Իշխանության ներսի ՀՀԿ-ն
Գործող իշխանությունը օրենքներ խախտելու ռեկորդներ է սահմանում: Այսօր հերթը Տարածքային կառավարման եւ ենթակառուցվածքների նախարար, սահմանադրական հանրաքվեի Այո-ի շտաբի ղեկավար Սուրեն Պապիկյանինն էր, նա օրենքը խախտեց թիվ մեկ օրենսդիր մարմնում՝ ԱԺ ամբիոնից: Աժ-ում կառավարության անդամենրի և պատգամավորների հարց ու պատասխանի ժամանակ «Իմ քայլը» խմբակցության պատգամավոր Հայկ Գևորգյանը Պապիկյանից հետաքրքրվեց, թե որքանով են իրականությանը համապատասխանում այն հայտարարությունները, որոնց համաձայն մարզպետներն իրենց մոտ են կանչում ենթականերին ու հրամայում աշխատել «Այո»-ի օգտին։ «Ես բացառում եմ որ մեր քաղաքական ուժի, «Այո»-ի շտաբի, առավել ևս Տարածքային կառավարման և ենթակառուցվածքների նախարարության որևէ ներկայացուցչի կողմից կարող է լինել նման հրահանգ։ Նման հրահանգ չի եղել։ Ես նաև հայտարարել եմ, որ որևէ համայնքապետ թող արջի ծառայություններ չմատուցի։
Բայց, քանի որ կա մանիպուլյացիայի որոշակի հիմք կամ քողարկված մանիպուլյացիա ես ուզում եմ նաեւ Ձեր հարցերին պատասխանել։ Չգնանք այն դաշտ որ մենք պաշտպանվում ենք։ Հայաստանի քաղաքացուն տրված է հնարավորություն քվեարկել իր մտքով, խղճով ու կամքով։ Մենք մեր լիազորությունները չշրջանցելով միեւնույն ժամանակ տուրք չեն տալու Ձեր մանիպուլացիաներին»,-նշեց Պապիկյանը։
Նախարարի ելույթից հետո «Լուսավոր Հայաստան» խմբակցության քարտուղար Գևորգ Գորգիսյանը դիտողություն արեց այն մասին, որ Պապիկյանն իր լիազորությունները կատարելիս քարոզչություն իրականացրեց։
«Պարոն Պապիկյան․ եկեք արձանագրենք, որ ձեր պոշտոնեական լիազորությունները կատարելիս հենց հիմա դուք քարոզչություն էիք անում, ինչն օրենքում արգելված է։ Հուսով եմ սա չի շարունակվելու։ Հարց ու պատասխանի նիստերի դահլիճում ներկա գտնվելը բխում է պաշտոնական լիազորություններից և նախարարի լիազորությունները չի սահմանվում ժամերով»,- նկատեց Գորգիսյանը՝ ի պատասխան կառավարական օթյակից հնչող հրճվալից բացականչություններին, թե աշխատանքային ժամն արդեն ավարտված է: Խորհրդարանից դուրս իրավաբանները Պապիկյանի ելույթից հետո նույնպես արձանագրեցին, որ նա օրենք է խախտել՝ Հանրաքվեի մասին օրենքը: Նա հանդես գալով ի պաշտոնե՝ որպես ՀՀ կառավարության անդամ, ու այդ կարգավիճակով Ազգային ժողովում մասնակցելով ՀՀ Սահմանադրության 112-րդ հոդվածով սահմանված ընթացակարգին (կառավարության անդամների հետ պատգամավորների հարցուպատասխան), ԱԺ ամբիոնից իրականացրել է «այո»-ի ուղիղ քարոզչություն։
Այն «բացատրությունը», որ փաստը տեղի է ունեցել ժամը 18:00-ից հետո, հետևաբար՝ քարոզչությունը թույլատրելի էր, ամբողջովին հիմնազուրկ է, քանի որ եթե անձը հանդես է գալիս ի պաշտոնե (որպես պաշտոնատար անձ)՝ ինչպես տվյալ դեպքում էր, որևէ նշանակություն չունի օրը կամ ժամը։ Ինչպես ասում են ՝ՀՀԿ-ի ժամանակները շարունակվում են, ավելին, տպավորություն է, որ նոր իշխանությունների միջեւ ՀՀԿ-ն է նստած եւ ցանկացած հարցում նրանք չեն դավաճանում նախկինների փիլիսոփայությունը:
Անի Սահակյան
Հետևեք մեզ Viber-ում
