Լռում է ոչ միայն ՀԱՊԿ-ն, այլ նաեւ ՀՀ իշխանությունը

«168 ժամ» թերթը գրում է. «Երեկ առավոտյան ժամը 05:30-ի սահմաններում, ՀՀ հյուսիս-արեւելյան ուղղությամբ տեղակայված մարտա­կան դիրքերից մեկի ուղղությամբ ադրբեջանական զինծառայողները ձեռնարկել են դիվերսիոն ներթափանցման փորձ:

Պաշտպանության նախարարության տարածած հաղորդագրության համաձայն՝ դիրքապահ անձնակազմի գրագետ գործողությունների շնորհիվ հակառակորդը, կորուստներ տալով, հետ է շպրտվել իր ել­ման դիրք՝ թողնելով զինամթերք եւ ականորսիչ սարք: Հայկական կողմը կորուստներ չունի, գործողություննե­րի արդյունքում թեթեւ վիրավորում է ստացել մեկ զինծառայող:

Վերջին մեկ շաբաթվա ընթացքում Հայաստա­նի հյուսիսային սահմանի ուղղությամբ Ադրբեջանի կողմից սահմանամերձ բնակավայրերի գնդակոծումները խիստ հաճախակիացել են, դրանց շարունակությունն էլ դարձել է երեկվա դիվերսիոն փորձը: Բայց հե­տաքրքիր է, որ Իլհամ Ալիեւին «կիրթ» համարողՆիկոլ Փաշինյանի իշխանության որեւէ ներկայացուցիչ այս մի­ջադեպերի վերաբերյալ ոչինչ չի խոսում:

Չեն հնչում դատապարտող հայտարարություններ ոչ միայն Ադրբե­ջանի հասցեին, այլ նաեւ առ Հավաքական անվտանգության պայմանագրի կազմակերպություն՝ ՀԱՊԿ, որի անդամ է Հայաստանը, եւ որը պայմանագրային պարտավորություններ ունի՝ անդամ երկրների տարածքի դեմ ոտնձգությունների դեպքում ձեռնարկել համարժեք գործողություններ:

ՀԱՊԿ-ն, սակայն, ինչպես նախկինում, այնպես էլ այսօր Հայաստանի տարածքի դեմ կատարված ոտնձգությունները դատապարտող հայտարարու­թյուն անգամ չի անում: Բայց իրավիճակի նրբությունն այն է, որ նախկին իշխանությունների ժամանակաշրջա­նում այսօրվա իշխանական նախկին ընդդիմադիրները մեղադրում էին իշխանություններին այն բանում, որ ՀԱՊԿ-ն չի կատարում իր պարտավորությունները:

Այսօր, սակայն, ՀԱՊԿ-ին որեւէ մեկը չի մեղադրում ու ՀԱՊԿ-ից Հայաստանի որեւէ իշխանավոր ոչինչ չի պահանջում: Որովհետեւ մեղադրել ՀԱՊԿ-ին, նշանակում է անուղղակիորեն մեղադրել առաջին հերթին Ռուսաստանին, որի հետ հարաբերությունների հարցում այդքան քնքույշ ու դողդոջուն զգացմունքներ ունեն Հայաստանի նոր իշխանությունները»:

Առավել մանրամասն՝ թերթի այսօրվա համարում