The New York Times. Ղարաբաղյան լեռնային գյուղը կանչում է իր մոտ

The New York Times թերթն անդրադարձել է Լեռնային Ղարաբաղի Խծաբերդ գյուղին՝ հրապարակելով լուսանկարչուհի Անահիտ Հայրապետյանի աշխատանքները: Ինչպես գրում է թերթը՝ լուսանկարչուհին Լեռնային Ղարաբաղում գտնվող իր հայրենի գյուղի հետ կապը պահպանելու համար փորձում է որտեղ էլ որ լինի՝ Skype-ով միանալ գյուղում ապրող իր տատի հետ: «Եթե գնաք այդտեղ, կիմանաք՝ ով եմ ես և ինչու եմ ես այսպիսին: Դա գեղեցիկ հանգստավայր չէ: 40 ընտանիքից բաղկացած փոքր գյուղ է՝ իրար չափազանց մոտ գտնվող հին տներով: Եկեղեցին այրվել է և երբեք չվերակառուցվեց: Բայց ես ինձ նման եմ այնտեղ», - պատմել է 34-ամյա լուսանկարչուհին։ Այնուհետ The New York Times-ը պատմում է, թե ինչպես սկսվեց Ղարաբաղյան պատերազմը և ինչպես կնքվեց 1994 թվականի հրադադարը: Թերթը հիշեցնում է անցած ամիս կրկին ակտիվացած ռազմական գործողությունների մասին: Անահիտ Հայրապետյանը սկսել է լուսանկարել Խծաբերդը և շրջակա գյուղերը 2006 թվականից: «Այնքան կորուստ ու ցավ կա ամեն ընտանիքի պատմության մեջ»,- ասում է նա: Նա պատմել է, որ եթե ընտրություն ունենար, կապրեր Խծաբերդում, որտեղ գիտի բոլորի անունները և նրանց նախնիների պատմությունները: