Քանի սանիկը կա, քավորը պրոբլեմ չի ունենա
Ամիսներ շարունակ լրատվամիջոցները գրում են այն մասին, թե ինչպիսի ջանքեր են գործադրում իշխանությունն ու հատկապես Նիկոլ Փաշինյանը, որպեսզի վարչապետի քավորը դառնա Իջեւանի քաղաքապետ: Անցած տարի իշխանությունը քրեական գործ հարուցեց արդեն նախկին քաղաքապետի դեմ, որից հետո նա ստիպված եղավ հեռանալ ու ժամանակավոր պաշտոնակատար նշանակվեց Փաշինյանի քավոր Հայկ Ղալումյանը, ով ԶԼՄ-ների տեղեկացմամբ առանձնապես ոչ մի հատկանիշով աչքի չի ընկել, մարզում չունի այնքան հեղինակություն, որ գոնե վարչապետի քավորը լինելու փաստի շնորհիվ դառնա քաղաքապետ: Այդ պատճառով մի քանի անգամ քաղաքապետի ընտրությունները հետաձգվեցին, քանի որ իշխանությունը գտավ քավորի փրկության բանալին: Իջեւանին կմիանան եւս 19 համայնք, տեղի կունենա խոշորացում ու միավորված համայնքներում հեշտ կլինի թվեր նկարել:
Հեղափոխականները, որ թավշյա հեղափոխությունից հետո եւս քննադատում էին խոշորացման գործընթացը ու հայտարարում, որ այն քաղաքական նպատակով է իրականացնում, այսօր գնում է նախկինների ճանապարհով, վարչատարածքային բաժանման մասին օրենքում առաջարկվող այդ փոփոխությունը բխում է ոչ թե ժողովրդի ու համայնքների զարգացման, այլ կոնկրետ անձանց շահերից:
Հայաստանի համայնքների միության նախագահ Էմին Երիցյանը խոշորացման թեմայով Ազգային ժողովում հրավիրված լսումների ժամանակ հետաքրքրվեց ՝ խորհրդարանական լսումներին մասնակցո՞ւմ են Իջևանի տարածաշրջանի 19 խոշորացվող համայնքների ներկայացուցիչները: Սակայն պարզվեց, որ դահլիճում Իջևանի այդ համայնքներից ներկայացուցիչներ չկան:
Հարց է առաջանում՝ ինչու են հրավիրել այս լսումները, միավորվող համայնքների կարծիքները չպիտի իմանան: Տարածքային կառավարման նախարարության ներկայացուցիչը , իհարկե, նշեց, որ հանդիպումներ եղել են այդ համայնքներում.<<Այդ բոլոր քննարկումների արդյունքները հաշվի են առնվել, և համադրվել են բոլոր հնարավոր տարբերակները, մոտեցումն այս ձևաչափով է եղել»։
Եթե այդպես է, ուր են այդ համայնքապետերը, ինչու չեն եկել իրենց խանդաղատանքը արտահայտեն երկրի թիվ մեկ ամբիոնից: Պատասխանը հայտնի է, իրականում գործընթացն արվում է ի հեճուկս բնակչության եւ հանուն քավորի:
Անի Սահակյան
Հետևեք մեզ Viber-ում
