Չգիտեմ, թե կորոնավիրուսն ո՛ւմ շունն է, բայց ինտենսիվ աղոթեք, որ ձեր վրա չհաչա

Վարչապետ Փաշինյանը, այսպես ասեմ՝ ինքնատիպ պատկերացում ունի սուր-վարակիչ հիվանդությունների, դրանց տարածման, տարածումը կանխելու միջոցների մասին: Չափազա՛նց ինքնատիպ:

Այ, օրինակ, աշխարհով մեկ արդեն տարածվել է կորոնավիրուսը, է՛լ ավելի սաստիկ տարածվել է դրա տարածման խուճապը: Իսկ մեր երկրի մշտահեղափոխական վարչապետն ասում է՝ կորոնավիրուսն ո՞ւմ շունն է, թու-թու-թու...

Ի տարբերություն Նիկոլ Փաշինյանի՝ ես չգիտեմ, թե կորոնավիրուսն ո՛ւմ շունն է: Բայց տեսնում եմ, որ այդ «շունը» որ երկրում թեկուզ մի թեթև հաչում է, այդ երկրներում արտակարգ միջոցների են դիմում, կարանտին են հայտարարում, ուղևորափոխադրումներն են կրճատում կամ դադարեցնում, դպրոցներ ու համալսարաններ են արձակուրդ ուղարկում: Մի խոսքով, կարանտինային խիստ միջոցների են դիմում, որպեսզի հնարավորինս նվազեցնեն ու սահմանափակեն մարդկանց շփումը, մարդկային մեծ հոսքերն ու կուտակումները:

Իսկ Հայաստանո՞ւմ ինչ են անում: Ճի՛շտ է, իշխանության ու անձամբ վարչապետ Նիկոլ Փաշինյանի գլխավորությամբ անկապ հանրաքվեի քարոզարշավ են անում, միտինգներ, քաղաքային ու գյուղական հրապարակներում մարդկանց են բերում-կուտակում, երեխաների, դպրոցականների, այդ թվում: Մի խոսքով՝ Հայաստանում անում են հակառակը այն բանի, ինչ անում են հետամնաց ու վախվորած Չինաստանում, Իրանում, Իտալիայում, բժշկությունից հեռու ԱՄՆ-ում ու անկազմակերպ Դանիայում, դեռ մնացածին էլ չհաշված: Դա կորոնավիրուսի դեմ պայքարի կրեաԾիվ ու «թավշյա՜, ոչ բռնի» եղանակ է. որքան շատ մարդկանց իրար գլխի հավաքենք, այնքան արագ կկանխվի կորոնավիրուսի տարածումը: Չէ՞ որ նա, այդ կոռումպացված, հանցավոր կորոնավիրուսն ո՞ւմ շունն է, որ...

Հայաստանի իշխանավորները իրենց ձևերն ունեն կորոնավիրուսի հախից գալու. ՀՔԾ պետն ու «հեղափոխության պահապանները» վիրուսի ձեռքերն ամուր բռնում են, Ստյոպա Սաֆարյանն ու Անդրանիկ Քոչարյանն անակնկալ տրորում են էդ վիրուսի ոտքերը, դրա աչքերը ցավից չռվում են, և հենց այդ պահին մոտենում է Նիկոլ Փաշինյանն ու վիրուսի չռված աչքերի մեջ նայելով ասում՝ «թու-թու-թու»... Մահու չափ սարսափահար եղած վիրուսը թողնում ու փախչում է դեպի Արևելք ընկած հարևան երկիր...

Իսկ եթե լուրջ: Բայց հնարավո՞ր է լուրջ վերաբերվել կառավարության ղեկավարի մակարդակով դրսևորվող անլրջությանը: Եթե լուրջ, ապա կորոնավիրուսի տարածման վտանգը առկա է ու իրական է: Այնքան իրական, ինչպես պաշտոնապես հաստատված վարակման 4 դեպքը: Ու ցանկացած կառավարության, իշխանության (լինի այն ժողովրդական, բռնատիրական, միապետական, պառլամենտական և այլն) գլխավոր խնդիրն է կանխել մարդկային կուտակումները, այլ ոչ թե հանրահավաքներ նախաձեռնել ու մարդկանց կուտակումներ ստեղծել: Իսկ ո՞վ կարող է վստահ լինել, որ Փաշինյանի քարոզարշավի համար հավաքված բազմության մեջ ոչ մեկն այդ չարաբաստիկ վիրուսի կրող չէ: Առողջապահության նախարարից տեղեկա՞նք ունեն, ի՞նչ է: Թե՞ դա այդպիսի «հայկական ռուլետկա» է, թու-թու-թու ասենք, ու... ինտենսիվ աղոթենք, որ վիրուսը բոլորին շրջանցի:

Հա, էլի, այդ Առողջապահության համաշխարհային կազմակերպությունում բժշկությունից ու վարակներից ի՛նչ են հասկանում, որ մի հատ էլ պանդեմիա են հայտարարում կորոնավիրուսի հետ կապված: Այ, պողոսների մեծն առաջնորդ Նիկոլ Փաշինյանը բոլորից լավ է հասկանում, թե ինչպես է պետք կորոնավիրուսի հախից գալ. պետք է հնարավորինս շատվորով հավաքվել, իրար վրա փռշտալ ու արտաշնչել: Ու՝ վերջ:

Կարճ ասած, համարյա անեկդոտ է:

2020 թվական, մարտ, մեր օրեր: Աստված վերից նայում է, տեսնի՝ ինչ կա-չկա: Տեսնում է Պարսկաստանում դիմակներով են մարդիկ ման գալիս, լրիվ հիմնարկները փակ, կարանտին, մի խոսքով: Նայում է Հռոմի կողմը՝ ֆուտբոլիստները դատարկ ստադիոններում են գլադիատորություն անում, ու առհասարակ, Եվրոպայով մեկ կարանտին է: Նայում է Ամերիկայի կողմը՝ լրիվ փակ, ոչ ավտո է գնում-գալիս, ոչ էլ ինքնաթիռ...

Նայում է Հայաստանին ու ի՜նչ տեսնի. Հանրապետության հրապարակում մի 50 հազար հոգի իրար գլխի են հավաքված, մորուքավոր մեկն էլ ելույթ է ունենում.

-Կորոնավիրուսն ո՞ւմ շունն ա... Էկեք էս մի փռշտոցով էլ հավաստենք մեր ազգի բարձր իմունիտե՜տը, դըմփ-դըմփ թու, դըմփ-դըմփ թո՜ւ...

Աստված բժշկական շնչադիմակը հանում է, երկու ձեռքով գլուխը բռնում ու.

-Ա-աա՜, էս հայերն էլի հույսն իմ վրա են դրել:

Հա-փչիիի՜...

Արմեն Հակոբյան