Կորոնավիրուսի լյուստրացիա. ո՞վ է փակել հայ—վրացական սահմանը

Հայ-վրացական սահմանը10 օրով փակվել է ։ Կողմերի փոխադարձ համաձայնությամբ Հայաստանն ու Վրաստանը որոշել են մարտի 14-ի առավոտյան ժամը 08:00-ից սկսած ժամանակավորապես կասեցնել երկու երկրների միջև քաղաքացիների տեղաշարժը: Այս մասին հայտնել է Հայաստանի փոխվարչապետ Տիգրան Ավինյանը:
Միաժամանակ, երկու երկրները կապահովեն հայրենիք վերադառնալու ցանկություն հայտնած քաղաքացիների անարգել մուտքը իրենց երկիր:
Այս սահմանափակումները տարածվում են տրանսպորտի բոլոր տեսակների վրա:
Սահմանափակումները չեն տարածվում բեռնափոխադրումների վրա:
Հայցում ենք բոլորիդ ներողամտությունը պատճառած անհարմարության համար։ Համոզված եմ՝ առկա է համընդհանուր գիտակցում, որ այս քայլերը ձեռնարկում ենք բացառապես հանրության անվտանգությունն ապահովելու նպատակով>>, նշել է Ավինյանը։
Փաստորեն, այս պահին Հայաստանը ցամաքային բաց սահման չունի ոչ մի պետության հետ։ Տնտեսությունը անխուսափելիորեն վնասներ է կրելու: Վրաստանը մեր երկիրը արտաքին աշխարհին կապող միակ ցամաքային ճանապարհն է: Զբոսաշրջային հոսքը Հայաստան է գալիս հիմնականում Վրաստանով, բացի այդ Վրաստանում մեծ հայկական բնակչություն կա, հայաբնակ Ջավախքը ակտիվ կապի մեջ է Հայաստանի հետ: Տրանսպորտային սահմանափակումը նրանց համար ևս բացասական հետևանք կունենա:
Ուշագրավ է, որ սահմանի փակման նախաձեռնությունը կարծես թե վրացական կողմից է եղել:
Վարչապետ Նիկոլ Փաշինյանը ֆբ ուղիղ եթերում հայտարարել է, որ փակման որոշումը կայացվել է փոխադարձ Վրաստանի հետ համատեղ քննարկման արդյունքում: Քննարկում, անշուշտ, եղել է: Բայց վրացական ԶԼՄ-ները դեռ կեսօրից էին գրում Հայասանի սահմանի փակման մասին: Ըստ էության, հայկական կողմը, տեղեկանալով, որ վրացիները սահմանը փակելու են, առաջարկել է որոշումը ներկայացնել որպես համատեղ քննարկման արդյունք:
Իսկ ինչու է Վրաստանը նախաձեռնել Հայաստանի սահմանի փակումը, եթե Հայաստանում ընդամենը կորոնավիրուսով 13 վարկված կա, իսկ մահվան դեպք դեռ չի գրանցվել:
Ըստ ամենայնի` հարևան երկիրը Հայաստանի համաճարակային վիճակի մասին այլ տեղեկատվություն ունի և այն տարբերվում է մեզ ներկայացված պաշտոնական թվերից, հակառակ պարագայում Վրաստանը նման քայլի չէր գնա:
Ի դեպ, վարչապետ Փաշինյանը նաև անկեղծացավ, թե ինքն ու տիկինը մեկ օրով ինքնամեկուսացվել են Սևանում: Բանն այն է, որ Աննա Հակոբյանը Մարտի 8-ին հանդիպել և ողջագուրվել է Բրազիլիայի առաջին տիկնոջ հետ, որը, ինչպես ավելի ուշ հայտնի դարձավ, վարկված է կորոնավիրուսով: Հայտնի է նաև, որ Նիկոլ Փաշինյանն ու Աննա Հակոբյանը մարտի 14-ի առավոտյան կորոնավիրուսի թեստ կհանձնեն:
Այսինքն` Հայաստանում ստեղծված վիճակը մասամբ նաև վարչապետի ընտանիքով է պայմանավորված:

Հայկ Դավթյան

Հ.Գ. Ընդամենը մի քանի օր առաջ վարչապետ Փաշինյանն ասում էր, թե մեր երկրում կորոնավիրուս չկա` թու-թու-թու: Փաստորեն ` թու-թու-թու-ն չօգնեց, վիրուսն եկավ Հայաստան: