Ինչու՞ էին ԴԱՀԿ աշխատակիցներն այցելել «Հայելի» մամուլի ակումբ (video)

Այսօր ԴԱՀԿ կենտրոնի բաժնի 2 աշխատակիցներ այցելել էին «Հայելի» մամուլի ակումբի նախագահ Անժելա Թովմասյանին։ Նրանց խոսքով՝ Անժելա Թովմասյանը պետք է տրամադրի 15.01.2019թ.-ին «Հայելի» մամուլի ակումբում կայացած մամուլի ասուլիսի չմոնտաժված ձայնագրությունը:Դատական գործով հայցվորը Երևանի մետրոպոլիտենի նախկին տնօրեն Փայլակ Յայլոյանն է, որը քաղհայց է ներկայացրել ընդդեմ Արտակ Խուրշուդյանի՝ պահանջելով պարտավորեցնել պատասխանող Արթուր Խուրշուդյանին հրապարակայնորեն հերքել 15.01.2019 թվականի «Հայելի» ակումբում հրավիրված ասուլիսի ընթացքում արված բոլոր արտահայտությունները: Ասուլիսին ներկա են եղել նաև   www.aravot.am, www.news.am, www.yerkir.am, www.armtimes.com, www.kentron.tv լրատվականները: Հայցվորի պահանջն է, որպեսզի հրապարակայնորեն հերքումը տեղադրվի վերոնշյալ կայքերում:

Հատկանշական է, որ ասուլիսը հեռարձակվել է ուղիղ եթերով և հարց է առաջանում՝ ինչու՞ է դատարանը լրատվամիջոցից ձայնագրություն պահանջում:

Հ. Գ.

«Հարկադիր կատարումն ապահավող ծառայություն Երևան քաղաքի կենտրոն և Նորք-Մարաշ» բաժնի պետ,արդարադատության փոխգնդապետ Գ. Դումանյանին

Հարգելի պարոն Դումանյան

Ստանալով Հարկադիր կատարումն ապահովող ծառայության Երևան քաղաքի Կենտրոն և Նորք-Մարաշ բաժնի հարկադիր կայացրած որոշումը՝ պարտապանին որոշակի գործողություններ կատարելուն պարտադրելու կամ որոշակի գործողությունների կատարումից ձեռնպահ մնալուն հարկադրելու մասին, տեղեկացնում ենք, որ մենք 15.01.2019թ.-ին «Հայելի» ակումբում հրավիրված ասուլիսի ձայնագրության չմոնտաժված կամ էլ մոնտաժված տարբերակները չենք պահպանել: Մենք փորձեցինք նաև վերոնշյալ օրվա ասուլիսի տեսաձայնագրությունը գտնել «Հայելի» ակումբի յութուբյան ալիքում, որը սակայն ևս չգտանք: Եթե հնարավոր է մեզ ուղարկեք ասուլիսի տեսաձայնագրության վերնագիրը, որով այն տեղ է գտել մեր յութուբյան ալիքում, գուցե այդպես հնարավոր լինի գտնել: Նախապես շնորհակալություն:

Գլխավոր խմբագիր` Ա. Թովմասյան