղագործական ընկերությունների կողմից գների բարձրացումը: Բացի այդ, այն պահին, երբ ի հայտ գա կորոնավիրուսի պատվաստանյութը, այն պետք է դրվի ազատ վաճառքի», - ասել է Սանդերսը` ընդգծելով, որ կորոնավիրուսի դեմ պայքարում հնարավոր հաջողությունը չպետք է դեղագործական որոշ ընկերությունների համար գերշահույթ ստանալու ևս մեկ առիթ դառնա:

Արդեն իսկ ակնհայտ է, որ կորոնավիրուսի համաճարակը լրջորեն ազդել է ամերիկյան ներկուսակցական ընտրությունների ողջ ժամանակացույցի վրա: Ըստ ռադիոկայանի՝ Օհայոյից բացի ևս չորս նահանգներ` Ջորջիան, Լուիզիանան, Քենթուկին և Մերիլենդը այս շաբաթ հայտարարեցին, որ առաջիկա շաբաթներին նախատեսված դեմոկրատական փրայմերիները չեն կայանա և կհետաձգվեն առնվազն մեկուկես-երկու ամսով:
Ապրիլի 28-ին նշանակված ներկուսակցական ընտրությունները մինչև հունիսի 23-ը հետաձգելու հնարավորությունն են քննարկում նաև ավանդապես դեմոկրատների օգտին քվեարկող խոշորագույն մեկ այլ նահանգի` Նյու Յորքի կուսակցականները: ԱՄՆ Դեմոկրատական կուսակցության ղեկավար մարմինը` Ազգային կոմիտեն, արդեն իսկ դիմել է տեղական կառույցներին` կոչ անելով առաջիկա փրայմերիների ընթացքում հիմնական շեշտը դնել հեռակա, փոստային քվեարկությունների վրա:

Հիշեցնենք, որ այս ամսվա սկզբին Սաութ Բենդ քաղաքի (Ինդիանայի նահանգ) նախկին քաղաքագլուխ Փիթ Բութիջիջը, Մինեսոտայից սենատոր Էմի Քլոբուշարը և Տեխասից կոնգրեսական Բեթո Օ’Ռուրքը, որոնք դադարեցրեցին ԱՄՆ-ի նախագահի 2020 թվականի ընտրություններում Դեմոկրատական կուսակցությունից թեկնածուի առաջադրման պայքարը, պաշտպանում են ԱՄՆ-ի նախկին փոխնախագահ Ջոզեֆ Բայդենի նախընտրական արշավը:

Ի դեպ, կան խոսակցություններ, որ ամերիկահայ կազմակերպությունները հնարավոր է հօգուտ Բայդենի կողմնորոշվեն առաջիկա ընտրություններում:

Մետաքսյա Շալունց