Նիկոլի նեմեցներին, շմայսներին և կուկուներին հավաքելու ժամանակը

 Եղեգնաձորում դաժանաբար ծեծված փոխգնդապետ Արա Մխիթարյանի գործով մեղադրյալը 1,5 մլն դրամ գրավի դիմաց ազատ է արձակվել: Մեղադրյալ Զավեն Գրիգորյանը Վայոց Ձորի նախկին մարզպետ Տրդատ Սարգսյանի օգնականի եղբայրն է:

Նրան ազատ արձակելու որոշումը կայացրել է Վերաքննիչ քրեական դատարանի դատավոր Արմեն Դանիելյանը, ով համարվում է վատագույն վարկանիշն ունեցող դատավորը։ Արմեն Դանիելյանը 2019 թ.-ին եղել է ամենացածր վարկանիշն ունեցող դատավորը՝ 43 միավորով։ Թեև 2020 թ. նոր է սկսվել, բայց Դանիելյանն այս պահի դրությամբ կրկին համարվում է ամենացածր վարկանիշն ունեցող դատավորը՝ 14 միավորով։ Դանիելյանը ունի իշխանահաճո դատավորի համարում: 

Փոխգնդապետ Արա Մխիթարյանը, հիշեցնենք, որ դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում։ Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեև մամուլի տեղեկություններով` փոխգնդապետի նկատմամբ կիրառված բռնությանն անմիջական մասնակցություն է ունեցել նաև նախկին մարզպետը: Միջադեպին մարզպետի ներկայության հանգամանքը իրենց ցուցմունքներում պնդել են նաև 3 վկաները, սակայն նրա նկատմամբ մեղադրանք չի առաջադրվել: Իսկ միակ մեղադրյալը, փաստորեն, արդեն ազատության մեջ է։
Իսկ դաժանաբար ծեծի ենթարկված հայոց բանակի սպան ավելի քան 6 ամիս է, ինչ գտնվում է կոմայի մեջ։ Բժիշկները նրա վիճակը գնահատում են ծայրահեղ ծանր, այն աստիճանի, որ այս ամիսներին անգամ նպատակահարմար չի համարվել նրան տեղափոխել արտերկիր:
Արա Մխիթարյանի հայրը հայտարարել է, որ չի պատրաստվում համակերպվել կատարվածի հետ, և եթե դատախազությունը չբողոքարկի դատավորի որոշումը, և մեղադրյալը կրկին չհայտնվի բանտում, ապա ինքը բողոքի գործողություններ է նախաձեռնելու, գնալու է մինչև վերջ՝ ընդհուպ մինչև եվրոպական դատարան և Եվրոպական խորհուրդ, դեսպանատներ և այլ միջազգային ատյաններ: <<Առաջին գծում կանգնած սպան ավելի պաշտպանված է, քան երկրի ներսում ներքին թուրքի առաջ կանգնած սպան: Ես իմ տղային ուղարկել եմ Մոսկվա, հետո նաև Լենինգրադ սովերելու, որ հետո գա հայրենիքը պաշտպանի: Իսկ հիմա ինչ-որ մարդիկ կարող են ոհմակով հարձակվել ու ջարդել իմ տղային, հետո էլ ասել՝ ինչ ուզենք, ոնց ուզենք, կանենք: Չեմ լռելու, մինչև վերջ գնալու եմ>>,- հայտարարել է կոմայի մեջ գտնվող փոխգնդապետի հայրը:

Նա պատրաստվում է առաջիկա հինգշաբթի օրը բողոքի ակցիա կազմակերպել կառավարության շենքի դիմաց: Հետաքրիքր է, թե ինչպես է իրեն զգում դատարանների անկախության մասին երազող Նիկոլ Փաշինյանը: Ի վերջո, որն է Վայոց Ձորի նախկին մարզպետի հետ սերտ առնչություն ունեցեղ Զավեն Գրիգորյանը, հանցավոր արարքից սեփական կաշին փրկած նախկին մարզպետի և նախկին իշխանություններին սպասարկող շմայսների, նեմեցների ու կուկուների տարբերությունը: Ժամանակին, երբ ՀՖՖ նախկին նախագահ Ռուբեն Հայրապետյանի թիկնապահները ծեծելով սպանել էին ռազմական բժիշկ Վահե Ավետյանին, հանրությունը իրավացիորեն ընդվզեց: Ի դեպ, Հայրապետյանի թիկնապահները դատապարտվեցին ազատազրկման: Փաշինյանը հասկանում է, որ նույն միասնականությամբ պետք է դատապարտվի նաև Արա Մխիթարյանին կոմայի հասցրած հանցավոր խումբը, թե՞ որոշել են յուրայիններին ամեն ինչ ներել: Այդ ինչպե՞ ս է ստացվել, որ ծանր հանցանքի մեջ մեղադրվողը ընդամենը 1,5 մլն դրամով ազատ է արձակվել, երբ ավելի թեթև հանցավոր արարքի մեջ մեղադրվող մի շարք անձինք, ընդ որոմ նաև այնպիսի անհատներ, որոնք կենսագրություն և հետագիծ ունեն, երկրի և պետության համար արած գործ ունեն, անհամեմատ ավելի բարձր գումարներով ազատություն չեն ստանում:

Ըստ ամենայնի մենք թևակոխում ենք Նիկոլի նեմեցների, շմայսների և կուկուների ժամանակաշրջան:

Հայկ Դավթյան