Նիկոլի «լապշաները» մեր ականջներին
Նկոլ Փաշինյանը երկրի ղեկավարի համար հատկացված ուղղաթիռով մեկնել է Սյունիք՝ իրականացնելու Այո-ի քարոզարշավ, այն դեպքում, երբ նա պաշտոնապես գտնվում է արձակուրդում:
«Ովքեր չեն նկատել, ասեմ` Մեղրիից այստեղ եմ եկել պետական մեքենայով։ Ինչո՞ւ եմ եկել պետական մեքենայով, որովհետև չեմ կարող չգալ։ Որովհետև «ոչիստների» ժամանակ ընդունված օրենքի համաձայն` վարչապետը համարվում է հատուկ պահպանության ենթակա պաշտոնյա և նույնիսկ չի կարող հրաժարվել այդ պահպանությունից։ Եթե վերաձևակերպելու լինենք Օստապ Բենդերի խոսքերը, ուղղաթիռը ճոխություն չէ, այլ փոխադրամիջոց: Եվ եթե պետք է ինչ-որ տեղ գնալ ուղղաթիռով, այս նույն մեքենան էլ ճոխ մեքենա է: Պետական պահպանության ենթակա անդամներին տրամադրվում են փոխադրամիջոցներ, որոնք պետք է համապատասխանեն անվտանգության ինչ-որ չափանիշների: Որ գրում են՝ ուղղաթիռով գնաց, այդ ուղղաթիռը պետական սեփականություն է, իմիջիայլոց, նաև ինքնաթիռը, մեքենան»,– հայտարարել է Փաշինյանը՝ անդրադառնալով խնդրին:
Փաշինյանի խոսքով` այդ ուղղաթիռը պարտադիր թռիչքային ժամեր ունի, աշխատանքային վիճակի լինելու իր արժեքը չկորցնելու համար պետք է թռչի:
«Ես ամիսներով չեմ օգտագործում, վերջին անգամ մի 4 ամիս առաջ եմ ուղղաթիռով գնացել: Ուղղաթիռի անձնակազմը պետք է դատարկ այդ ուղղաթիռը բարձրացնի, թռցնի, աշխատացնի, որպեսզի այդ ուղղաթիռը չփչանա: Այսինքն` նյութ եմ տալիս, կարող են ասել՝ առանց վարչապետի ուղղաթիռը թռցնում են պետբյուջեի հաշվին»,- նշել է նա։
Փաշինյանի այն պնդումը, թե ինքը պետական պահպանություն ունեցող պաշտոնյա է և օրենքով, անվտանգության նկատառումներից ելնելով, նա կարող է անգամ արձակուրդի ժամանակ օգտվել երկրի ղեկավարին տրված բոլոր արտոնություններից, սովորական «լապշա է», որ նա հաջողությամբ կախում է հասարակության ականջներից:
Վարչապետը, պետական պահպանության ներքո գտնվելով հանդերձ, կարող էր ծառայողական զրահապատ մեքենայով մեկնել Սյունիք և ոչ թե ուղղաթիռով, որի ծախսը մի քանի անգամ ավել է մեքենայի ծախսից: Իսկ վարչապետի հետ միասին Այո-ի քարոզարշավ իրականացնող մյուս բարձրաստիճան պաշտոնյաները ծառայողական մեքենաներով Սյունիք մեկնելու իրավունք ընդհանրապես չունեին: Նրանք պետք է իրենց ծառայողական մեքենաները՝ վարորոդներով հանդերձ, թողնեին Երևանում և Սյունիք մեկնեին Այո-ի շտաբի փոխադրամիջոցներով:
Իսկ ինչ է արել Նիկոլ Փաշինյանը. վերցրել է պետական ուղղաթիռը, յուրայինների հետ միասին թռել Ագարակ: Բայց չէ, որ Այո-ի քարոզչության համար դրամահավաք էր արվել, փող է հավաքվել, որը նախատեսված է հենց քարոզարշավի ժամանակ ծախսելու համար: Բացի այդ գումարներից՝ ոչ մի լումա այլ տեղից և այլ միջոցներից չպետք է ծախսվի: Հատուկ պետական պաշտպանության ենթակա անձանց անվտանգության ապահովման մասին օրենքում ոչ մի տեղ չի նշված, որ վարչապետի պետական պահպանության համար պետական ռեսուրսը կարող է ծառայեցվել իշխանության քարոզարշավի համար: Այն, ինչ արել է Նիկոլ Փաշինյանը, վարչական ռեսուրսի օգտագործում է, և թող չփորձեն դա կապել պետական պահպանության հետ:
Ուղղաթիռը նախատեսված է պետության ղեկավարների տեղափոխման համար՝ պետական անհրաժեշտության հրատապ դեպքերի ժամանակ: Եթե Նիկոլ Փաշինյանը արձակուրդի մեջ է, դա չի նշանակում, թե ուղղաթիռը ևս արձակուրդում է գտնվում: Արձակուրդի մեջ գտնվող պետության ղեկավարին փոխարինող անձ կա, որը պետական կարիքների համար իրավունք ունի օգտագործել այդ ուղղաթիռը: Իսկ արձակուրդում գտնվող վարչապետը պետք է բավարարվեր ծառայողական մեքենայով, որովհետև ուղղաթիռը, ի տարբերություն մեքենայի, անձնական ծառայողական փոխադրամիջոց չի համարվում:
Այնպես որ՝ Օստապ Բենդերի ցիտումը պետք է ճիշտ հակառակը կարդալ՝ ուղղաթիռը ճոխություն է, ոչ թե փոխադրամիջոց, ավելին՝ այն վարչական ռեսուրսի չարաշահում է:
Ինչ վերաբերում է ուղղաթիռի՝ պարտադիր թռիչքներ անելու անհրաժեշտությանը. պետությունը Նիկոլ Փաշինյանի սեփականությունը չէ: Եթե ուղղաթիռը իսկապես պարտադրված է թռչել, թեև որևէ մասնագետ մինչ այժմ նման փորձագիտական կարծիք պաշտոնապես չի ներկայացրել, կարող է մեկ-մեկ հեռավոր մարզերից հիվանդների տեղափոխել Երևան:
Հայկ Դավթյան
Հետևեք մեզ Viber-ում
