Աննա Դանիբեկյանի բժշկի թուղթը` Քոչարյանի գործով

ՀՀ երեք նախկին վարչապետները` Վազգեն Մանուկյանը, Խոսրով Հարությունյանը և Կարեն Կարապետյաանը, ինչպես նաև Արցախի նախկին վարչապետ Անուշավան Դանիելյանը նախօրիեն դատարանում պետք է պնդեին իրենց երաշխավորությունը` երկրորդ նախագահ Ռոբերտ Քոչորյանին ազատ արձակելու գործով: Դատական նիստը սակայն չի կայացել, քանի որ դատավոր Աննա Դանիբեկյանի չի ներկայացել` հայտարարելով, թե հիվանդ է:
Երկրորդ նախագահ Ռոբերտ Քոչարյանի պաշտպաններից Հայկ Ալումյանը հայտարարել է, որ ունի հիմնավոր կասկածներ, որ նիստը միտումնավոր է հետաձգվել, որպեսզի հետագայում 4 վարչապետներից մեկը կամ երկուսը հանրապետությունում չլինեն:
Ալումյանը նշել է, որ վարչապետներին տեղեկացրել էին, որ դատարանից զանգ է եկել, որ նիստը տեղի չի ունենալու, ուստի որոշել են գալ դատարան` համոզվելու դատական նիստը տեղի է ունենալու, թե ոչ:
Ալումյանի խոսքով`երեք միջնորդություն է մուտքագրվել դատարանի գրասենյակ՝ խափանման միջոցի հետ կապված, ինչպես նաև նախկին չորս վարչապետների երաշխավորական նամակները: Նախապես տեղեկություն չի եղել, որ դատական նիստը կարող է տեղի չունենալ: «Շատ լուրջ հարցեր են առաջանում, մենք հաջորդ դատական նիստին պահանջելու ենք, որ դատավորը մանրամասնի իր առողջական խնդիրների մասին, որոնք ունեցել է, եթե բուժում է ստացել, ապա որտեղ է ստացել, որ մենք կարողանանք համոզվել, որ այս ամեն ինչը չի արվել զուտ այն բանի համար, որ հետագայում երաշխավորներից մեկի կամ երկուսի ներկայությունը դարձնեն անհնարին»,- նշել է Ալումյանը:

Ըստ փաստաբանի` եթե դատարանն իրեն թույլ է տալիս ՀՀ երկրորդ նախագահի առողջական վիճակի հետ կապված ամեն ինչը դետալային հրապարակել` դա համարելով թույլատրելի միջոց, ապա դատարանը պետք է այդ նույն մոտեցումից ելնելով, դատավորի առողջական վիճակի վերաբերյալ ամենասպառիչ տեղեկությունները ներկայացնի. «Մենք դա պահանջելու ենք: Մենք ունենք կասկածներ, որ սա արվեց միտումնավոր, որ հետագայում այդ 4 երաշավորներից մեկը-երկուսը հանրապետությունում չլինեն, քանի որ երաշխավորները, բացի երաշխավորագիր նամակը գրելուց և դեպոզիտ վճարումն անելուց, պետք է ներկա գտնվեն դատարանի դահլիճում միջնորդության քննարկման ժամանակ»:
Եթե անգամ դատավորի հիվանդությունը հիմնավորվի, ամեն դեպքում դատական նիստից առաջ ընդամենը զանգով այդ մասին տեղեկացնելն, առնվազն անհարգալից վերաբերմունք է Քոչարյանի և նրա պաշտպանակա թիմի նկատմամբ: Հատկապես այն դեպքում, երբ այդ նույն դատարանը Քոչարյանի առողջության հետ կապված բոլոր հարցերը հանրայնացրել է, ապա հաջորդիվ պարտավոր է հրապարակել դատավոր Աննա Դանիբեկյանի հիվանդության թուղթը:
Հիմա պետք է սպասել դատավորի բժշկի թղթին, հակառակ պարագայում կարելի է արձանագրել, որ Քոչարյանի գործը միտումնավոր է ձգձգվում: Արվում է ամեն ինչ, որ երկրորդ նախագահը հնարավորինս երկար մնա կալանքի տակ: Իսկ գործի հետ կապված բոլոր ի նպաստ Քոչարյանի հանգամանքները, միջնորդություններն ու փաստերը անտեսվեն ու քննության չառնվեն:

Հայկ Դավթյան