Արդեն միանձնյա պիկետներ՝ Ռուսաստանում

Ռուսաստանում Սահմանադրությունում փոփոխությունների փաթեթը գրեթե միաձայն ընդունել են արդեն Պետդուման, Դաշնային խորհուրդը, մարզային խորհրդարանները:

Մարտի 14-ին նախագահ Վլադիմիր Պուտինը ստորագրեց իր իշխանությունը երկարաձգելու հնարավորություն տվող սահմանադրական փոփոխությունների օրինագիծը։ Այն պետք է հաստատեն նաև ռուսաստանցիները ապրիլի 22-ին կայանալիք հանրաքվեի ժամանակ։ Մինչ այդ, սակայն, Ռուսաստանի Սահմանադրական դատարանը պետք է իր եզրակացությունը հայտնի առ այն, թե արդյոք նախագահական ժամկետների զրոյացումը չի հակասում երկրի մայր օրենքին։

Սահմանադրական դատարանն արդեն անցել է հարցի քննարկմանը փակ ռեժիմում: Առաջիկայում Սահմանադրական դատարանի դատավորները կհայտնեն իրենց եզրակացությունը, բայց Մոսկվայում քչերն են կասկածում, որ եզրակացությունը դրական է լինելու։

«Էխո Մոսկվի» ռադիոկայանը հրապարակել է ռուսաստանցի իրավաբանների, գիտնականների, լրագրողների և գրողների ուղերձը համաքաղաքացիներին, պատգամավորներին, բոլոր մակարդակի, այդ թվում` Սահմանադրական դատարանի դատավորներին: Դիմումը ստորագրած մտավորականները համարում են, որ Ռուսաստանում կարող է տեղի ունենալ հակասահմանադրական հեղաշրջում։
Նրանք «հակաիրավական» և «անընդունելի» են համարում Սահմանադրության 81-րդ հոդվածի` գործող նախագահի ժամկետները զրոյացնող 31-րդ կետի ներառումը, հայտնում է «Ազատություն» ռադիոկայանը: Հեղինակները նշում են, որ 1998 թվականի նոյեմբերի 5-ին Սահմանադրական դատարանը մատնանշել է նախագահական ժամկետների հաշվարկով մանիպուլյացիաների անթույլատրելիությունը։ Ուղերձում նաև նշված է, որ Սահմանադրությունում փոփոխությունները հակասում են իշխանության փոփոխականության և ժողովրդավարական իրավական կառավարման սկզբունքներին:
Հեղինակները «խորը մտահոգություն» են հայտնում նաև Սահմանադրության փոփոխությունների ընդունման կարգի կոպիտ խախտման վերաբերյալ։ Միևնույն ժամանակ «Էխո Մոսկվի» կայքում հրապարակվել է «մտավորականների Կոնգրեսի հայտարարությունը», որը կոչվում է «Մենք իրավունք չունենք լռելու այն մասին, թե ինչ է կատարվում»:

Այս դիմումի հեղինակները Կենտրոնական ընտրական հանձնաժողովից պահանջում են հրաժարվել «համառուսաստանյան քվեարկություն» անցկացնելուց, քանի որ այն խախտում է ՌԴ Սահմանադրությամբ և օրենքով ՌԴ Սահմանադրության փոփոխությունների ընդունման կարգը:

Ռուսաստանցի անկախ փորձագետները համոզված են, որ այս փոփոխությունների նպատակը մեկն է՝ հնարավորություն տալ Պուտինին մնալ նախագահի պաշտոնում առնվազն մինչև 2036 թվականը։

Ռադիոկայանը հայտնում է նաև, որ հանգստյան օրերին Մոսկվայում, Սանկտ Պետերբուրգում անցկացվել են առանձին բողոքի ակցիաներ: Միանձնյա պիկետներ անցկացնելու համար թույլտվություն պետք չէ, սակայն իրավապահները բերման են ենթարկել տասնյակ մարդկանց, այդ թվում` իրավապաշտպան 79-ամյա Լև Պոնոմարևին, ում ոստիկանությունում նաև հարվածել էին դեմքին։

Մետաքսյա Շալունց