Քաոսից հետո երկրորդ հավանական քայլը

Մարտի 12-ին ՀՀ պաշտպանության նախարար Դավիթ Տոնոյանն ընդունել է ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին:

Տոնոյանը դեսպանին է ներկայացնել հայ-ադրբեջանական պետական սահմանին և արցախա-ադրբեջանական ուժերի շփման գծում տիրող իրավիճակը, հրադադարի ռեժիմի խախտման հաճախականությունն ու բնույթը: Նա մասնավորապես, մտահոգություն է հայտնել վերջին օրերին հայ-ադրբեջանական պետական սահմանի որոշակի հատվածներում հակառակորդի գործողությունների աշխուժացման փորձերի կապակցությամբ:

Դավիթ Տոնոյանը նշել է, որ տարածաշրջանային ռազմաքաղաքական զարգացումները, միջազգային տնտեսական, համաճարակային վիճակը, եղանակային պայմանները և մի շարք այլ գործոններ մեծացնում են իրավիճակի ապակայունացման հավանականությունը: Այս առումով պաշտպանության նախարարը կարևորել է լարվածության թուլացման միջոցառումների շուտափույթ իրականացումը՝ նոր սադրանքները բացառելու առումով:

Ըստ էության, Տոնոյանը հասկացրել է, որ ամեն պահի Ադրբեջանից կարող են ռազմական գործողություններ սկսվել՝ առաջ քաշելով մի քանի գործոններ: Պարզ է, որ Տոնոյանը նկատի ունի այն, որ Ադրբեջանի նավթի գների հետ անկման արդյունքում չի բացառվում տնտեսության փլուզումը: Նման հեռանկարի դեպքում Ալիևը կարող է դիմել սադրանքի, որպեսզի ուշադրությունը շեղի դժոգհություններից:

Պատերազմի հավակնությունն, այսպիսով, ամենևին էլ չի կարելի բացառել: Ադրբեջանը երկրի ներսում քաոտիկ իրավիճակից կարող է օգտվել:

Ի դեպ, ԵԱՀԿ Մինսկի խմբում համանախագահող Ռուսաստանը, ևս, կարծես չի բացառում իրավիճակի սրումը շփման գծում և սահմաններում:
Ռուսաստանի ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ ասել է, որ հայ-ադրբեջանական սահմանին հետագա էսկալացիան անթույլատրելի է։

Ավելին՝ նա հայտնել է, որ Մոսկվան անհանգստացած է Հայաստանի ու Ադրբեջանի սահմանին իրավիճակի սրացմամբ և կոչ է արել կողմերին զուսպ լինել ու զերծ մնալ ուժ կիրառելուց։

«Ցավոք, սահմանին ու շփման գծում շարունակվում են հրադադարի ռեժիմի խախտման դեպքեր գրանցվել։ Դրա հետևանքով զոհեր ու վիրավորներ կան։ Կուզենայի ցավակցությունս հայտնել զոհերի հարազատներին ու մտերիմներին», – ասել է Զախարովան։ ՌԴ ԱԳՆ պաշտոնական ներկայացուցիչը նշել է, որ երկու կողմերն էլ պետք է ակտիվացնեն բանակցային գործընթացը, որն ուղղված է քաղաքական գործողությունների միջոցով հակամարտության կարգավորմանը։

Հիշեցնենք, որ մարտի 10-ին, մոտ 15։30, հարավ-արևմուտքում տեղակայված զինվորական մասերից մեկի ուղղությամբ հակառակորդի կողմից կրակոցի հետևանքով կրծքավանդակի շրջանում մահացու վիրավորվել էր պայմանագրային զինծառայող, շարքային, 1984թ․ ծնված Զոհրաբ Սիանոսյանը։

Զախարովայի խոսքով՝ լարվածության աճը հակասում է հրադադարի ռեժիմի պահպանման վերջին պայմանավորվածություններին և քաղաքական ճանապարհով հակամարտության կարգավորմանը հասնելու մտադրությունների մասին հայտարարություններին:

Նկատենք նաև, որ ադրբեջանական կողմն ակնհայտորեն անցել է հայ-ադրբեջանական սահմանին պարբերական սադրանքների կիրառմանը: Օրերս գնդակոծվել էր Տավուշի մարզի Ոսկեպար գյուղը։

Ադրբեջանում սոցիալ-տնտեսական վիճակը, քաոսը ցրելու միակ տարբերակը Ալիևի համար կարող է պատերազմը դառնալ: Հետևաբար, պետք է չկորցնել զգոնությունը և պատրաստ լինել ցանկացած զարգացման՝ դիմագրավելու ադրբեջանական կողմի հնարավոր սրացման քայլերին:

Մետաքսյա Շալունց