Հանրաքվեն պիտի կայանա.առերեսում իրականության հետ

Արդեն տարբեր շրջանակներից, ինչպես նաեւ մամուլից տեղեկանում ենք, որ իշխանության բարձր օղակներում քննարկում են ապրիլի հինգի հանրաքվեն չեղարկելու կամ հետաձգելու հարցը:

Պատճառը ոչ այնքան պետությանը պատուհասած կորոնավիրուսն է, քանզի Նիկոլ Փաշինյանը հեչ էլ չի վախենում այդ վիրուսից եւ հպարտ քաղաքացիներին էլ հանգստության կոչ է անում՝ «կորոնավիրուսն ո՜ւմ շունն ա»: Ավելին, այնքան չի վախենում, որ ցուցադրաբար արհամարհում, բանի տեղ չէր դնում բազմաթիվ հորդորները, զգուշացումները, քննադատական ակնարկները ու շարունակում էր ընդամենը ՍԴ մի քանի դատավոր փոխելու համար հրահրած հանրաքվեի քարոզարշավը: Իրական պատճառը հենց քարոզարշավն է, դրանից ստացած տպավորությունները, ժողվարչապետը միքանիօրյա ստուգողական այցերի ընթացքում անձամբ է հասկացել, որ Հայաստանում այլեւս մարդկանց մեծամասնությունը հպարտ չեն ու հեռավոր մարզերում առանձնապես խանդավառված իրենով:

Հենց այդ պատճառով է հիմա մտածում հանրաքվեն հետաձգելու, կամ ընդհանրապես՝ չեղարկելու հարցը:  Մինչ աշխարհը պայքարում էր այս վիրուսի ու ֆինանսական հնարավոր ճգնաժամի դեմ, Նիկոլ Փաշինյանը դռնեդուռ ընկած քվե էր մուրում իր ՍԴ մի քանի դատավորների պաշտոնանկության համար, ինչի արդյունքն էլ Հայաստանում այսօր մոլեգնող համաճարակն է: Երբ պետական ապարատը արագ արձագանքեր սպառնացող մարտահրավերներին, միգուցե այսօր չունենայինք այս իրավիճակը:
Այս անպատասխանատվությունը, սակայն, գործում է Փաշինյանի պաշտոնավարման առաջին իսկ օրից: Աշխարհում ամենաշատը մահանում են ՁԻԱՀ վարակից, իսկ մեր երկրում բռնում ու փակում են ՁԻԱՀ կենտրոնը:
Փակում են խոցելի սոցիալական խմբերին սպասարկող գիշերօթիկները, իսկ ողբերգական հետեւանքներն իրենց սպասեցնել չտվեցին:

Պետության ղեկավար, ով զրո ներդրում է ապահովել,
ու հայտարարում է, թե նախկիններից ծանր ժառանգություն է ստացել, բայց անխնա զբաղված է բյուջեն վատնելով եւ միլիարդավոր պարգեւավճարներ յուրայիններին բաշխելով:  Եւ զավեշտալի է, երբ Նիկոլ Փաշինյանը խոսում է «անհատական պատասխանատվության» մասին ու քաղաքացիներին հորդորում նման վերաբերմունք դրսեւորել այս իրավիճակում:

Եւ այդուհանդերձ, անկախ ամեն ինչից լավ կլինի՝ ամեն ինչ այնպես գնա, որ հանրաքվեն կայանա ու Նիկոլ Փաշինյանը առերեսվի իրականությանը, որից հետո դժվար թե սեփական պատասխանատվությունն այլոց գրպանը գցելու շանս կունենա:

Անի Սահակյան